Nte Ikemede Nditịm Idem Nnọ Esoputom
1. Nso idi uduak Esoputom, ndien didie ke ikeme ndinen̄ede mbọ ufọn nto enye?
1 Ẹtịm Esoputom man ẹkpep nnyịn nte ikemede ndikwọrọ ikọ uforo uforo. Mme akpan n̄kpọ oro ẹsiwakde ndikpep ke Esoputom ẹdi nte ikpọkwọrọde eti mbụk Obio Ubọn̄, nte ikpanamde mme mbet, ye nte ikpasiande mme owo ke Abasi ọmọn̄ osobo idiọk ererimbot emi ke mîbịghike. (Matt. 28:20; Mark 13:10; 2 Pet. 3:7) Imesinen̄ede ibọ ufọn edieke itịmde idem ọfọn inyụn̄ idude ke mben̄eidem nditiene mbuana ke ndutịm Esoputom.
2. Didie ke ikeme nditịm idem nnọ mme utịn̄ikọ?
2 Utịn̄ikọ: Ẹsisiak n̄wed oro ẹdade utịn̄ikọ kiet kiet ẹto ke mme ndausụn̄ oro ẹnọde mme etịn̄ikọ. Afo emekeme ndikot n̄wed oro ẹdade utịn̄ikọ kiet kiet ẹto ye mme itie N̄wed Abasi oro ẹsiakde ẹsịn, onyụn̄ ekere nte akpadade se ẹtịn̄de do esịn ke edinam ke an̄wautom.
3. Didie ke ikeme nditịm idem nnọ nneme mbụme ye ibọrọ?
3 Nneme Mbụme ye Ibọrọ: Ikpehe enye emi edidi mbụme ye ibọrọ ukem nte ẹsinịmde Ukpepn̄kpọ Enyọn̄-Ukpeme, edi ẹyebem iso ẹtọn̄ọ enye ye ibio ibio ntọn̄ọikọ ẹnyụn̄ ẹberi ye ibio ibio utịtikọ. Dụri udịm ke idak mme akpan n̄kpọ oro ẹdude ke ikpehe ekikere kiet kiet, nyụn̄ ben̄e idem ndinọ ibio ibio ibọrọ oro ọsọn̄ọde se ẹnemede.
4. Didie ke ikeme nditịm idem nnọ nneme otuowo?
4 Nneme Otuowo: Eyenete oro ẹdinamde ikpehe enye emi edinọ enye nte utịn̄ikọ, edi oyobụp otuowo mbụme. Edieke odụride udịm ke idak mme akpan n̄kpọ oro ẹdude ke ikpehe ekikere kiet kiet onyụn̄ ese mme itie N̄wed Abasi oro ẹsiakde ẹsịn, eyekeme ndinọ ibọrọ ke ini ẹbụpde mbụme. Eyenete oro esede aban̄a ikpehe emi oyodomo ukeme ndiyak otuowo ẹtiene ẹsịn uyo ke nneme emi.
5. Nso ke ikpanam man inen̄ede ibọ ufọn ito mme nnamn̄wụt?
5 Mme Nnamn̄wụt: Ndusụk utịn̄ikọ eyenyene nnamn̄wụt man ẹnanam ẹwụt nte ẹkemede ndida se ẹsụk ẹnemede oro nsịn ke edinam ke an̄wautom. Ẹdidọhọ mbiowo m̀mê mme asuanetop oro ẹnyenede mbufiọk mîdịghe mme asiakusụn̄, ẹnam nnamn̄wụt emi. Usụn̄ oro ekemede nditịm idem nnọ ikpehe enye emi edi nditie n̄kere nte ẹdinamde nnamn̄wụt emi. Ke ini ẹnamde-nam mme ekikere oro ẹnọde ke Utom Obio Ubọn̄ Nnyịn ẹwụt, kere nte ekemede nditịn̄ enye ke ikọ idemfo ke an̄wautom ye nte ekemede ndineme enye ke nsio nsio usụn̄ oro odotde ye mbon emi afo osobode. Kụt ete ke emenyene n̄wed m̀mê magazine oro ẹdidade ẹnam nnamn̄wụt oro. Mbufo ẹmekeme ndifiak nnam ndusụk nnamn̄wụt emi ke ini Utuakibuot Ubon mbufo.
6. Ntak emi ikpetịmde idem inọ Esoputom?
6 Imesinen̄ede ikop inem Esoputom ke ini itịmde idem inọ enye inyụn̄ itiede ikere se ẹdinemede. Edieke inamde kpukpru se inemede emi, nnyịn iyenen̄ede isịn udọn̄ inọ kiet eken. (Rome 1:11, 12) Edieke idade ini itịm idem inọ Esoputom, iyekeme ndinam utom nnyịn ọfọn.—2 Tim. 3:17.