‘Nam Kpukpru N̄kpọ Kaban̄a Eti Mbụk’
1. Nso ke anditan̄a Obio Ubọn̄ enyịme ndinam nnọ mbon en̄wen, ndien ntak-a?
1 Ama enen̄ede obiomo apostle Paul nditan̄a eti mbụk nnọ mbon en̄wen. (1 Cor. 9:16, 19, 23) Kpasụk ntre, nnyịn ndikere mban̄a nsinsi mfọnọn̄kpọ mbon en̄wen anam nnyịn isịn ofụri ukeme ibuana eti mbụk ye mmọ.
2. Nso mme ukpụhọde ke nnyịn inyịme ndinam ke ini ikwọrọde ikọ, ndien ntak-a?
2 Kwọrọ Ikọ ke Ebiet ye ke Ini Ẹkemede Ndikụt Mme Owo: Ata ọkọiyak esiduọk iyịre m̀mê esịn uwam ke ebiet ye ini emi enye ekemede ndimụm iyak, idịghe ke ebiet ye ini emi enye amade. Ekeme ndiyom nnyịn n̄ko nte “mme ọkọ owo” inam ukpụhọde man ikeme ndikụt mme owo ke efakutom nnyịn inyụn̄ itịm idara ifet edimụm “nsio nsio orụk iyak.” (Matt. 4:19; 13:47) Ndi nnyịn imekeme ndida mbubreyo n̄ka mbịne mme owo ke ufọk m̀mê ndida usenubọk nnam utom efak? Utịtmbuba Paul ekedi “ndinọ ọyọhọ ikọ ntiense mban̄a eti mbụk,” ndien enye ama ada mme ifet oro ẹdotde anam ntre.—Utom 17:17; 20:20, 24.
3, 4. Mme usụn̄ ewe ke ikeme ndinam ukpụhọde ke utom ukwọrọikọ, ndien ye nso utịp?
3 Kpụhọ Neme Fo Tiene Idaha Mme Owo: Mme ọkọiyak ẹsiwak ndikpụhọde usụn̄ ọkọ mmọ man ẹmụm akpan orụk iyak. Didie ke ikeme nditan̄a eti mbụk Obio Ubọn̄ ke usụn̄ oro enemde mme owo ke efakutom nnyịn? Ana ida usọ itọn̄ọ nneme iban̄a n̄kpọ oro ebehede ediwak owo ke n̄kann̄kụk oro, ekem ikpan̄ utọn̄ ke se mmọ ẹtịn̄de ẹban̄a n̄kpọ oro. (Jas. 1:19) Imekeme ndibụp mbụme man ifiọk se mmọ ẹkerede. (N̄ke 20:5) Ima inam emi, nnyịn iyekeme ndikpụhọde nneme nnyịn man ineme enye ke usụn̄ emi etịmde otụk uwem mme owo. Paul ama ‘akabade edi kpukpru n̄kpọ ọnọ kpukpru orụk owo.’ (1 Cor. 9:22) Ndisinam ukpụhọde edin̄wam nnyịn isịm esịt mme owo.
4 Esinem didie ntem ndibuana eti mbụk “eti n̄kpọ” ye mbon en̄wen! (Isa. 52:7) Ẹyak ‘inam kpukpru n̄kpọ kaban̄a eti mbụk’ man ida enye isọk adan̄a ediwak owo nte ikekeme.—1 Cor. 9:23.