Ndi Afo Emesida N̄kpri N̄wed Nneme Bible Anam N̄kpọ?
1. Didie ke apostle Paul ye Jesus ẹkekpep mme owo n̄kpọ?
1 Apostle Paul ama esisịn ukeme ‘ada N̄wed Abasi ọkọk ibuot ye mme owo.’ (Utom 17:2, 3; 18:19) Ke ndinam emi, enye ekekpebe Jesus, emi ekesiwakde ndikot nto N̄wed Abasi nnyụn̄ nda mme uwụtn̄kpọ n̄n̄wam mme andikpan̄ utọn̄ nnọ enye ẹfiọk uduak Abasi. (Matt. 12:1-12) Ẹkesio ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible man an̄wam nnyịn inam ntre n̄ko.
2. Didie ke ikeme ndida ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible ntịm nti ntọn̄ọikọ?
2 Nditịm Nti Ntọn̄ọikọ: Nte Ẹkpetọn̄ọde Ẹnyụn̄ Ẹkade Iso ke Nneme Bible ọdọn̄ọ mme ntọn̄ọikọ oro ẹkemede ndidemede udọn̄ mme owo ke page 2 esịm 7. Ndikpep nnyụn̄ ntịn̄ nsio nsio ntọn̄ọikọ, akpan akpan ke ini ẹsiwakde ndinam utom ke efakutom mbufo, ayanam utom ukwọrọikọ fo enyene inem onyụn̄ an̄wam fi anam nti ukpụhọde onyụn̄ okụt unen ke nditọn̄ọ nneme. Emekeme ndikokot ntọn̄ọikọ fo ke ekpri n̄wed emi edieke ọnọde ikọ ntiense ke urụk ukopikọ m̀mê adade n̄kpọ utịn̄ikọ eneme nneme ye owo ke esịt ufọk emi ẹtọde ọkọ ẹkanade.
3. (a) Nso idu ke page 7 esịm 13 ke ekpri n̄wed Nneme Bible oro edin̄wamde nnyịn ke utom ukwọrọikọ? (b) Se idude ke page 13 esịm 16 edifọn ye mmanie?
3 Ndikan Mme Ikọ Utre Nneme: Nsinam mûkereke uban̄a se mme owo ẹkemede nditịn̄ man ẹtre nneme fo ke efakutom mbufo unyụn̄ uda minit ifan̄ udụn̄ọde page 7 esịm 13 mbemiso akade ukwọrọikọ, man ekere aban̄a se edibọrọde? Ndi ndusụk mme enyeneufọk ẹkeme ndidi mbon Buddha, Hindu, Jew, m̀mê Muslim? Ke edide ntre, se idude ke page 13 esịm 16 ekeme ndin̄wam.
4. Didie ke nnyịn ikpada ekpri n̄wed Mme Ibuotikọ Bible Ndida Nnyene Nneme inam n̄kpọ ke ini ẹbụpde mbụme m̀mê ẹtịn̄de ẹban̄a n̄kpọ oro ẹsidemerede eneni?
4 Ndibọrọ Mbụme: Ekpri n̄wed Mme Ibuotikọ Bible Ndida Nnyene Nneme n̄ko ekeme ndin̄wam nnyịn ke ini ẹbụpde mbụme m̀mê ẹtịn̄de ẹban̄a n̄kpọ oro ẹsidemerede eneni. Afo emekeme ndidọhọ owo oro ke imọ ikpama ndiwụt enye n̄kpọ oro enye edimade, emi imọ ifiọkde ke enyene ebuana ye se enye obụpde, ekem afo osio ekpri n̄wed oro Mme Ibuotikọ Bible Ndida Nnyene Nneme. Sia ẹmịn̄de ekpri n̄wed emi ẹtiene nte mme abisi ẹsan̄ade ke adiana ke adiana, kûbọde ka ibuotikọ oro afo ekerede ke eyesịne se oyomde. Se ndien n̄kpri ibuotikọ oro ẹwetde odobi ke sịghisịghi ubọkn̄wed. Ke ama okokụt se oyomde, kot enye nnennen nnennen to ekpri n̄wed oro. Edieke afo enemede ntak emi ẹkpeberide edem ke Bible, emekeme ndikụt se oyomde ke idak “Bible.”
5. Nso ye nso en̄wen ke ẹkeme ndida n̄kpri n̄wed emi nnam?
5 N̄kpọ Efen Oro Ẹkpedade Mmọ Ẹnam: Ndusụk owo ẹsinịm n̄kpri n̄wed emi ke itieutom mmọ m̀mê ẹmen ẹka ufọkn̄wed man ẹn̄wam mmọ ẹbọrọ mme utọ mbụme nte, ‘Ntak emi mbufo mîsinịmke usọrọ usen nduọkodudu-e?’ ‘Nsinam mbufo mînịmke ikan̄ hell ke akpanikọ?’ Mme uyen ẹkeme ndikụt nte ibuotikọ oro “Edibotn̄kpọ” an̄wamde mmọ, ndien se iban̄ade “Mbuaha Mbuọtidem” ekeme ndin̄wam mmọ ẹyọ idomo editiene mbuana ke akam usenubọk ke ufọkn̄wed. Ndi amaduak ndika n̄kese owo oro owo esie akpade? Se idude ke idak ibuotikọ oro “N̄kpa” ye “Ediset ke N̄kpa” ekeme ndin̄wam fi ada n̄wed Abasi ọdọn̄ enye esịt. N̄kpri n̄wed emi n̄ko ẹkeme ndin̄wam mbon oro ẹtịmde idem ndinọ utịn̄ikọ m̀mê ndinịm mme mbono an̄wautom.
6. Nso isidi uduak nnyịn ke ini ikwọrọde ikọ?
6 Ke ini ikwọrọde ikọ, uduak nnyịn idịghe ndikan mme owo ke eneni m̀mê ndinọ mmọ ikọ ibuot. Nnyịn iyom ndida N̄wed Abasi n̄kọk ibuot ye mmọ. Nte idade n̄kpri n̄wed emi inam n̄kpọ, nnyịn iwụt ke imọnọ ntịn̄enyịn ke se nnyịn ikpepde owo.—1 Tim. 4:16.