“Ndinọ Ọyọhọ Ikọ Ntiense”—Ke Ndikwọrọ Ikọ ke Ikpọ Ufọk
1. Nso ibuana ke “ndinọ ọyọhọ ikọ ntiense mban̄a eti mbụk”?
1 Ọdọn̄ nnyịn “ndinọ ọyọhọ ikọ ntiense mban̄a eti mbụk,” ukem nte ọkọdọn̄de apostle Paul. (Utom 20:24) Ke ntre nnyịn imesisịn ukeme ndikwọrọ etop Obio Ubọn̄ nnọ ata ediwak owo nte ikekeme ke efakutom nnyịn. Emi esịne akpakịp owo oro ẹsidụn̄de ke ikpọ ufọk (utọ nte ke akwa okụre, ufọk oro ẹdọn̄de ikpọ ọkọ ẹkanade, ye mbon oro ẹkpemede okoneyo ye uwemeyo). Ndusụk ini ẹsisọn̄ ndisobo ye mbon emi ẹdụn̄de ke mme utọ ebiet oro. Nte ededi, sia ediwak owo ẹsidụn̄de ke utọ ikpọ ufọk emi, imenyene ekese ifet nditan̄a eti mbụk nnọ mmọ.
2. Ntak oyomde ẹnam n̄kpọ ke ọniọn̄ ye mbufiọk ke ini ẹkwọrọde ikọ ke ikpọ ufọk-ọ?
2 Ke ntak ọkpọsọn̄ ubiatibet ye afai, ẹdikọkọbi ata ediwak ikpọ ufọk, mmọ ẹnyụn̄ ẹnyene mme ekpeme-otop ye ukwak usio ndise oro ẹkemede ndida ke esịt okụre n̄kụt owo ke an̄wa. (2 Tim. 3:1, 2) Mme andise mban̄a ufọk oro ẹkeme ndinịm ibet ete owo okûyak esenowo odụk edieke owo mîkokotke enye. Andise mban̄a akwa ufọk ekeme ndidọhọ nnyịn iwọrọ, akpan akpan edieke owo kiet emi odụn̄de do mînemke esịt iban̄a edidi nnyịn. Ke ntre, ọfọn ẹnam n̄kpọ ke ọniọn̄ ye mbufiọk.
3. Ini ewe ọfọn akan ndikwọrọ ikọ ke ikpọ ufọk, ndien ntak-a?
3 Ini Ẹkpekade Do: Nte esidide ke mme utọ efakutom en̄wen, etịm ọfọn ẹka ikpọ ufọk ke ini oro mme owo ẹdidude ke ufọk. Ẹkeme ndinyene eyịghe mban̄a nnyịn edieke ikade ke ini ediwak owo mîdụhe ke ufọk. Ediwak mme asuanetop ẹsikeme ndikụt mme owo ke ufọk ke mbubịteyo ẹnyụn̄ ẹkụt ke uwemeyo Saturday ye Sunday. Ndibabak n̄ka ikpọ ufọkidụn̄, akpan akpan ke utịturua ekeme ndinam mme andidụn̄ ẹketọt nnyịn ẹnọ andise mban̄a akwa ufọk oro.
4, 5. Nso ke ikpanam man ikeme ndidụk ndusụk ikpọ ufọk emi ẹkọbide usụn̄?
4 Man Ikeme Ndidụk: Mme asuanetop ikpenyeneke ndika mbịne andise mban̄a m̀mê akwa owo efen ekededi mbemiso ẹkade ukwọrọikọ do. Edieke ufọk oro ẹkọbide usụn̄ enyenede n̄kpọ oro ẹkemede ndida ke an̄wa ntịn̄ ikọ ye mme owo ke esịtufọk, nnyịn imekeme ndida enye nyom owo oro edinyịmede ndiyak nnyịn idụk idineme nneme ye enye. Ọkọn̄ọde ke nte ufọk oro etiede, nnyịn imekeme ndika mme enyịnusụn̄ en̄wen ke ufọk oro ke ima ikokụre nneme nnyịn ye owo oro akayakde nnyịn ibe idụk. Nte ededi, ke mme itie en̄wen, ọfọn iwọrọ ikada n̄kpọ utịn̄ikọ iyom owo efen. Nnyịn ikpenyene ndiwụt mbufiọk ke ndibiere owo ifan̄ emi nnyịn ididade itịn̄ ikọ ke ini oro.
5 Ndusụk owo ẹkeme ndiyom afo ada n̄kpọ utịn̄ikọ oro etịn̄ se idade fi idi. Ke edide ntre, tie ufan ufan nyụn̄ tịn̄ idem fo nọ owo oro. Edieke ẹwetde enyịn̄ owo oro ẹdian, kot enye ke enyịn̄. Tịn̄ ibuotikọ fo ibio ibio. Ndusụk owo ẹsikụt unen ke ndikot ntọn̄ọikọ mmọ ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible.
6. Nso ke ikpanam ke ini ikwọrọde ikọ ke ikpọ ufọk oro ẹnyenede ekpeme-enyịnusụn̄?
6 Edieke ekpeme-enyịnusụn̄ mîyakke nnyịn ibe idụk ufọk oro, nnyịn imekeme ndikwọrọ ikọ nnọ enye. Ediwak mme ekpeme-enyịnusụn̄ ẹsima ndikot n̄wed nnyịn. Nnyịn imekeme ndida ke usụn̄otop ntọn̄ọ nnyụn̄ nnịm ukpepn̄kpọ Bible. Edieke ekpeme-enyịnusụn̄ enyịmede nnyịn ika ikese owo emi okowụtde udọn̄, esifọn inyụn̄ ika ikese owo oro utu ke ndisan̄a n̄kọn̄ mme usụn̄ eken ke ufọk oro.
7. Nso ke ikpeti iban̄a ekpat ukwọrọikọ nnyịn?
7 Usịnen̄kpọ ye Edu: Ndikama ikpọ ekpatubọk ekeme ndinam nnyịn idụk owo enyịn iyat. Ke ntre, nnyịn ikpowụt eti ibuot ke ndikama ekpri ekpatubọk m̀mê ke nditre ndikakama ekpatubọk. Ndusụk mme asuanetop ẹsisịn n̄wed oro ẹnọde ke n̄kpọ udọn̄ babru ẹnyụn̄ ẹkama Bible ke ubọk mîdịghe ẹsịn ke ekpatọfọn̄ mmọ.
8. Didie ke ẹkpetịm mme otu man ẹkwọrọ ikọ ke ikpọ ufọk?
8 Ifọnke iboho ke otu oro awakde, akpan akpan ke mme usụn̄otop m̀mê itie ubon n̄kpọisan̄, sia emi ekeme ndidụri ntịn̄enyịn nte mîdotke nnọ nnyịn. Oyom ẹnen̄ede ẹdu ke ukpeme ke ini ẹkwọrọde ikọ ke ikpọ ufọk ke mme itie oro ubiatibet okponde. (N̄ke 22:3) Ke uwụtn̄kpọ, asuanetop inan̄ m̀mê itiokiet ẹkeme ndisan̄a iba iba nnam utom n̄kpere kiet eken, ẹnyụn̄ ẹkọn̄ usụn̄ ufọk kiet kiet ke ini mbon eken ẹdade kan̄a ẹbet mmọ.
9. Didie ke nnyịn ikpowụt nti edu, ndien ntak anade inam emi-e?
9 Ke ini odụkde akwa ufọk, kwọhọde ikpaukot nyụn̄ beri usụn̄ ọfọn. Ndiwụt nti edu ntem idiyakke mme andidụn̄ ẹnyene ntak ndiyat esịt. Ndondo oro odụkde esịt ufọk, be nnennen kodụk n̄kpọ umen owo ndọk enyọn̄ mîdịghe be nnennen ka ebiet oro ẹyomde ndikwọrọ ikọ utu ke ndibiat ini ke nto ndụk. Emi idiyakke mme owo ẹkere se nnyịn iyomde do.
10. Didie ke ikeme ndifep ndinam uyom ke mme usụn̄otop?
10 Uyom esisan̄a ke usụn̄otop ye kọridọ ke ediwak ikpọ ufọk. Ke ntak emi, kûtịn̄ ikọ uyo ọsọn̄ akaha ke ini enemede nneme ye enyeneufọk. Ke ini etịn̄de ikọ ye mme asuanetop eken, kûfofiori, kûnyụn̄ unam nte ọdọn̄ odu man mme owo idikere m̀mê nso ke ẹda do ẹneme. Ndusụk asuanetop ẹsidi ẹkwọrọ ikọ ke ufọk enye emi ekem ẹbe ẹkekwọrọ ke edem n̄kan̄ eken utu ke ndisan̄a ke udịm kiet ke usụn̄otop mbak mmọ editịmede mme andidụn̄ ufọk oro. Ke adianade do, ndikọn̄ usụn̄ ubọk ọsọn̄ akaha ekeme ndisịn ndịk ke idem mbon oro ẹdude ke esịtufọk.
11. Mme ekikere ewe ẹdin̄wam ke ini ikọn̄de usụn̄ oro enyenede ndudu emi ẹkemede ndida n̄kụt owo ke an̄wa?
11 Edieke usụn̄ oro enyenede ndudu emi ẹkemede ndida ke esịt ufọk n̄kụt owo ke an̄wa, da ke itie emi owo ekemede ndikụt fi ye nsan̄a fo ọfọn. Se ndudu oro, ndien ama okụt owo esede fi, kọm enye ke edu ufan nyụn̄ tọn̄ọ ndikwọrọ ikọ nnọ enye. Edieke owo oro obụpde m̀mê anie edi oro, emekeme ndisiak enyịn̄ fo ye enyịn̄ owo oro asan̄ade ye afo. Emi ekeme ndinam enyeneufọk ama ndiberede usụn̄. Mîdịghe ntre afo emekeme ndisụk nda do ke enyịnusụn̄ n̄kwọrọ ikọ nnọ enye.
12. Didie ke ikeme ndifep mfịna ke ini inịmde n̄wed inọ mbon emi mîdụhe ke ufọk?
12 Ufọk oro Owo Mîdụhe: Mme andise mban̄a ikpọ ufọk ẹsiwak ndidọhọ ke mmimọ isisan̄a itan̄ mme n̄wed ke isọn̄. Mme n̄wed emi ẹfakde ke usụn̄ ẹkeme ndiduọn̄ọ nsuana ke isọn̄. Ntre ẹkpenyene nditịm nnịm n̄wed ekededi oro ẹnịmde ẹnọ mbon emi mîdụhe ke ufọk.
13. Nso ke ikpanam edieke isobode enyeneufọk emi ayatde esịt?
13 Mme Enyeneufọk oro Ẹyatde Esịt: Edieke isobode enyeneufọk emi ayatde esịt onyụn̄ oyomde ndikot andise mban̄a ufọk, ọkpọfọn ndikpọn̄ ebiet oro nnyụn̄ n̄ka do ini efen. Ke mme idaha en̄wen, ọkpọfọn ndikpọn̄ ufọk oro ofụri ofụri mbak andise mban̄a ufọk oro edidi edinam ikọ ye nnyịn. Idem ọkpọkọm enyeneufọk idọhọke owo okûsudi ufọk imọ aba, ọkpọfọn ẹsịn idiọn̄ọ ke kad efakutom ndiwụt ke owo inyeneke ndika ufọk oro. Ukem nte ẹsinamde ye mme ufọk efen oro mînaha ẹka, ẹkpenyene ndika ufọk oro ke ini ke ini man ẹkebụp m̀mê enyeneufọk osụk ọdọhọ owo okûdi ufọk imọ.
14, 15. Nso ke ikpanam edieke anamutom ke akwa ufọk ọdọhọde nnyịn iwọrọ?
14 Edieke Ẹdọhọde Fi Ọnyọn̄: Edieke andise mban̄a ufọk, andikpeme, ọdiọn̄ ufọk, m̀mê owo efen ekededi ọdọhọde fi ọwọrọ ọnyọn̄ ke ini osụk ọkwọrọde ikọ, ọfọn onyụn̄ ọwọrọ ini kiet ọnyọn̄. Ini ekededi oro ikemede, nnyịn iyomke ndibọrọ ikọ emi ekemede ndinam ẹdọhọ ke ẹmọn̄ ẹnọ nnyịn bodisi m̀mê ndida nnyịn n̄ka esop. Ke ata ediwak idaha, mme andikpeme ikpọ ufọk isinyeneke mfịna ye Mme Ntiense Jehovah, edi ẹkam ẹnam utom mmọ.
15 Ndusụk ini ke ini anamutom ke akwa ufọk ọdọhọde fi ọnyọn̄, afo emekeme ndida ifụre ifụre edu nsian enye se ikadade fi ika do. (1 Pet. 3:15) Nnyịn imọfiọk ke utom esie edi ndinam mme andidụn̄ ikpọ ufọk oro ẹkop inemesịt ẹnyụn̄ ẹnyene ifụre. Enye ekeme ndiyak fi osụk odu do. Edi edieke mîyakke, nyụn̄ wọrọ nte enye etịn̄de. Edieke idaha ọfọnde, emekeme ndidọhọ ẹyak fi enịm n̄wed ke ini ke ini ke usụn̄otop ikpọ ufọk m̀mê ke itie usịn leta. (Col. 4:6) Ẹkpenyene ndisian esenyịn utom mban̄a utọ idaha oro kpukpru ini.
16. Nso ke ikpanam edieke nnyịn mîkemeke ndisọp n̄kọk mfịna oro edemerede ke ini inamde utom ke ikpọ ufọk?
16 Ekeme ndidi ndusụk ini ẹma ẹbe, mme asuanetop ẹkeme ndida ọniọn̄ n̄kọkwọrọ ikọ ke akwa ufọk oro. Nte ededi, edieke nnyịn mîkemeke ndisọp n̄kọk mfịna oro edemerede, mbiowo ẹyenam n̄kọk itieutom ọdiọn̄ọ man ẹn̄wam mmọ utu ke mme asuanetop ndidomo ndikọk mfịna oro ke idem mmọ. Edieke mme asuanetop mîkemeke ndikwọrọ ikọ ke ikpọ ufọk, ẹkeme ndidomo ndida mme usụn̄ en̄wen nsịm mme andidụn̄ do, utọ nte ndikot mmọ ke urụk ukopikọ m̀mê ndisiwet leta nnọ ẹsọk mmọ. Ndusụk mme asuanetop ẹsinọ ikọ ntiense ke efak ẹkpere ikpọ ufọk emi ke usenubọk ye mbubịteyo ke ini mme owo ẹdiwọrọde ẹka utom m̀mê ẹnyọn̄de-nyọn̄ utom.
17. Ntak anade inọ ikọ ntiense ke ikpọ ufọk-ọ?
17 Utịt editịm n̄kpọ emi ke enen̄ede ekpere. Ẹdinyan̄a mbon oro ẹkotde enyịn̄ Jehovah ikpọn̄. “Edi, didie ke mmọ ẹdikot enye emi mmọ mîkọbuọtke idem? Didie, n̄ko, ke mmọ ẹdibuọt idem ye enye emi mmọ mîkokopke iban̄a?” (Rome 10:13, 14) Ediwak “mbon oro ẹnyenede eti esịt ndinyene nsinsi uwem” ẹdụn̄ ke ikpọ ufọk. (Utom 13:48) Nnyịn imekeme ndida eti mbụk nsọk mmọ edieke inamde n̄kpọ ke ọniọn̄ ye mbufiọk.