San̄asan̄a Usen Ndiyom Mbon Emi Ẹdinyịmede Ukpepn̄kpọ Bible
1 Ọtọn̄ọde ke January, kpukpru ọfiọn̄ esop kiet kiet oyosio utịturua kiet enịm, iso-ọfọn akpa utịturua, man ẹsịn ifịk ẹyom mbon emi ẹdinyịmede ukpepn̄kpọ Bible. Usen emi ekeme ndidi Saturday m̀mê Sunday, nte ọfọnde ye mme asuanetop. Ke usen oro, edieke mme enyeneufọk mînyịmeke ẹsidi ẹdikpep mmimọ Bible, mme asuanetop ẹkeme ndinọ n̄wed Bible Ekpep m̀mê magazine ndondo emi. Kpukpru mbiowo ye mme asan̄autom unamutom ẹkpenyene nditịm idem man ẹbuana ọyọhọ ọyọhọ ke edinam emi ẹnyụn̄ ẹn̄wam mme asuanetop nditọn̄ọ mme ukpepn̄kpọ Bible.
2 Kọmiti Utom Esop edibiere m̀mê ewe utịturua ke ẹdisio usen ẹnịm man ẹda ẹyom mbon emi ẹdinyịmede ukpepn̄kpọ Bible. Ẹkpenyene nditi nditọete ke ini ke ini man mmọ ẹkeme ndiben̄e idem ẹnyụn̄ ẹsịn akpan ukeme ẹyom mbon emi ẹdinyịmede ukpepn̄kpọ Bible ke ufọk ke ufọk ye ke ini ẹkade ẹbịne mbon oro ẹkewụtde udọn̄.
3 Nte Ẹkpetịmde Idem: Nnyịn imekeme ndikụt mme ekikere ẹnọde ke nte ẹkpetọn̄ọde ukpepn̄kpọ Bible ke esịne-esịt Utom Obio Ubọn̄ Nnyịn eke March 2006 ye ke page 5 ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible. Ndusụk owo ẹkeme ndimek ndikama tract, utọ nte Nte Akpama Ndifiọk Akpanikọ? (Se page 6.) N̄ko, page 3 ke Utom Obio Ubọn̄ Nnyịn eke August 2007 ọnọ ekikere ke nte ẹkpetọn̄ọde ukpepn̄kpọ Bible ke ini ẹkade ẹbịne mbon oro ẹkebọde magazine. Ẹyenam ndutịm man mbiowo ye mme asan̄autom unamutom ẹsinịm ibio ibio mbono an̄wautom ke minit 10 esịm 15, emi ẹdinemede m̀mê ẹnanam ekikere kiet m̀mê iba ẹwụt ke nte ẹkpetọn̄ọde ukpepn̄kpọ Bible.
4 Nte ededi, idịghe kpukpru owo ẹdinyịme ukpepn̄kpọ Bible m̀mê ẹdika iso ẹkpep n̄kpọ ke anyan ini. Edi emi ikpanamke nnyịn itre ndiyom mbon emi ẹdinyịmede ukpepn̄kpọ Bible, sia edide Jehovah odụri mbon mbieterọn̄ edi esop esie. (John 6:44) Utom nnyịn idịghe ndisuan n̄kpasịp akpanikọ kpọt, edi n̄ko ndika iso mbọk nnyụn̄ nduọk mmọn̄ ke se ikọdọn̄de n̄kam, ndien oro esịne ndikpep mbon eti esịt Bible. Ke ndinam ntre, nnyịn inam utom nte nsan̄autom Abasi.—1 Cor. 3:9.