Nte Mme Christian Ẹsede Uyịp Udomo
1 Kpukpru ata mme Christian ẹnyịme ikọ Paul emi ke Mme Hebrew 13:18: “Nnyịn [iyom] ndidu uwem edinam akpanikọ ke kpukpru n̄kpọ.” Nnyịn iyom ndinam akpanikọ okposụkedi idụn̄de ke ererimbot oro akade-ka iso ndibiara. Unana edinam akpanikọ otụk kpukpru ikpehe uwem, esịnede ediwet udomo. Udọn̄ ndibe udomo man ẹbe ẹdụk class efen, ẹbe ẹdụk ufọkn̄wed efen, m̀mê ẹmenede owo itie ke utom, ẹsinam mme owo ẹyịp udomo.
2 Nte Enye Atarade Asuana: Mme owo ẹsiyịp udomo ke nsio nsio usụn̄ man ẹbe. Emi esịne ndikama babru ibọrọ mbụme ndụk ufọk udomo, ndiyịp se owo oro etiede ekpere ke ufọk udomo ewetde, ndibọ ibọrọ mbụme mbemiso ekem ini udomo, ndibọ ibọrọ mbụme ke urụk ukopikọ oro ẹkamade ke ubọk, m̀mê ndiwet mme ibọrọ mbụme ke mme ebiet oro owo mîkemeke ndikụt ke idem owo. Ndusụk owo ẹsikam ẹsịn enyịn̄ nditiene ntie udomo ekem ẹkpe owo en̄wen ediwet udomo oro ọnọ mmọ.
3 Ẹsio usụn̄ uyịp udomo efen ẹdi. Ke ndusụk itie, mme akamautom ufọkn̄wed ẹsidọhọ nditọ ufọkn̄wed ẹkpe okụk man ẹbe udomo. Ẹsinọ mbon oro ẹkpede okụk emi kad idiọn̄ọ ndidụk ufọk udomo oro mmọ ẹtịmde man mme owo do ẹyịp udomo. Ẹdọhọ ke ndusụk mme ete ye eka ẹsisịn udọn̄ ẹnọ nditọ mmọ ẹkesịn udomo ke ufọkn̄wed oro ẹsikpede okụk man ẹbe udomo. Ndusụk uyen ẹsibọk okụk ẹda ẹkpe man ẹbe udomo, inyụn̄ iyakke ete ye eka mmọ ẹdiọn̄ọ.
4 Ke ndusụk idaha, ẹsinyịk nditọ ufọkn̄wed ndikpe okụk emi. Ke uwụtn̄kpọ, ẹma ẹsịn eyenete an̄wan kiet ndịk ke idem ẹte ke edieke enye mîkpehe okụk oro ke owo idiyakke enye ewet udomo. Eyeneka esie, emi edide ebiowo, ama ewet leta ọnọ ẹsọk Itieutom Esede Aban̄a Ubọ Ukpep. Oro ama anam ẹmụm ndusụk mme eseutom ke ufọkn̄wed oro. Se idude edi nte ke Itieutom Esede Aban̄a Ubọ Ukpep ye ukara inyịmeke mme owo ẹyịp udomo. Edi ndusụk mme etubom ufọkn̄wed ye mme andikpep ẹnyịme edinam emi sia mmọ ẹsibọde okụk; emi esinyụn̄ anam mmọ ẹwọrọ etop ke ntak ediwak owo ẹsibede udomo ke ufọkn̄wed mmọ.
5 Ntak Nnyịn Mîkpetieneke Iyịp Udomo: Bible obiom uyịp udomo ikpe, inamke n̄kpọ m̀mê nso utọ usụn̄ ke ẹda ẹyịp udomo. Mme N̄ke 11:1 ọdọhọ ete: “Jehovah abat nsunsu balance ke mbubiam.” Ke ini owo eyịpde udomo man ebe, idịghe ifiọkn̄wed esie ke enye ada ebe udomo oro. Sia Jehovah asuade utọ abian̄a abian̄a edinam oro, ata mme Christian isitieneke ibuana ke edinam oro.
6 Ntak efen oro anamde mme Christian ẹkûtiene ẹyịp udomo edi nte ke edinam emi iwụtke ukpono inọ Caesar. Ibet idụt nnyịn ọdọhọ ẹsịn owo ekededi oro ẹmụmde nte eyịpde udomo ke ufọk n̄kpọkọbi. Nnyịn ifepke ediyịp udomo ke ntak ndịk edibọ ufen, edi inam emi ke ntak ẹdọhọde nnyịn ‘isụk idem inọ mme enyene-odudu emi ẹkarade.’—Rome 13:1-7.
7 N̄ko-n̄ko, mme Christian isibian̄ake abian̄a m̀mê ndisịn udọn̄ nnọ abian̄a, koro ndinam ntre ekeme ndibiat ubieresịt owo sụn̄sụn̄. Jehovah ọkọnọ nnyịn ubieresịt man asian nnyịn ke ini idụkde idiọk afan̄. Edieke nnyịn mîkpan̄ke utọn̄ inọ ubieresịt nnyịn idem ke ata n̄kpri n̄kpọ, enye oyodoro ufiọn ndien nnyịn imekeme ndisọn̄ esịt nnam ata akamba idiọkn̄kpọ, inyụn̄ ibiat itie ebuana nnyịn ye Jehovah.—1 Pet. 3:16.
8 Utom Mme Ete ye Eka: Edi akpanikọ ke mme ete ye eka oro ẹdide Christian ẹma nditọ mmọ ẹnyụn̄ ẹyom n̄kpọ ọfọn ye mmọ. Kpa ye oro, mme Christian oro ẹkọride ẹsịm ọyọhọ idaha ẹkpenyene ndinam nditọ mmọ ẹfiọk nte ke mmimọ ida n̄kọri oro mmọ ẹnamde ke n̄kan̄ eke spirit ke akpan n̄kpọ ikan ukeme ekededi oro mmọ ẹsịnde ndinam n̄kọri ke ererimbot emi. Mme ete ye eka oro ẹbakde Abasi ẹfiọk ke Jehovah ọdọhọ mmimọ ikpep nditọ mmimọ n̄kpọ. (Eph. 6:4) Ntre, mmọ isidianake ye nditọ mmọ inam idiọkn̄kpọ ndomokiet. Mme ete ye eka oro ẹmade nditọ mmọ ẹsida ini ẹnam nditọ mmọ ẹma akpanikọ ye eti ido.
9 Ẹdiọn̄ọ Mme Ntiense Jehovah nte mbon akpanikọ. Nnyịn owo kiet kiet ikpenyene ndinam n̄kpọ man ika iso inyene eti enyịn̄ oro. Ntre, ẹyak nnyịn isịn udọn̄ inọ mme uyen nnyịn ẹsịn idem ẹkpep n̄wed man mmọ ẹkeme ndibe udomo ke ufọkn̄wed. (N̄ke 10:24; 22:29) Kpa ye oro ediwak owo ẹsiyịpde udomo, kpukpru nnyịn ikpakam in̄wana ọkpọsọn̄ ndinyene eti ubieresịt ke iso kpukpru owo, ntem inamde ẹtoro Jehovah.—Heb. 13:18.