Ekebe Mbụme

◼ Nte ete ye eka ẹkeme ndibat ini oro ẹdade ẹnịm ukpepn̄kpọ ubon?

Okposụkedi emi obiomode mme ete akpan akpan ndikama nditọ mmọ “ke ntụnọ ye ke usụn̄ ukere n̄kpọ Jehovah,” mme eka n̄ko ẹtiene ẹbuana ke ndinọ nditọ mmọ ukpep. (Eph. 6:4) Bible esịn udọn̄ ọnọ nditọ ete: “Eyen mi, kop item usọ, kûnyụn̄ ukpọn̄ mbet uka.” (N̄ke 1:8) Kiet ke otu akpan usụn̄ oro mme ete ye eka ẹdade ẹnọ nditọ ukpep edi ukpepn̄kpọ Bible ubon.

Ke ini edem, ete m̀mê eka emi enịmde ukpepn̄kpọ ubon ye nditọ emi mînaha kan̄a baptism ekesibat ini oro ẹdade ẹnịm ukpepn̄kpọ oro, ọkpọkọm mmọ mbiba ẹketiene ẹbuana ke ukpepn̄kpọ oro. Edi ẹnam ukpụhọde idahaemi. Ke ini ẹnịmde ukpepn̄kpọ ubon, edieke ete ye eka ẹbuanade ke ndikpep nditọ n̄kpọ, do mmọ mbiba ẹkeme ndibat n̄wak n̄kaha hour kiet ke urua kiet nte ini an̄wautom. Edi akpanikọ ke mme ete ye eka ẹsibiat se ikande hour kiet ke urua ndinọ nditọ mmọ ukpep. Oyom mme ete ye eka ẹsịn ukeme ẹkpep nditọ mmọ n̄kpọ kpukpru ini. (Deut. 6:6-9) Nte ededi, ata akpan n̄kpọ oro ẹkpewetde ke ibatutom an̄wautom eke ọfiọn̄ ke ọfiọn̄ ekpedi se ẹkenamde ke an̄wautom. Mmọdo, owo ikpenyeneke ndibat se ikande hour kiet ke urua, idem ọkpọkọm ukpepn̄kpọ oro ama ebịghi akan hour kiet, m̀mê ẹkenịm enye ediwak ini ke urua, m̀mê ẹsinịm ukpepn̄kpọ ye nsio nsio nditọ. Kiet ke otu mmọ edibat ukpepn̄kpọ Bible ye mfiakn̄ka kiet ke urua kiet kiet oro ẹnịmde ukpepn̄kpọ oro.