San̄asan̄a Ubịnikọt Tract January 19–February 15, 2009!

¹ Nnyịn iyada obufa tract emi ẹkotde Nte Akpama Ndifiọk Akpanikọ? inam san̄asan̄a ubịnikọt ke ofụri urua inan̄ ọtọn̄ọde ke Monday, January 19, 2009. Imodori enyịn ite ke san̄asan̄a ubịnikọt ofụri ererimbot emi ayanam mme owo ẹtetịm ẹnyene udọn̄ ke n̄kukụre ebiet emi akpanikọ otode.—John 17:17.

² Tract emi ọnọ mbio mbio ibọrọ Bible ke akpan mbụme itiokiet emi: “Nte Abasi enen̄ede ekere aban̄a nnyịn?” “Nte ekọn̄ ye ndutụhọ ẹyetre tutu amama?” “Nso isitịbe inọ nnyịn ke ini ikpade?” “Nte idotenyịn ndomokiet odu ọnọ mme akpan̄kpa?” “N̄kpọbọn̄ didie akam nnọ Abasi man enye okop?” ye “Nso ke n̄kpanam man n̄kop inemesịt?” Akananam mme ufọkabasi Christendom inọhọ ibọrọ oro oyụhọde owo ke mme mbụme emi. Idem ediwak mbon oro mîdịghe mme Christian ẹbụp ukem mbụme emi, edi ekeme ndidi mmọ ifiọkke ke nnennen ibọrọ do ke Bible. Ke ntem, ediwak owo ẹyema etop oro odude ke tract emi.

³ Ẹkụre Efakutom Mbufo: Ẹdomo ndikụre adan̄a ediwak efakutom eke ufọk ke ufọk nte ẹkekeme. Edieke efakutom mbufo okponde, mbiowo ẹkeme ndidọhọ mbufo ẹnịm tract ke ufọk oro owo mîdụhe ke akpa ini oro ẹkade. Ẹti ndiyak obufa tract emi nnọ mme mbọhọidụn̄, mme iman, nsan̄autom m̀mê nsan̄a ufọkn̄wed, ye mbon en̄wen oro mbufo ẹsidade ẹneme nneme kpukpru ini. Afo omonyụn̄ ekeme ndinam ndutịm man anam usiakusụn̄ unọ un̄wam ke January m̀mê February 2009. Ndi emenyene eyen m̀mê eyen ukpepn̄kpọ Bible oro anamde n̄kọri, emi okponyụn̄ odotde ndidiana ye nnyịn nnam ubịnikọt emi nte asuanetop oro mînaha baptism? Edieke edide ntre, sian mbiowo mbufo.

⁴ Se Ẹkpetịn̄de: Man ekeme ndinọ ediwak owo etop emi, ọfọn anam nneme fo edi ibio ibio. Bụp enyeneufọk kiet ke otu mbụme itiokiet emi ẹdude ke edem tract emi nyụn̄ wụt mmọ ibọrọ kpa ke tract emi. Emi ayanam kpukpru mme asuanetop ẹkpụhọde nneme mmọ nte edifọnde ye mme owo ke efakutom. Edieke owo owụtde ke imama se enemede, nam ndutịm man akpafiak aka ebịne enye. Ke mme utịturua, ẹkeme ndidian mme magazine eke ndondo emi nnọ ye tract emi. Ubịnikọt oro ama okụre ke February 15, 2009, nnyịn idinọ n̄wed San̄a Kpere Jehovah. Ẹdinọ tract ekededi emi edisụhọde nte ẹsinyụn̄ ẹnọde mme tract eken.

⁵ Tọn̄ọ Ukpepn̄kpọ Bible: Ẹnen̄ede ẹnam tract emi man ẹkeme ndida ntọn̄ọ ukpepn̄kpọ Bible. Ke ini afiakde aka ndise owo emi akamade se enye okokopde, afo emekeme ndibụp akpanikọ Bible emi enye akamade, oro okonyụn̄ ọdọn̄de enye esịt. Wụt enye akpatre page oro ẹtịn̄de ẹban̄a ndutịm ukpepn̄kpọ Bible nnyịn, nyụn̄ nọ enye idem n̄wed Bible Ekpep kiet. Edieke ekemede, neme ikpehe ekikere kiet m̀mê iba ibio ibio ke ibuotikọ oro ẹnemede ediwak n̄kpọ aban̄a se enyeneufọk ekemekde.

⁶ Jehovah oyom mbon oro ẹdituakde ibuot ẹnọ enye “ke spirit ye ke akpanikọ.” (John 4:23) Ẹyak kpukpru nnyịn ibuana ke san̄asan̄a ubịnikọt emi inyụn̄ in̄wam mbon efen ẹdi ẹdifiọk akpanikọ!