Ntịmidem Anam Mfiakn̄ka Enyene Uforo
1. Ke usụn̄ ewe ke akana ẹtat utom ukwọrọikọ Christian ke akpa isua ikie?
1 Jesus ama enen̄ede etịm mbet esie idem man mmọ ẹkụt unen ke ndikwọrọ “eti mbụk obio ubọn̄.” (Matt. 4:23; 9:35) Jesus ọkọnọ mmọ ukpep emi ke adan̄aemi enye ọkwọrọde ikọ ke Palestine. Nte ededi, mbemiso Jesus afiakde ọnyọn̄ heaven, enye ama ọdọhọ ke utom ukwọrọikọ ayatara tutu ẹnam “mme owo ke kpukpru idụt ẹdi mbet.”—Matt. 28:19, 20.
2. Nso ibuana ke ‘ndinam mme mbet’ nte Jesus eketemede?
2 Utom oro ayabuana ndifiak n̄ka mbịne mbon oro ẹkewụtde udọn̄ ke eti mbụk Obio Ubọn̄ Abasi nnyụn̄ n̄kpep mmọ ẹnam kpukpru n̄kpọ oro Christ eketemede. Man inam mme mfiakn̄ka emi ẹnyenede uforo, oyom inen̄ede itịm idem.
3. Didie ke afo ekeme ndisịn itiat idakisọn̄ nnọ mfiakn̄ka idem ke akpa ediwaha?
3 Babak Nam Ndutịm: Ndusụk mme asuanetop ẹsidomo ndibụp mbụme ke akpa ediwaha mbemiso mmọ ẹnyọn̄de, ndien ekem ẹdọhọ ke iyafiak idibọrọ mbụme oro. Mmọ ẹmekụt ke nditịn̄ n̄kpọ mban̄a n̄wed Bible Ekpep ke ẹfiakde ẹka esin̄wam mmimọ nditọn̄ọ ukpepn̄kpọ Bible ke ebe oro.
4. Ntak emi nnyịn mîkpebetke mbufa nsiondi magazine ẹdi mbemiso inamde mfiakn̄ka?
4 Nnyịn ndinyene utọ magazine iba kpọt ndikama ke ọfiọn̄ iwọrọke ke ikpenyene ndibet tutu ibọ mme nsiondi ọfiọn̄ efen mbemiso ifiakde ika. Imekeme ndisịn udọn̄ nnọ owo oro ke ndineme etop oro esịnede ke magazine emi enye ama ekenyenyene.
5. Ntak emi ọfọnde ndinyene uduak ke ini inamde mfiakn̄ka?
5 Nyene Uduak: Mbemiso afiakde aka, da minit ifan̄ dụn̄ọde se ekewetde enịm nyụn̄ biere se aduakde ndinam. Ke uwụtn̄kpọ, neme akpan n̄kpọ kiet ke n̄wed oro afo ọkọnọde. Mîdịghe nọ n̄wed efen emi enyenede ebuana ye se ekenemede isan̄ oko. Edieke afo okobụpde enye mbụme isan̄ oko, akpana afo ọbọrọ mbụme oro. Ke ini oyomde ndiwụt owo nte N̄wed Abasi ọsọn̄ọde se enemede, n̄wana kot itie oro nnennen nnennen ke Bible.
6. Nso idi uduak nnyịn ke ini inamde mfiakn̄ka?
6 Uduak Nnyịn: Nte ededi, uduak nnyịn edi nditọn̄ọ ukpepn̄kpọ Bible. Eyenete kiet ama oyom nditọn̄ọ ukpepn̄kpọ Bible ke ini enye akanamde mfiakn̄ka, edi owo oro ikenyịmeke. Eyenete emi ama ada magazine eke ndondo oro afiak ebịne enye ọkọdọhọ ete, “Nnyịn isan̄a ibọrọ mbụme kiet ke Bible inọ mme owo mfịn.” Ke ete oro ama eketịn̄ ekikere esie, eyenete emi ama okot itie N̄wed Abasi kiet ye ikpehe ekikere emi enyenede ebuana ye itie N̄wed Abasi oro oto n̄wed emi ẹsidade ẹnịm ukpepn̄kpọ Bible. Emi ama ada ekesịm ukpepn̄kpọ Bible.
7. Didie ke ndinen̄ede ntịm idem akan̄wam fi nditọn̄ọ ukpepn̄kpọ Bible?
7 Ukeme oro isịnde ndida ini ntịm idem nnọ mfiakn̄ka odot. Nnyịn iyenen̄ede ikop idatesịt, imonyụn̄ ikeme ndinyene ifet ndin̄wam owo emi enyenede “eti esịt” odụk usụn̄ oro adade esịm uwem.—Utom 13:48.