Ke Ini Enyeneufọk Esemde Usem En̄wen
1. Ntak emi enen̄erede oyom edidianakiet ke ini ẹnamde utom ukwọrọikọ?
1 Ediwak ini, mme asuanetop Obio Ubọn̄ ke ofụri ererimbot ẹsisobo ye mbon oro ẹnyenede udọn̄ emi ẹsemde usem emi mîdịghe usem oro esop mmọ ẹsemde. Man ẹn̄wam utọ mbon oro ke n̄kan̄ eke spirit, ediwak n̄kọk itieutom ẹkụt ke ọfọn ndisiak mme otu ye mme esop emi ẹsemde usem en̄wen. Sia ẹkemede ndisem ediwak usem ke efak kiet, nsio nsio esop emi ẹsemde nsio nsio usem ẹkeme ndikwọrọ ikọ ke ukem efakutom. Didie ke mme esop emi ẹkpediana kiet man ẹkụt ẹte ke ẹkwọrọ ikọ ke ndutịm?—1 Cor. 14:33.
2. Ke ini ikwọrọde ikọ ke ufọk ke ufọk, didie ke ikeme ndidiana kiet ye otu m̀mê esop emi ẹsemde usem en̄wen ke n̄kann̄kụk nnyịn?
2 Edidianakiet: Ke ini asuanetop anamde utom efak m̀mê ọnọde ikọ ntiense ido nneme, enye ekeme ndikwọrọ ikọ nnọ owo ekededi, esịnede mbon oro ẹsemde usem en̄wen onyụn̄ ọnọ n̄wed ke usem emi owo oro amade ndikot. Edi, ke ini asuanetop ọkwọrọde ikọ ke ufọk ke ufọk ke efakutom oro otu m̀mê esop efen ẹsitienede ẹkwọrọ, enye ekpenyene ndiwụk ntịn̄enyịn ke ufọk mbon oro ẹsemde usem esop oro enye abuanade. Ke ini nsio nsio esop ẹkwọrọde ikọ ke ukem efakutom, enen̄ede ọfọn ndinyene eti n̄wetnnịm n̄kpọ. Mme esenyịn utom ẹkpenyene ndinyene nneme ye kiet eken ẹnyụn̄ ẹnam ndutịm emi ọfọnde ye kpukpru owo. (N̄ke 11:14) Nte ededi, edieke asuanetop osobode ye owo emi esemde usem en̄wen ke ini enye ọkwọrọde ikọ ke ufọk ke ufọk ndien esop ndomokiet emi esemde usem oro idụhe ke mbọhọ oro, enye ekpenyene ndidomo ndinọ ikọ ntiense nnyụn̄ n̄ka iso n̄n̄wam owo emi enyenede udọn̄.
3. Didie ke nnyịn ikpanam n̄kpọ ke ini ikụtde mme asuanetop emi ẹtode otu m̀mê esop emi ẹsemde usem en̄wen ẹkwọrọde ikọ ke efakutom emi nnyịn isụk ikwọrọde?
3 Ukem Utom: Didie ke ẹkpenam n̄kpọ ke ini mme asuanetop emi ẹtode nsio nsio esop ẹkwọrọde ikọ ke ukem efakutom ke ukem usen? Edi akpanikọ ke ima Christian idiyakke usem edi mfịna, ndien se ikpenen̄erede ibehe kpukpru owo ekpedi udọn̄ mbon oro ẹdude ke efakutom oro. (John 13:34, 35) Mmọdo, mbon oro ẹdade usụn̄ ẹkpenyene ndiwụt eti ibuot ye ima ke ndibiere m̀mê otu kiet ẹkpenyene ndiwọrọ kan̄a n̄ka efakutom efen.—Jas. 3:17, 18.
4. Ewe ntịn̄nnịm ikọ osu mfịn?
4 Bible ama ebem iso etịn̄ ete ke mme owo emi ẹsemde nsio nsio usem ẹyekop eti mbụk. (Edi. 14:6, 7) Edieke kpukpru mbon oro ẹbuanade ẹdianade kiet, nsio nsio otu m̀mê esop idibiatke ini ikwọrọ ikọ ke ukem ufọk oro mbon efen ẹma ẹkedodụk, ẹyenyụn̄ ẹda eti mbụk ẹsọk ediwak mbufa owo, esịnede mbon oro ẹsemde usem en̄wen.—Eph. 4:16.