Ekebe Mbụme

◼ Nte odot otuowo ndikwak ubọk ke ikpehe kiet kiet okụrede ke Ufọkn̄wed Utom Ukara Abasi ye Esoputom?

Ke ini Jehovah, kpa Andibot, akanamde ererimbot, ‘mme ntantaọfiọn̄ usenubọk ẹma ẹkwọ uyo kiet, kpukpru nditọ Abasi ẹnyụn̄ ẹsio n̄kpo.’ (Job 38:7) Ama ọdọn̄ nditọ Abasi emi m̀mê mme angel nditoro Jehovah ke n̄wọrọnda utom edibotn̄kpọ esie, emi ekedide obufa usụn̄ ediwụt ọniọn̄, mfọn, ye odudu esie.

Ọfọn nnyịn ndinen̄ede n̄wụt esịtekọm ke ukeme oro nditọete nnyịn ẹsịnde ke utịn̄ikọ ye nnamn̄wụt mmọ. Ke uwụtn̄kpọ, nnyịn imesikwak ubọk ke utịn̄ikọ, nnamn̄wụt, ye mme ndụn̄ọde oro ẹsinamde ke san̄asan̄a mboho, utọ nte ke n̄kpri ye ikpọ mbono. Esida ediwak ini ye akwa ukeme nditịm idem nnọ mme edinam itie mbono. Nnyịn ndikwak ubọk esiwụt esịtekọm oro iwụtde iban̄a eti utom oro etịn̄ikọ akanamde ye item oro Jehovah adade Ikọ ye esop esie ọnọ.—Isa. 48:17; Matt. 24:45-47.

Nso kaban̄a ndikwak ubọk ke ini ẹkụrede ikpehe kiet kiet ke Ufọkn̄wed Utom Ukara Abasi ye ke Esoputom? Inyeneke se idiọkde ye owo ndikwak ubọk edieke emi otode esịt, utọ nte ke ini eyen ufọkn̄wed anamde akpa n̄kpọ oro ẹnọde enye ke ufọkn̄wed. Nte ededi, ndikwak ubọk ekeme ndikabade ntie eto eto, anamde ẹfre se isikam inamde ẹkwak ubọk. Mmọdo, nnyịn isikwakke ubọk ke kpukpru utịn̄ikọ.

Okposụkedi emi nnyịn mîsikwakke ubọk ke ata ediwak ikpehe Ufọkn̄wed Utom Ukara Abasi ye ke Esoputom, mme usụn̄ efen ẹdu emi kpukpru nnyịn ikemede ndiwụt esịtekọm mban̄a item oro ẹnọde ye ukeme oro mme andinam n̄kpọ emi ẹkesịnde. Nnyịn imekeme ndinam emi ebe ke ndidu ke edidemede nnyụn̄ nnen̄ede n̄kpan̄ utọn̄ nnọ mme etịn̄ikọ. Ndien ke mbono esop ama akasuana, nnyịn owo kiet kiet imesinyene ifet ndika n̄kọkọm eyenete oro ẹkenọde n̄kpọ anam ke ukeme oro enye ekesịnde.—Eph. 1:15, 16.