Leta Otode Otu Ukara
Ndima Ekemmọ Mme Ntiense Jehovah:
Apostle Paul ama esida kpukpru ifet oro enye ekenyenede ọkọm ekemmọ mme andinịm ke akpanikọ onyụn̄ owụt ke imama mmọ. Enye ekewet ọnọ mme Christian ke Rome ete: “Mmọnọ Abasi mi ekọm ebe ke Jesus Christ mban̄a kpukpru mbufo, koro ẹtịn̄ ẹban̄a mbuọtidem mbufo ke ofụri ererimbot.” (Rome 1:8) Ke akpanikọ, mme owo ke ofụri Obio Ukara Rome ẹma ẹtịm ẹfiọk ọkpọsọn̄ mbuọtidem oro mme Christian akpa isua ikie emi ẹkenyenede, ọkọrọ ye ifịk ifịk utom ukwọrọikọ mmọ. (1 Thess. 1:8) Ntak edi oro Paul ekenen̄erede ama nditọete esie ntre.
Ukem nte Paul, nnyịn imesikọm Jehovah kpukpru ini oro nnyịn itide mbufo. Nnyịn imama kpukpru mbufo etieti! Ẹfiọk n̄ko ẹte ke Jehovah ama mbufo owo kiet kiet. Ndusụk mbufo ke ẹsobo ọkpọsọn̄ ubiọn̄ọ, edi ke ẹka iso ẹkwọrọ ikọ. Uko oro mbufo ẹnyenede enen̄ede adat Jehovah esịt.—N̄ke 27:11.
Nte mbufo ẹtịn̄de enyịn ẹkot ẹnyụn̄ ẹtiede ẹkere ẹban̄a ikpehe Yearbook oro ọsọn̄ọde mbuọtidem nnyịn emi ọdọhọde “Acts of Jehovah’s Witnesses in Modern Times” (“Utom Mme Ntiense Jehovah ke Eyomfịn”), mbufo ẹyekụt ekese uyarade nte ke Ọbọn̄ Jesus Christ ke “ọwọrọ aka ndikan onyụn̄ okụre edikan esie,” ye nte ke baba n̄kpọekọn̄ kiet eke ẹbotde ẹban̄a mme anditiene Christ idikwe unen.—Edi. 6:2; Isa. 54:17.
Paul ekewet mme Christian ke Philippi ete: “Mmesikọm Abasi mi . . . ke ntak se mbufo ẹketịpde ẹsịn kaban̄a eti mbụk.” (Phil. 1:3-5) Nnyịn mbon Otu Ukara imọkọm mbufo n̄ko ke se mbufo ẹnamde. Ke isua utom 2007, mme asuanetop 6,691,790 ke ofụri ererimbot ẹkebiat hour 1,431,761,554 ẹkwọrọ eti mbụk ke idụt 236 ke ofụri ererimbot. Nso akwa ukeme ke mbufo ẹsịn ntem ndika iso ntan̄a eti mbụk! Ẹkam ẹkere ẹban̄a ata ediwak owo oro utom ukwọrọikọ nnyịn an̄wamde, ndien kpukpru emi ada itoro ọsọk Jehovah!
Isan̄ en̄wen, Paul ama owụt ke imọ imenen̄ede ikere iban̄a nditọete imọ. Enye ekewet leta ọnọ ẹsọk mbon oro ẹkedude ke Thessalonica ete: ‘Nnyịn itreke nditi ime mbufo oto ke ntak idotenyịn mbufo ke Ọbọn̄ nnyịn Jesus Christ ke iso Abasi ye Ete nnyịn.’ (1 Thess. 1:2, 3) Edi akpanikọ ke uwem enen̄ede ọsọn̄. Mme mfịna ẹsidemede, edi ana iyọ mmọ. Nso idi mme mfịna oro afo osobode? Nte omokop mmemidem ke ntak oro idiọk udọn̄ọ mîyakke anam se akpamade ndinam ke utom Jehovah? Ndi n̄kpa ada edima ebe m̀mê n̄wan fo emi okodụn̄de kiet ke ediwak isua? (N̄ke 30:15, 16) Kpa ye oro ọsọn̄de fi ndikụt nsan̄a ndọ oro amade Jehovah, nte afo ke ọsọn̄ọ ada anam item N̄wed Abasi emi ọdọhọde ẹdọ owo ke Ọbọn̄ ikpọn̄-ikpọn̄? (1 Cor. 7:39) Nte afo ke odomo ndibọk nditọ fo kpa ye oro n̄kpọ enen̄erede ọsọn̄? Inamke n̄kpọ m̀mê n̄kpọ etie didie ye afo, edieke enịmde mme n̄kpọ Obio Ubọn̄ akpa, tịm fiọk ete ke Jehovah ‘idifreke utom ye ima eke afo owụtde aban̄a enyịn̄ esie.’ Mbọk nditọete, ‘ẹkûkpa mba ke edinam se ifọnde’!—Heb. 6:10; Gal. 6:9.
Nso idin̄wam fi ọyọ? Ukem nte ekedide ye mbon Thessalonica, ‘idotenyịn nnyịn ke Ọbọn̄ nnyịn Jesus Christ’ edin̄wam fi. Ntak edi oro Paul ekemende “idotenyịn edinyan̄a” odomo ye ndụn emi ekemede ndikpeme Christian nsio ke idiọk ekikere ye eyịghe.—1 Thess. 5:8.
Ke akpanikọ, edieke ọyọde ke idatesịt, afo ọyọnọ Jehovah se Enye edibọrọde Satan ke akwa eneni aban̄ade unen oro Jehovah enyenede ndikara ofụri ekondo. Satan ọdọhọ ke mme asan̄autom Abasi ẹdada ibụk ẹmana ye nte ke okposụkedi emi mmọ ẹnyịmede ndinam n̄kpọ Abasi ke ekpri ibio ini, mmọ ẹyetek ke ifịk ke utuakibuot mmọ edieke idomo ọsọn̄de ubọk mîdịghe edieke editịm n̄kpọ emi ebịghide akan nte mmọ ẹkekerede. Afo emenyene ifet ndiwụt ke Devil edi akwa osu nsu! Usen kiet kiet oro afo odude uwem anam fi asan̄a ekpere ini oro ẹdinọde fi edidiọn̄ oro afo odoride enyịn aban̄a.
Ukem nte Paul akadade mme ifet oro enye ekenyenede otoro nditọete esie ke ọkpọsọn̄ mbuọtidem mmọ, ke mmọ ndibuana ọyọhọ ọyọhọ ke utom ukwọrọikọ, ye ke ime mmọ, enem nnyịn ndida ifet emi ntoro mbufo nnyụn̄ nnam mbufo ẹfiọk ke imama mbufo. Ẹka iso ke nti utom mbufo!
Isua emi akpakam ọyọhọ ye akpakịp edidiọn̄ Abasi. Jehovah akpakam odu ye mbufo. Nnyịn
Nditọete mbufo,
Otu Ukara Mme Ntiense Jehovah