Ẹkpep Ikọ Abasi nte Ubon
1 Jehovah esiti mme ibuot ufọk ndien ndien ete ẹkpep nditọ mmọ n̄kpọ. Enye ama ọdọhọ Abraham esikpep ikọtufọk esie n̄kpọ man mmọ “ẹkpeme usụn̄ Jehovah.” (Gen. 18:19) Ẹma ẹwụk mme ete ye eka ke Israel ẹte ẹkpep nditọ mmọ n̄kpọ kpukpru ini. (Deut. 6:6, 7) Ẹteme mme ete ye eka ẹdide mme Christian ẹte ẹkama nditọ mmọ “ke ntụnọ ye ke usụn̄ ukere n̄kpọ Jehovah.” (Eph. 6:4) Nte afo ke anam emi ebe ke ndinịm ukpepn̄kpọ ubon kpukpru ini? Ọkpọkọm ete m̀mê eka kpọt odu ke akpanikọ, enye ekpenyene ndinịm ukpepn̄kpọ ubon. Edieke ebe ye n̄wan mînyeneke nditọ, mmọ ẹkpenyene ndikpep n̄kpọ ọtọkiet.
2 Ini Ukpepn̄kpọ: Ọfọn kpukpru mme andibuana ke ubon ẹnyịme ini oro edifọnde akan ndinịm ukpepn̄kpọ ubon. Ndusụk ubon ẹsima ndinịm ukpepn̄kpọ emi ke usenubọk ke ini mmọ ẹdemerede ke idap, mbon en̄wen ke mbubịteyo ke ini kpukpru owo ẹdude ke ufọk. Mme idaha oro ẹdude ẹkeme ndinam ndusụk ubon ẹbiere ndinịm ukpepn̄kpọ emi ini kiet ke urua; mbon en̄wen ẹkeme ndinyene mbio mbio ini ukpepn̄kpọ kpukpru usen. Nam ini ukpepn̄kpọ ekekem ye isua emana nditọwọn̄. Ke adan̄aemi ọfọnde ndinam mme ukpụhọde, domo ukeme ndinyene akpan ndutịm. Kpukpru mme andibuana ke ubon ẹkpenyene ndidụk nnyụn̄ n̄kop nduaidem nditiene mbuana.
3 N̄wed Oro Ẹkpekpepde: Ẹmekeme nditịm idem ọtọkiet nnọ Ukpepn̄kpọ Enyọn̄-Ukpeme m̀mê Ukpepn̄kpọ N̄wed Esop. Afo emekeme ndikama n̄wed oro Kpep N̄kpọ to Akwa Andikpep mîdịghe n̄wed Mme Mbụk Bible ekpep nditọwọn̄ n̄kpọ. Emekeme ndikama n̄wed N̄kparawa Owo Ẹbụp ye mme ibuotikọ ndondo emi ke Awake! n̄kpep mme uyen n̄kpọ. Ke ini akpan n̄kpọ odude ndineme, utọ nte mme idaha ẹdude ke ufọkn̄wed m̀mê idiọk edu uwem, mek ibuotikọ oro ekemde ye se oyomde ndineme. Kpukpru ini, nam mbonubon ẹbem iso ẹdiọn̄ọ n̄wed oro ẹdikpepde. Ekem fiak ka n̄wed oro ẹsikpepde. Kụt ete ke owo kiet kiet ke ubon oro ekemede ndikot n̄wed enyene Bible ye n̄wed oro ẹdikpepde. Ọkpọkọm ete ye eka idiọn̄ọke ndikot n̄wed nnyụn̄ n̄wet n̄kpọ m̀mê itịmke inyene ifiọkn̄wed, nditọ mmọ ẹkeme ndikot n̄wed ke ini ukpepn̄kpọ. Nditọ ikpenyeneke ndise mme ete ye eka mmọ oro mîkakaha n̄wed ke usụhọde. Ẹti ẹte ke Ephesus 6:2 ọdọhọ ete: “‘Kpono usọ ye uka’; emi edi akpa ibet eke asan̄ade ye un̄wọn̄ọ.”
4 Nam Ukpepn̄kpọ Oro Enyene Ufọn Onyụn̄ Enem: Nam ukpepn̄kpọ oro etie ifụre ifụre edi enyene uku man ekikere nditọwọn̄ ẹkeme ndina sụn̄ ndibọ ukpep. Enye ikpenyeneke nditie nte ọnọ utịn̄ikọ m̀mê nte ikpehe mbụme ye ibọrọ. Enye ekpenyene ndidi inem inem ini unọ ukpep! Bụp mme mbụme ndausụn̄ ye mme mbụme ẹdade ẹfiọk ekikere owo man osio mme edumbet Bible owụt, anamde nditọ ẹnọ ibọrọ ifụre ifụre. Idịghe andikpep ikpọn̄ ekpetịn̄ kpukpru ikọ. N̄ko kûda ini ukpepn̄kpọ ubon utụnọ nditọwọn̄ m̀mê ndinọ mmọ ufen.
5 Uduak nnyịn ke ndinịm ukpepn̄kpọ ubon abuana: ndinam ẹkọri ima ẹnọ Jehovah, ndin̄wam ẹnyene nnennen ifiọk ẹban̄a se Abasi oyomde, nnyụn̄ n̄n̄wam ẹda se ẹkpepde ẹsịn ke edinam. Domo ndinam nditọ fo ẹsiwụt esịtekọm ẹban̄a kpukpru n̄kpọ oro Jehovah anamde ọnọ nnyịn. Kụt ete ke se ekpepde an̄wan̄a mmọ. N̄wam mmọ ẹkụt nte mme n̄kpọ oro ẹkpepde ẹnyenede ufọn man onụk mmọ ndinam mme ukpụhọde oro ẹyomde ke edu uwem mmọ.
6 Edieke mûsunịmke ukpepn̄kpọ ubon kan̄a, ntak mûdiomike nditọn̄ọ enye mbemiso utịt ọfiọn̄ emi-e? Nte afo ọbọn̄de akam aban̄a ukeme fo ndika iso nnam kpukpru se ẹnemede mi, afo emekeme ndidori enyịn ke Jehovah ọyọdiọn̄ ubon fo nte afo ekpepde mmọ “ẹkpeme usụn̄ Jehovah.”