Ekebe Mbume

◼ Ini ewe ndien didie ke ẹkpenọ mme mbụme N̄wed Abasi ẹsọk n̄kọk itieutom?

Kpukpru isua ẹsibụp n̄kọk itieutom Nigeria ediwak tọsịn mbụme ẹban̄a nsio nsio n̄kpọ m̀mê ẹyom item ke nte ẹkpekọkde mme mfịna. Ẹsida mme leta ye urụk ukopikọ ẹbụp mme mbụme ẹnyụn̄ ẹyom mme item emi. Nnyịn imesinem esịt ndin̄wam nditọete nnyịn ke mme ini nnanenyịn. Nte ededi, ke ediwak idaha, ẹkeme ndise mban̄a mme mfịna emi ye unana ẹdiwet m̀mê ẹdikot n̄kọk itieutom. Ediwak mbụme oro ẹbụpde ẹsiban̄a mme n̄kpọ oro ẹma ẹkeneneme ata ọyọhọ ọyọhọ ke mme n̄wed nnyịn, ndien mbiowo n̄kann̄kụk oro ẹmehede ye mme idaha n̄kann̄kụk ẹdu ke mfọnn̄kan idaha ndise mban̄a ediwak mfịna oro ẹsiwetde ẹyom un̄wam.

Mmọdo, ke ini enyenede mbụme, nnyịn isịn udọn̄ inọ fi ite ebem iso oyom ibọrọ ke mme n̄wed nnyịn ebe ke ndika mme ikpehe ibuotikọ ye mme ikpehe N̄wed Abasi ke Watch Tower Publications Index. Ndinam n̄kpọ ke usụn̄ emi an̄wam kpukpru owo ndibiom mbiomo idemmọ, emi edide ndinam ubiere oro ekemde ye ndausụn̄ oro Jehovah ọnọde. (Gal. 6:5) Edieke oyomde un̄wam ke nte akpadade Index oyom ntọt, kûmen̄e ndidọhọ ebiowo oro odude ke n̄kann̄kụk mbufo, mîdịghe esenyịn oro asan̄ade-san̄a an̄wam fi oyom ibọrọ mbụme fo.

Adianade do, ke ini enyenede mfịna oro oyomde owo ọnọ fi item, ọkpọfọn ebem iso oyom item oto mbiowo n̄kann̄kụk. Nditọete emi ẹdiọn̄ọ fi ẹnyụn̄ ẹdiọn̄ọ mme idaha fo; ndien nte ido edide, mmọ ẹdu ke eti idaha ndida Ikọ Abasi nnọ fi item. (Men Mme N̄ke 27:23 domo.) Ti ete ke mbiowo ẹdi enọ otode Jehovah man ẹsin̄wam mme owo ke n̄kan̄ eke spirit.—Isa. 32:1, 2; Jer. 23:4.

Edieke anamde ofụri emi edi n̄kpọ isụk in̄wan̄ake fi mîdịghe unyeneke item oro oyomde, mîdịghe edieke mfịna oro osụk akade iso ndien afo enyene eti ntak ndikere ke imọ imoyom un̄wam efen efen, do afo emekeme nditịn̄ n̄kpọ oro nnọ n̄kọk itieutom. Ọkpọfọn ewewet emi ke leta onyụn̄ etịn̄ kpukpru n̄kpọ in̄wan̄-in̄wan̄. Edieke ebierede ndiwet, nnyịn inọ ekikere ite anam se itienede mi: wet enyịn̄ fo, esop fo, ye enyịn̄ (mme) owo ekededi emi ẹbuanade nnennen nnennen ke n̄kpọ oro. Owo idibọrọke leta oro enyịn̄ mîdụhe. Kûtie utịbi mbụme ubụp. Yak se ewetde edi nnennen, kûtịn̄ se ekerede-kere, kûnyụn̄ uwet mme n̄kpọ oro mînyeneke ebuana ye se ewetde aban̄a. Tịn̄ se afo akanamde kan̄a ndikọk mfịna oro ye ntak ekerede ke imọ ikwe unen. Ẹyesịn ukeme ndiwụt mme edumbet Bible oro ẹnyenede ebuana. Edieke ewetde n̄kpọ aban̄a item oro mbiowo ẹkenọde, ọkpọfọn ọnọ mmọ leta oro n̄ko. Mbọk kûkot ke urụk ukopikọ ibọhọke enye edi n̄kpọ oro oyomde ibọrọ ata usọp usọp.