Ekebe Mbụme

◼ Nte “ofụn emi anamde akpanikọ onyụn̄ enyenede ọniọn̄” enyịme otu Mme Ntiense ẹtie ke idemmọ ẹnam ndụn̄ọde ke N̄wed Abasi m̀mê ẹneme nsio nsio ekikere oro mmọ ẹnyenede?—Matt. 24:45, 47.

Baba-o, inyịmeke. Edi ke nsio nsio ikpehe ererimbot, ibat ibat mme andibuana ke esop nnyịn ẹsiak mme otu man ẹtie ke idemmọ ẹnam ndụn̄ọde ke mme ibuotikọ Bible. Ndusụk ẹnyene otu oro mmọ ẹsitiede ẹdụn̄ọde usem Hebrew ye Greek oro ẹkedade ẹwet Bible man ẹse m̀mê New World Translation enen. Mbon en̄wen ẹsidụn̄ọde mme ukpepn̄kpọ ifiọk ntaifiọk oro ẹnyenede ẹbuana ye Bible. Mmọ ẹsiak mme ikpehe ye mme itie unyene nneme ke Intanet man ẹneme nsio nsio ekikere mmọ. Mmọ ẹsinyene mboho ẹnyụn̄ ẹmịn̄ mme n̄wed ndiwụt se ndụn̄ọde mmọ ẹwụtde nnyụn̄ nnam se ẹnọde ke mme mbono esop Christian ye ke n̄wed nnyịn an̄wan̄a.

Ke ofụri ererimbot, ikọt Jehovah ẹsibọ akpakịp item ye nsịnudọn̄ eke spirit ke mme mbono esop, n̄kpri ye ikpọ mbono, ọkọrọ ye ke mme n̄wed oro esop Jehovah osion̄ode. Jehovah ada edisana spirit ye Ikọ akpanikọ esie ọnọ ikọt esie se mmọ ẹyomde man mmọ “ẹdiana kiet ke ekikere kiet ye ke usụn̄ ukere n̄kpọ kiet” ẹnyụn̄ “ẹsọn̄ọ ẹda ke mbuọtidem.” (1 Cor. 1:10; Col. 2:6, 7) Ke akpanikọ, nnyịn imenen̄ede ikọm Jehovah ke mme n̄kpọ eke spirit oro enye ọnọde nnyịn ke mme utịt usen emi. Ntre, “ofụn emi anamde akpanikọ onyụn̄ enyenede ọniọn̄” inyịmeke n̄wed, mboho, m̀mê ikpehe Intanet ekededi oro mîdịghe enye osio m̀mê ọnọ ndausụn̄.—Matt. 24:45-47.

Ẹtoro mbon oro ẹyomde ndida ukeme ukere n̄kpọ mmọ nsịn ke ndikwọrọ eti mbụk. Nte ededi, ọkpọkpọ ukeme ndomokiet ikpenyeneke ndiwọn̄ọde ntịn̄enyịn n̄kpọn̄ se Jesus adade esop esie anam mfịn ke isọn̄. Ke akpa isua ikie, apostle Paul ama odụri owo utọn̄ ete owo ẹkûsịn idem ke nnyan ibuot nneme oro adiade ini, utọ nte “mbụk udịm ubon, emi mînyeneke ufọn, edi emi ẹdemerede mme mbụme ndida nnam ndụn̄ọde utu ke ndideme n̄kpọ ekededi oro otode Abasi emi aban̄ade mbuọtidem.” (1 Tim. 1:3-7) Kpukpru mme Christian ẹkpenyene ‘ndifep idem ke ndisịme eneni ye mme mbụk emana ye utọk ye en̄wan kaban̄a Ibet, koro mmọ mîdoroke owo udori mînyụn̄ iwọrọke n̄kpọ.’—Titus 3:9.

Nnyịn isịn udọn̄ inọ mbon oro ẹyomde ndikpep n̄kpọ nnyụn̄ nnam ndụn̄ọde efen efen mban̄a Bible, ndidụn̄ọde Insight on the Scriptures, “All Scripture Is Inspired of God and Beneficial,” ye mme n̄wed nnyịn eken, utọ nte mbon oro ẹnemede mme ntịn̄nnịm ikọ Bible oro ẹdude ke n̄wed Daniel, Isaiah, ye Ediyarade. Mme n̄wed emi ẹdọn̄ọ ata ediwak n̄kpọ ndida n̄kpep Bible nnyụn̄ ntie n̄kere n̄kpọ emi ẹkemede ndinam nnyịn ‘iyọhọ ye nnennen ifiọk uduak Abasi ke kpukpru ọniọn̄ ye ifiọk eke spirit, man isan̄a nte odotde Jehovah inem enye esịt ọyọhọ ọyọhọ nte nnyịn ikade iso in̄wụm mfri ke kpukpru nti utom inyụn̄ ikọride ke nnennen ifiọk Abasi.’—Col. 1:9, 10.