Nte Afo Emesitịn̄ N̄kpọ Aban̄a Ikọ Abasi?
1 Ata mme Christian ẹsitịn̄ n̄kpọ ifịk ifịk ẹban̄a Ikọ Abasi ke ererimbot emi mme owo ẹsiwakde nditịn̄ ikọ mbiat Bible. Sia inịmde ke “Abasi ọkọnọ odudu ẹda ẹwet ofụri N̄wed Abasi,” nnyịn imenyịme ye se Jesus Christ ọkọdọhọde ke ini enye ọkọbọn̄de akam ọnọ Jehovah ete: “Ikọ fo edi akpanikọ.” (2 Tim. 3:16; John 17:17) Didie ke nnyịn ikeme nditịn̄ n̄kpọ mban̄a Ikọ Abasi uforo uforo?
2 Kpep N̄wed Abasi: Nte eyịghe mîdụhe, Jesus ama esikpep Ikọ Abasi. Emi ama anam enye ekeme ndida se idude ke N̄wed Abasi n̄kpep mme owo n̄kpọ ke ofụri ini utom ukwọrọikọ esie. (Luke 4:16-21; 24:44-46) Didie ke nnyịn ikeme ndimụm ediwak itie N̄wed Abasi ndọn̄ ke ibuot? Inam ntre ebe ke ndikot Bible kpukpru usen nnyụn̄ ntie n̄kere ufan̄ikọ oro enen̄erede ọnọ nsịnudọn̄ m̀mê enye oro ikemede ndida n̄n̄wam mme owo ke an̄wautom. Ke ini itịmde idem inọ mme mbono esop, nnyịn ikpenyene ndikot mme itie N̄wed Abasi oro ẹsiakde ẹsịn nnennen ke Bible, imonyụn̄ ikeme ndiwet ikọ ifan̄ oro ididade itịn̄ iban̄a mmọ. Ke ini idụkde mme mbono esop, nnyịn ikpenyene nditiene nse Bible nnyịn ke ini etịn̄ikọ okotde mme itie N̄wed Abasi. Ndidiọn̄ọ mme itie Bible ayanam idu ke mben̄eidem ‘nditịm nsiak ikọ akpanikọ.’—2 Tim. 2:15.
3 Yak Bible Etịn̄ Ikọ: Nnyịn ikpenyene ndiyak Bible etịn̄ ikọ ke adan̄aemi idude ke an̄wautom. Ke uwụtn̄kpọ, edieke idaha ayakde, nnyịn ikpenyene ndidomo ukeme ndikot itie N̄wed Abasi kiet nnọ enyeneufọk. Edieke enye obụpde mbụme m̀mê afan̄ade n̄kpọ, se ifọnde ikan edi ndida Bible nnọ ibọrọ. Edieke enyeneufọk mînyeneke ini, nnyịn imekeme ndisụk nnam se Bible ọdọhọde an̄wan̄a ebe ke ndidọhọ, “Mbemiso nnyọn̄de, mbọk yak n̄kot itie N̄wed Abasi kiet emi nnọ fi.” Kot Bible nnennen nnennen ini ekededi oro afo ekemede, ayakde owo oro afo etịn̄de ikọ ọnọ etiene ese Bible ke ini okotde.
4 Ke ini ẹkewụtde enyeneufọk kiet itie N̄wed Abasi oro owụtde ke ukpepn̄kpọ Abasi-Ita-ke-Kiet inenke, enye ama ofiori ete, “Mmaka ufọkabasi ke ofụri eyouwem mi, edi ke akpanikọ n̄kọfiọkke ke Bible etịn̄ ikọ eke etiede ntem!” Enye ama ọsọsọp enyịme ukpepn̄kpọ Bible. Jesus ọkọdọhọ ke mme erọn̄ imọ ẹkop uyo imọ. (John 10:16, 27) Mfọnn̄kan usụn̄ mbon esịt akpanikọ ndifiọk akpanikọ edi ndikụt enye nnennen nnennen ke N̄wed Abasi. Ẹyak nnyịn ke ntre isitịn̄ n̄kpọ iban̄a Ikọ akpanikọ Abasi!