“Ẹka Iso Ẹnam Emi Nditi Mi”
Ẹyeti N̄kpa Jesus ke April 2
1. Ntak emi April 2, 2007, edide akpan usenọfiọn̄-ọ?
1 Ediwak miliọn owo ke ofụri ererimbot ẹyesop idem ọtọkiet man ẹti n̄kpa uwa Jesus ke April 2, 2007. Jesus akakpa koro enye ọkọsọn̄ọde omụm unen itie edikara Ete esie eke heaven akama, owụtde ke Satan kpa Devil okosu nsu ke ndikọdọhọ ke ubonowo ẹnam n̄kpọ Abasi n̄kukụre ke ntak ibụk. (Job 2:1-5) Udia Mbubịteyo Ọbọn̄ eti nnyịn n̄ko ke Jesus ‘ama ọnọ ukpọn̄ esie nte ufak ke ibuot ediwak owo’ koro enye akakpa nte mfọnmma owo oro mîkanamke idiọkn̄kpọ. (Matt. 20:28) Ke ntre, Jesus ama owụk mme mbet esie ete: “Ẹka iso ẹnam emi nditi mi.” (Luke 22:19) Nte esịtekọm oro afo enyenede ọnọ ọsọn̄urua enọ Abasi emi onụk fi nditọn̄ọ idahaemi nnam ntịmidem man eti akakan edinam ima emi?—John 3:16.
2. Didie ke ikeme nditịm esịt nnyịn nnọ Editi?
2 Tịm Esịt Fo: Imekeme nditịm esịt nnyịn nnọ Editi emi, edieke idụn̄ọrede se iketịbede ke usen kiet kiet ke mme akpatre usen uwem Jesus nte owo. (Ezra 7:10) Man an̄wam nnyịn ke ndụn̄ọde emi, ẹnam ndutịm ẹnọ san̄asan̄a edikot Bible ke Ẹdụn̄ọde N̄wed Abasi—2007 ye ke 2007 Calendar. Ndutịm edikot Bible emi asan̄a ukem ukem ye mme usen oro mme n̄kpọntịbe emi ẹkedade itie ke ini n̄kpa Jesus, nte ekemde ye n̄wed usenọfiọn̄ oro ikamade idahaemi. Mme usen ye mme usenọfiọn̄ oro ẹtịn̄de ẹban̄a ke mbụk Bible emi ẹkọn̄ọ ke n̄wed usenọfiọn̄ mme Jew, oro usen mmọ esitọn̄ọde ke utịn ama okosụhọde tutu esịm ini oro utịn osụhọrede ke edem usen. Ukem usụn̄ ubat usen emi ke ẹtiene ke ndutịm edikot Bible ini Editi emi. Ndidụn̄ọde utọ ntọt oro nnyụn̄ ntie n̄kere mban̄a ntotụn̄ọ ima Abasi nnyụn̄ n̄kọbọ ke akam ayan̄wam nnyịn ndibọ ufọn ọyọhọ ọyọhọ nto Editi.
3. Didie ke ikeme ndin̄wam mbon oro ẹnyenede udọn̄ ye mbon oro mîwọrọke an̄wautom aba ẹbọ ufọn ẹto Editi?
3 Kot Mbon Efen Ẹtiene Ẹdidụk: Esịne-esịt Utom Obio Ubọn̄ Nnyịn eke February ọtọt san̄asan̄a ubịnikọt ndinọ mme owo ikot ẹtiene ẹdidụk akpan edinam emi. Nte afo amanam ndutịm man etiene abuana ọyọhọ ọyọhọ ke ubịnikọt emi? Nte emewet enyịn̄ mme ọdiọn̄ọ fo oro oyomde ndikot, n̄ko nte ọmọtọn̄ọ ndisobo ye mmọ? Nam ndutịm ndibabak ndu ke mbubịteyo usen Editi oro, man adara mbon oro afo okokotde ọkọrọ ye mbon en̄wen oro ẹnyenede udọn̄. Emekeme nditie ye mmọ onyụn̄ okụt ete ke mmọ ẹkama Bible ye n̄wedikwọ. Men mmọ wụt mbon eken ke esop. Ke edinam oro asuanade, domo ukeme ndibọrọ mme mbụme mmọ. Kot mmọ ẹtiene ẹdidụk akpan utịn̄ikọ an̄wa oro ẹdinọde ke April 15. Mbiowo akpan akpan ẹkpenyene ndikụt ke ẹkot mbon oro ẹkesibuanade ye esop, edi mîwọrọke an̄wautom aba ẹdidụk Editi ye akpan utịn̄ikọ an̄wa.
4. Didie ke nnyịn ikeme ndin̄wam mme owo ẹka iso ẹnam n̄kọri ke n̄kan̄ eke spirit ke Editi ama ekebe?
4 N̄wam Mbufa Mbon Oro Ẹnyenede Udọn̄ ye Mbon Oro Mîwọrọke An̄wautom Aba Ẹnam N̄kọri: Andinọ utịn̄ikọ Editi eyetịn̄ ibio ibio aban̄a ndutịm ukpepn̄kpọ Bible oro isikpepde mme owo onyụn̄ esịn udọn̄ ọnọ mbufa mbon oro ẹnyenede udọn̄ ndika iso n̄kpep n̄kpọ mban̄a Jehovah. Afo emekeme ndida utịn̄ikọ esie nnọ mbon oro afo okokotde un̄wam efen efen ke n̄kan̄ eke spirit. Edieke mmọ mîtọn̄ọke ndikpep Bible kan̄a, kụt ete ke amafiak aka ebịne mmọ ke ndondo oro Editi ebede, nyụn̄ tọn̄ọ ukpepn̄kpọ Bible mfọn ye mmọ. Ana mmọ n̄ko ẹsidụk mme mbono esop man ẹnam n̄kọri ke n̄kan̄ eke spirit. (Heb. 10:24, 25) Sịn udọn̄ nọ mmọ ẹdụk kpukpru ini, man ẹkeme ndinam n̄kọri emi. Mbiowo ẹkpenyene ndika n̄kese nditọete oro mîwọrọke an̄wautom aba edi oro ẹkedụkde Editi, ẹnyụn̄ ẹsịn udọn̄ ẹnọ mmọ ndikere mban̄a utịn̄ikọ oro ẹkenọde ke Editi. Emi ekeme ndisịn udọn̄ nnọ mmọ ẹfiak ẹtọn̄ọ utom mmọ ke esop.
5. Nso ke Editi emi ekeme ndinụk nnyịn inam?
5 Editi ọnọ nnyịn ifet ndinen̄ede ntie n̄kere se Jehovah ye Jesus ẹkenamde ẹnọ nnyịn. Utọ editie n̄kere oro anam ima oro inyenede inọ mmọ enen̄ede okpon onyụn̄ otụk edu uwem nnyịn. (2 Cor. 5:14, 15; 1 John 4:11) Ini edi emi nditọn̄ọ ndinam ntịmidem eke idem nnyịn ye eke mbon oro ẹnyenede udọn̄ mben̄e akpan edinam emi, kpa ini emi ‘iditan̄ade n̄kpa Ọbọn̄.’—1 Cor. 11:26.