Ima Anam Nnyịn Ikụt Unen ke An̄wautom
1 “Ẹtiene mi, . . . ndien nyọnọ mbufo nduọkodudu.” (Matt. 11:28) Utọ ndinem ikọ emi ẹwụt ke Jesus ama enen̄ede ama mme owo. Nte mme asan̄autom Christian, ọdọn̄ nnyịn ndikpebe Jesus ke ndima mbon oro ererimbot unana ima emi efekde. Didie ke nnyịn ikeme ndinam emi ke ini itan̄ade eti mbụk?
2 Ke Ikọ: Ima oro Jesus ekenyenede ọnọ mme owo akanam enye esida ifet ekededi oro ebererede ọkwọrọ eti mbụk. (John 4:7-14) Edieke imade mme owo, nnyịn idimen̄eke ndinọ ikọ ntiense ke ido nneme. Eyenan̄wan isua itiokiet ama ọkwọrọ ikọ ọnọ n̄wan kiet emi eketiede ekpere enye ke ubet oro ẹsitiede ẹbet abiausọbọ. Nso ikanam enye ọnọ ikọ ntiense emi? Enye ọkọdọhọ ete: “N̄wan oro eketie nte owo emi akpamade ndifiọk Jehovah.”
3 Ndituak inua imam nnyụn̄ ntịn̄ ikọ inem inem ekeme ndiwụt ke imenyene udọn̄ ke idem mme owo. Ndikpan̄ utọn̄ n̄kop se mbon en̄wen ẹtịn̄de, ndidiọn̄ọ mfịna mmọ, ndinyụn̄ n̄wụt ke imenen̄ede ikere iban̄a mmọ, ẹyewụt n̄ko ke nnyịn imama mmọ. (N̄ke 15:23) Nnyịn ikpebe Jesus ke ndida etop Obio Ubọn̄ ndọn̄ mme owo esịt nnyụn̄ n̄wụt mmọ ke Jehovah enyene esịtmbọm.—Matt. 24:14; Luke 4:18.
4 Ke Edinam: Jesus ama esisọp an̄wam mme owo ke ata ata usụn̄. (Matt. 15:32) Nnyịn n̄ko imekeme ndinyene ifet ndifọn ido ye mme owo ke an̄wautom. Eyenete an̄wan kiet ama okụt n̄wan kiet an̄wanade ndifiọk se akpan etop oro ẹketobode enye ke urụk ukopikọ, ọwọrọde. Eyenete nnyịn ama akan̄wam n̄wan emi akabarede se andikot ẹketịn̄de ke urụk ukopikọ oro ọnọ enye. Eti edinam emi ama ada okosụn̄ọ ke nneme N̄wed Abasi emi akanamde n̄wan emi enyịme ukpepn̄kpọ Bible. Isan̄ en̄wen, eyenete eren oro akakade mfiakn̄ka, ama okụt ete kiet emi mîkekemeke ndidịbede akamba bed nsio ke enyịnusụn̄. Ke eyenete emi ama akan̄wam enye edịbede bed oro, ete oro ama ọkọm enye, ndien eyenete oro ama osụhọde etetie ke bed oro ọtọn̄ọ ukpepn̄kpọ Bible ye enye.
5 Nnyịn iwụt ke imama Abasi ye mbọhọidụn̄ nnyịn ke ini ibuanade ke an̄wautom. (Matt. 22:36-40) Ndiwụt emi ke ikọ ye ke edinam ayan̄wam mbon esịt akpanikọ ẹdiọn̄ọ ke nnyịn inyene akpanikọ.