Ekebe Mbụme

◼ Nte ọkpọfọn ẹdiomi mme edinam utịp okụk man ẹda ẹn̄wam esop?

Edi ọsọ n̄kpọ mme n̄ka ido ukpono ndidiomi mme utọ edinam utịp okụk nte usọrọ, edinyam n̄kpọ, m̀mê kọnsat. Okposụkedi ndusụk owo ẹkerede ke mme edinam emi ẹfọn, mmọ ẹdi usụn̄ ndida mben̄e okụk. Mme Ntiense Jehovah isidaha mme utọ usụn̄ emi inyene okụk.

Kop se udiana nsiondi Enyọn̄-Ukpeme (Ikọmbakara) eke August 1879, eketịn̄de mi aban̄a ntak emi nnyịn mîsitieneke mme ufọkabasi iben̄e okụk: “‘Nnyịn imenịm ke JEHOVAH ọnọ Zion’s Watch Tower ibetedem, ntem tutu amama enye idiben̄eke idinyụn̄ ikpehe owo ubọk iyom un̄wam. Ke ini Enye emi ọdọhọde ete: ‘Kpukpru gold ye silver ke ikpọ obot ẹnyene mi,’ etrede ndinọ okụk oro ẹyomde, nnyịn iyọfiọk adan̄aoro ite ke ini ekem nditre ndimịn̄ n̄wed emi.”

Nnyịn ke ika iso itiene edumbet N̄wed Abasi emi: “Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.” (2 Cor. 9:7) Ẹnịm mme ekebe etịbe ke Ufọkmbono Obio Ubọn̄ man mme owo ẹkeme ndisịn enọ unyịmesịt edieke mmọ ẹyomde. (2 Ndi. 12:9) Nnyịn isiben̄eke-ben̄e okụk, ndien ke ini inọde etịbe, nnyịn inọhọ ye ekikere nte ke ẹyenọ nnyịn usiene.