Ndinọ Ikọ Ntiense ke Ufọk ke Ufọk
1. Nso mbụme idemede iban̄a utom ukwọrọikọ eke ufọk ke ufọk, ndien ntak-a?
1 “Mbon oro ẹsidade nsio nsio usụn̄ ẹsuan Akpanikọ ẹyenyịme ke edida utom ukwọrọikọ eke ufọk ke ufọk nsuan MILLENNIAL DAWN edi usụn̄ oro enyenede uforo akan ndida nsuan Akpanikọ idahaemi.” Ikọ eke enyọn̄ emi otode nsiondi Zion’s Watch Tower eke July 1, 1893, ama owụt nte utom ukwọrọikọ eke ufọk ke ufọk edide akpan n̄kpọ. Mme owo ke ofụri ererimbot ẹda emi ẹdiọn̄ọ Mme Ntiense Jehovah. Ndi usụn̄ usuan etop emi ke enyenyene ufọn sia ẹnen̄ede ọsọn̄ idahaemi ndikụt mme owo ke ufọk ke ndusụk idụt?
2. Nso nsọn̄ọ idu ke N̄wed Abasi kaban̄a unọ ikọ ntiense eke ufọk ke ufọk?
2 Ekem ye N̄wed Abasi Onyụn̄ Edi Akpan N̄kpọ: Unọ ikọ ntiense eke ufọk ke ufọk enyene nsọn̄ọ ke N̄wed Abasi. Jesus eketeme mbet 70 ete ẹsan̄a iba iba ẹka ufọk mme owo. (Luke 10:5-7) Esisịt ini ke Jesus ama akakpa, Bible etịn̄ aban̄a mme mbet esie ete: “Kpukpru usen ke temple ye ke ufọk ke ufọk mmọ ẹka iso ye unana edikpa mba ndikpep nnyụn̄ ntan̄a eti mbụk.” (Utom 5:42) Apostle Paul n̄ko ama ekpep mme owo n̄kpọ ifịk ifịk ke ufọk ke ufọk.—Utom 20:20.
3. Nso idi ndusụk ufọn edinọ ikọ ntiense ke ufọk ke ufọk?
3 Unọ ikọ ntiense eke ufọk ke ufọk ke aka iso ndidi akpan usụn̄ oro ẹdade ẹsuan eti mbụk mfịn. Enye anam nnyịn inyene eti ndutịm inyụn̄ ida usụn̄ oro enyenede uforo ‘iyom’ mbon oro ẹdotde. (Matt. 10:11) Mme owo ẹsiwak ndiduọk odudu ke ufọk. Nditịn̄ ikọ ye mmọ iso ye iso—ndikop uyo mmọ, ndise mmọ iso, ndinyụn̄ nse n̄kann̄kụk mmọ—anam nnyịn ifiọk se mmọ ẹmade ẹnyụn̄ ẹnyenede udọn̄ ẹban̄a. Emi ẹsinọ nnyịn mfọnn̄kan ifet nditie ke anyan ini nnọ ikọ ntiense.
4. Didie ke nnyịn ikeme ndinam unọ ikọ ntiense eke ufọk ke ufọk enyene uforo?
4 Nam Mme Ukpụhọde: Apostle Paul ama enyịme ndinam ọkpọkpọ ukpụhọde “kaban̄a eti mbụk.” (1 Cor. 9:23) Ndusụk nnyịn imekeme ndikpụhọde ndutịm nnyịn man ikwọrọ ikọ ke ini oro idikemede ndikụt ediwak owo ke ufọk, utọ nte ke mbubịteyo, ke utịturua, m̀mê ke mme usen nduọkodudu. Nyene n̄wetnnịm n̄kpọ ban̄a mbon oro mîdụhe ke ufọk, ekem fiak ka usen efen ke urua oro m̀mê ini efen ke usen oro.
5. Didie ke ẹkeme ndinam mbon oro idem mînen̄ekede isọn̄ ẹtiene ẹbuana ke utom eke ufọk ke ufọk?
5 Idem mbon oro idem mînen̄ekede isọn̄ ẹkeme ndikwọrọ ikọ ke ufọk ke ufọk. Nnyịn imekeme ndinam ndutịm ndida utọ mbon emi n̄ka mme ufọk oro ẹkperede, inamde mmọ ẹnam utom sụn̄sụn̄. Eyenete an̄wan kiet oro mîkekemeke ndin̄wek ibifịk ọfọn, ama ekeme ndida minit 30 n̄kwọrọ ikọ ke ufọk kiet kpọt. Edi enye ekenem esịt onyụn̄ okop uyụhọ didie ntem nditiene n̄kwọrọ ikọ ye otu oro!
6. Ntak emi nnyịn ikpanamde unọ ikọ ntiense eke ufọk ke ufọk edi usụn̄ unọ ikọ ntiense nnyịn kpukpru ini?
6 Ke ẹka iso ndikụt mbon mbieterọn̄ ke utom eke ufọk ke ufọk. Asuanetop kiet ọkọkọn̄ usụn̄ ufọk kiet, ndien ẹdọhọ enye: “Dụk di. Mmọdiọn̄ọ fi. N̄kosụk mbọn̄ akam mben̄e Abasi ọnọ owo edin̄wam mi, ndien idahaemi n̄kop nte ọkọn̄de usụn̄. Enye ama okop akam mi onyụn̄ ọdọn̄ fi edi.” Se itịbede emi owụt ke Jehovah ọdiọn̄ usụn̄ ukwọrọikọ emi. (Matt. 11:19) Biere ndinam unọ ikọ ntiense eke ufọk ke ufọk kpukpru ini.