Nam Ẹma Mme Anana-Mbiet Edu Jehovah
1 Ke utom ukwọrọikọ nnyịn, nnyịn imesinam se ikande edikpep mbon en̄wen mme akpan ukpepn̄kpọ Bible. Nnyịn imesin̄wam mme owo ẹtịm ẹdiọn̄ọ Jehovah ẹnyụn̄ ẹma mme anana-mbiet edu esie. Ke ini mbon esịt akpanikọ ẹkpepde akpanikọ ẹban̄a Abasi, emi esinen̄ede otụk mmọ, onụkde mmọ ẹnam mme ukpụhọde ke uwem mmọ man “ẹsan̄a nte odotde Jehovah ẹnem enye esịt ọyọhọ ọyọhọ.”—Col. 1:9, 10; 3:9, 10.
2 Obufa Un̄wam Ukpepn̄kpọ Nnyịn: Toto ke ntọn̄ọ, n̄wed Bible Ekpep odụri ntịn̄enyịn owụt mme edu Jehovah. Ata akpa ibuot ọbọrọ mme mbụme emi: Nte Abasi enen̄ede ekere aban̄a fi? Abasi etie didie?, ye Ndi ẹkeme ndisan̄a n̄kpere Abasi? Ibuot oro n̄ko owụt nte Jehovah edide edisana (ikp. eki. 10), unenikpe ye mbọm esie (ikp. eki. 11), ima esie (ikp. eki. 13), odudu esie (ikp. eki. 16), ye mbọm, mfọnido, edifen nnọ, ime, ye nsọn̄ọnda esie (ikp. eki. 19). Ikpehe ekikere 20 etịn̄ n̄kpọ emi ibio ibio ete: “Adan̄a nte afo ekpepde n̄kpọ aban̄a Jehovah, ntre ke afo edinen̄ede ada enye nte ata owo, ndien oro ayanam fi enen̄ede ama onyụn̄ asan̄a ekpere enye.”
3 Didie ke ikeme ndida n̄wed Bible Ekpep n̄n̄wam nditọ ukpepn̄kpọ Bible ẹsan̄a ẹkpere Jehovah? Ke ima ikeneme ikpehe ekikere oro owụtde kiet ke otu mme edu Abasi, nnyịn imekeme ndibụp eyen ukpepn̄kpọ oro ite, “Nso ke emi ekpep fi aban̄a Jehovah?” mîdịghe “Didie ke emi owụt ke Abasi enyene udọn̄ ke idem fo?” Ke ndibụp utọ mbụme oro ke ini ke ini, nnyịn ikpep nditọ ukpepn̄kpọ nnyịn ndikere mban̄a se mmọ ẹkpepde nnyụn̄ n̄n̄wam mmọ ẹka iso ẹma mme anana-mbiet edu Jehovah.
4 Neme Ekebe Ndụn̄ọde: Ke utịt ibuot kiet kiet, dọhọ eyen ukpepn̄kpọ ada ikọ idemesie etịn̄ n̄kpọ aban̄a akpan n̄kpọ kiet kiet oro odude ke ekebe oro “Se Bible Ekpepde.” Dụri ntịn̄enyịn wụt mme itie N̄wed Abasi oro ẹsiakde ẹsịn. Man ọfiọk se idude eyen ukpepn̄kpọ ke esịt, ndusụk ini afo emekeme ndibụp mme utọ mbụme nte, “Afo ekere didie aban̄a se Bible ekpepde aban̄a n̄kpọ emi?” Ke anamde oro, oyodori nsọn̄uyo ke mme akpan n̄kpọ oro ẹdude ke ibuot oro onyụn̄ etịm ọfiọk se eyen ukpepn̄kpọ etịmde enịm. Emi ayan̄wam eyen ukpepn̄kpọ emi ọtọn̄ọ ndinyene itie ebuana ye Jehovah.