Ẹfep Mme Edinam Ererimbot

¹ “N̄wụtidem ke n̄kpọ eke owo adade odu uwem” edi kiet ke otu mme edu ererimbot. (1 John 2:15-17) Ẹkụt edu emi ke mme uwouwo usọrọ ndọ oro ẹdide ọsọ n̄kpọ idahaemi ke ererimbot. Ẹdida ndọ idahaemi ẹnam mbubịne ke nsio nsio usụn̄. Edi n̄kpọ mfụhọ nte ke ndusụk owo ke esop Christian iwụtke ke imokpụhọde ikpọn̄ ererimbot ke ini ẹnamde mme usọrọ ndọ mmọ.—John 17:16; Rome 12:2.

² Ke uwụtn̄kpọ, ndusụk owo ke esop ẹnam utọ ndọ iba—eke ido obio ye eke ukara—ẹnamde usọrọ ke ndọ mbiba emi. Emi anam okụk oro ẹbiatde ẹnam ndọ etetịm okpon. Ibuotikọ oro “Ndọ Oro Enyenede Ukpono—Ikpehe 1: Eke Ido Obio ye Nte Ekemde ye Ibet Ndọ,” oro ẹkemịn̄de ke Utom Obio Ubọn̄ Nnyịn eke October 1994, ọdọhọ ubak ubak ete: ‘Edi akpan n̄kpọ ye se idotde ndinọ ndusụk ntọt mban̄a orụk ndọ iba oro nnyịn inyenede ke idụt emi, oro edi ndinam ndọ nte ekemde ye Ibet Ndọ ye Ibet Ido Obio. Orụk ndọ mbiba emi ẹnen, ẹkem ye ibet, ẹnyụn̄ ẹnyene ukpono. Ẹnyịme ekededi ke otu mbiba emi ke esop Christian.’

³ Ibuotikọ oro “Ndọ Oro Enyenede Ukpono—Ikpehe 2: Eke Ido Obio ye Nte Ekemde ye Ibet Ndọ,” oro ẹkemịn̄de ke Utom Obio Ubọn̄ Nnyịn eke November 1994, adian do ete: “Ke ikerede iban̄a se ẹnemede emi ye ke ntak edide nte ke orụk ndọ mbiba emi ẹnen, ẹkem ye ibet, ẹnyụn̄ ẹnyene ukpono, oyom ẹmek m̀mê ewe ke ẹdinam ke otu mbiba ẹmi. Idịghe akpan n̄kpọ, inyụn̄ idịghe se ẹyomde, nte ẹnam mbiba ke ndọ kiet. Afo enyene ndinam ndọ ke idak Ibet Ndọ mîdịghe ndọ Ibet Ido Obio emi ẹsịnde ke n̄wed. Sia edikpe okụk ndọ ke idemesie mînamke ndọ Ibet Ido Obio ọyọhọ ofụri ofụri m̀mê ndinam enye odot ke owo mîyakke n̄wanndọ inọ ebendọ, do owo oro anamde ndọ ke idak Ibet Ndọ ekeme n̄ko ndikpe okụk ndọ ye unana edikọmọ ke mme n̄kpọ eken ẹyomde ke ido obio.”

⁴ Ke adan̄aemi etịn̄de n̄kpọ aban̄a ndọ oro ẹnamde nte ekemde ye Ibet Ndọ, Utom Obio Ubọn̄ Nnyịn eke October 1994, oro iketịn̄de iban̄a ke enyọn̄ emi ọkọdọhọ ete: “Nnyịn imesịn udọn̄ inọ kpukpru owo ndinam orụk ndọ enyeemi koro enye ọnọde n̄wan ye nditọ n̄kponn̄kan ukpeme ọkọrọ ye mme ufọn eken edieke ebe akpade.” Ufọn efen oro Ndọ Ukara m̀mê ndọ oro ẹnamde nte ekemde ye Ibet Ndọ enyenede ekeme ndisịne ndinam Christian efep ndusụk ido edinam ererimbot oro ẹkemede ndibiat eti idaha esie ye esop. Ke uwụtn̄kpọ, ke Ndọ Ukara, idiyomke owo ererimbot ọbọn̄ akam ọnọ mbon oro ẹyomde ndidọ ndọ ke ntak emi enye edide ete m̀mê andikakama n̄wan oro ẹyomde ndidọ mi, sia emi edidide mbuaha mbuọtidem. Ukem n̄kpọ emi ke ẹkeme nditịn̄ mban̄a mme ido edinam efen oro mîdotke ye mme Christian.

⁵ Ke ima ikekere iban̄a se ẹnemede ke enyọn̄ emi, anie ekpebiere utọ ndọ oro ẹkpenamde? Ibuotikọ oro “Ndọ Oro Enyenede Ukpono—Ikpehe 3: Eke Ido Obio ye Nte Ekemde ye Ibet Ndọ,” ke Utom Obio Ubọn̄ Nnyịn eke December 1994, ọdọhọ ke page 3, ikpehe ekikere 1 ete: “Idịghe mme ete ye eka m̀mê mme iman ẹnyene ndinam utọ ubiere oro. Edi mbiomo owo iba ẹmi ẹdiomide ndidọ ndọ mi ndibiere orụk ndọ oro mmọ ẹyomde, edide ke idak Ibet Ndọ m̀mê ndọ Ibet Ido Obio. Owo ndomokiet inyeneke unen ndinyịk orụk ndọ kiet m̀mê eken ndori owo iba emi ẹdiomide ndidọ ndọ mi. Mmọ ẹnyene mbiomo ndinam ubiere oro. Mmọ n̄ko ẹnyene unen ndimek ebiet emi ẹdinamde ndọ oro, [ye] . . . owo emi edinọde utịn̄ikọ ndọ.”

⁶ Nte ẹwụtde ke ikpehe ekikere eke enyọn̄ emi, sia mîdịghe mbiomo ete ye eka ndibiere utọ ndọ oro ẹdinamde, idotke kọmiti utom ndisọn̄ọ ndọhọ ke ana ẹnam mme n̄kpọ oro ẹyomde ke ndọ ido obio mbemiso mmọ ẹnọde owo unyịme ndinam ndọ ke Ufọkmbono Obio Ubọn̄. Utom kọmiti utom edi ndikụt nte ke mbon emi ẹyomde ndidọ ndọ mi ẹdu ke eti idaha. Mmọ ẹdinam emi ebe ke ndiyom leta itoro nto (mme) kọmiti utom esop mbon oro ẹyomde ndidọ ndọ mi.

⁷ Edieke oyomde, eyenete oro oyomde ndidọ ndọ ekeme ndikpe okụk ndọ nnọ ubon n̄wan oro enye oyomde ndidọ edieke enye emekde ndinam Ndọ Ukara. Edieke oyomde, ẹkeme ndinịm usen oro ẹdikpede okụk ndọ ye unana edinam usọrọ. Nnyịn itịn̄ emi koro idịghe okụk ndọ ekededi oro ẹkpede anam Ndọ Ukara edi ọyọhọ ndọ oro ẹnyịmede. Ntem, owo ẹkeme nditre ndibiat ediwak okụk koro owo mînịmke usọrọ iba—eke Ndọ Ido Obio ye eke Ndọ Ukara.

⁸ N̄kpọ efen oro iyomde nditịn̄ mban̄a edi ukpụhọde oro odude ke ufọt edisịn Ndọ Ido Obio ke n̄wed ye edisịn Ndọ Ukara ke n̄wed. Edieke owo mîkanamke ndọ ido obio, edibịne ukara n̄kann̄kụk n̄kesịn ndọ ke n̄wed inamke enye edi ndọ idem ọkpọkọm n̄wed ndọ edi ukem ye enye oro ẹkotde Form E oro ẹsinọde owo ke Ndọ Ukara. Mbọk ẹtịm ẹfiọk ẹte ke edisịn ndọ ido obio ke n̄wed iwọrọke Ndọ Ukara. Iyomke owo ọdọ ndọ Ido Obio mbemiso enye anam Ndọ Ukara. Ndọ Ukara oyom eren ye n̄wan oro ẹyomde ndidọ ndọ m̀mê owo kiet ke otu mmọ aka Ọfis Udianndọ ekesịn n̄wed ntọt usen 21. Ke usen 21 oro ẹma ẹkebe, mbon oro ẹyomde ndidọ ndọ mi ẹyebọ babru oro ẹkotde Form C ke Ọfis Udianndọ man mmọ ẹkeme ndinam ndọ ebe ke ndibọ babru oro ẹkotde Form E ke Ufọkmbono Obio Ubọn̄ m̀mê ke Ọfis Udianndọ. Ndisịn ubọk nnyụn̄ mbọ Form E edi ndọ ke Ndọ Ukara. Iyomke ẹnam ndọ ido obio ẹdian do. Owo ikpenyeneke ndida usụn̄ udianndọ enye emi nte edisịn ndọ ido obio ke n̄wed, emi ẹsinamde ke ndusụk itie, inamke n̄kpọ m̀mê mme n̄wed ndọ oro ẹnọde ke n̄kann̄kụk ẹbiet eke Ndọ Ukara adan̄a didie.

⁹ Edieke owo ebierede ndinam ndọ Ido Obio, enye ekeme ndinam ntre. Nte ededi, man utọ owo oro enyene mme akpan ifetutom ke esop, oyom enye ẹsịn ndọ esie ke n̄wed ye ukara n̄kann̄kụk. Enye ekpenyene ndidọhọ owo ukara do nte ke imọ iyom ndisịn ndọ Ido Obio oro imọ ikanamde ke n̄wed ndien ẹyenọ enye n̄wed oro owụtde ke ẹsịn ndọ oro ke n̄wed. Eren oro ekeme ndisan̄a ikpọn̄ n̄kesịn ndọ oro ke n̄wed, mîdịghe ekeme ndiyom enye asan̄a kiet ye n̄wan esie. Ke ndusụk idaha, ẹkeme ndiyom ete m̀mê andikakama eyenan̄wan oro odu ke ini usịn ndọ oro ke n̄wed.

¹⁰ Utọ n̄wed ndọ oro ukara n̄kann̄kụk kiet ọnọde esikpụhọde ye eke ukara n̄kann̄kụk en̄wen. Nte ededi, mbemiso owo akade ekesịn ndọ Ido Obio ke n̄wed, enye ekpenyene ndikụt nte ke imọ ima ikpe okụk ndọ ye nte ke ẹma ẹkpọn̄ n̄wanndọ ẹnọ imọ. Ndisịn ndọ ido obio emi owo mînọhọ ofụri n̄kpọ ndọ oro ẹyomde ke n̄wed idịghe ndọ sia owo mînamke ndọ kan̄a.

¹¹ Ndusụk ukara n̄kann̄kụk inyeneke itie usịn ndọ ido obio ke n̄wed. Ke edide ntre, afo enyene ndika ebiet oro ẹnyenede ndutịm emi mîdịghe afo anam Ndọ Ukara oro mîyomke mme edinam efen.

¹² Nnyịn imenịm ke akpanikọ ite ke nditiene mme edumbet eke enyọn̄ emi eyenen̄ede ẹkpeme nnyịn ọbiọn̄ọ mme edinam ererimbot.—John 17:14, 16.