Leta Otode Otu Ukara
“MBUFO ẹkpekam ẹnyene mfọnido oro owo mîdotke ye emem ẹtode Abasi Ete nnyịn ye Ọbọn̄ Jesus Christ.” Ntre ke Paul ọkọkọm mme owo ke ediwak leta oro enye ọkọnọde ẹsọk mme esop. Kpa ntre n̄ko ke nnyịn ikọm kpukpru mbufo.—Eph. 1:2.
Nnyịn iwụt esịtekọm didie ntem iban̄a mfọnido Jehovah oro owo mîdotke ke ndinọ uwa ufak Christ Jesus! Ufak emi anam nnyịn inyene eti idaha ke iso Abasi. Tutu amama, nnyịn ikpekemeke ndinyene eti idaha emi ke odudu idem nnyịn, inamke n̄kpọ m̀mê nnyịn isịn ifịk adan̄a didie ndikpep Bible, ndikwọrọ eti mbụk, m̀mê ndinam nti utom eken. Ẹfen mme idiọkn̄kpọ nnyịn ẹnyụn̄ ẹnọ nnyịn nsinsi uwem idịghe ke ntak ukeme oro nnyịn isịnde, edi edi ke ntak enọ mfọnido oro owo mîdotke emi Jehovah ọnọde nnyịn ebe ke Jesus Christ.—Rome 11:6.
Paul ama ewet ọnọ ekemmọ mme andinịm ke akpanikọ ete: “Nnyịn . . . imekpe mbufo ubọk ite ẹkûbọ mfọnido Abasi oro owo mîdotke edi ẹtaba uduak esie. Koro enye ọdọhọde ete: ‘Ke ini eke odotde mma nyere fi, ndien ke ini edinyan̄a mma n̄n̄wam fi.’ Sese! Akpan ini eke odotde edi emi. Sese! Usen edinyan̄a edi emi.” “Ini eke odotde” ama odu mbemiso nsobo Jerusalem ke akpa isua ikie. Mbon esịt akpanikọ oro ẹkemade Jehovah ẹma ẹbọ edinyan̄a ke n̄kan̄ eke spirit. Ke akpatre, emi ama ada ekesịm ata ata edinyan̄a kpukpru mme anam-akpanikọ oro ẹkefehede ẹkpọn̄ Jerusalem mbemiso ẹkesobode enye ke isua 70 E.N.—2 Cor. 6:1, 2.
Mfịn n̄ko, nnyịn idu uwem ke “ini eke odotde” ye ke “usen edinyan̄a.” Mbon oro Jehovah enyịmede nte mme asan̄autom esie ye mbon oro ẹnyan̄ade ke n̄kan̄ eke spirit ẹnyene idotenyịn ke ẹyenyan̄a mmimọ ke ata ata usụn̄ ke “akwa usen Jehovah” oro enen̄erede asan̄a ekpere mi.—Zeph. 1:14.
Edidi usen Jehovah odori nnyịn akwa mbiomo ke idem. Oyom nnyịn itọt mme owo iban̄a edidi usen emi inyụn̄ in̄wam mbon esịt akpanikọ ẹbọ ufọn ẹto mfọnido Jehovah oro owo mîdotke man ẹnyan̄a mmọ. Paul ama enen̄ede ada utom emi ke akpan n̄kpọ. Enye ekewet ete: “Mbọm mi edieke mmentan̄ake eti mbụk!” Enye n̄ko ama etịn̄ nte enye akadade utom oro ete: ‘Mmakama mbon ọniọn̄ ye mme ọkọi nde, isọn: ntre ke n̄kan̄ mi mmenyene ọkpọsọn̄ udọn̄ nditan̄a eti mbụk.’—1 Cor. 9:16; Rome 1:14, 15.
Nnyịn iyanam ibat inọ Jehovah edieke nnyịn mînọhọ mme owo akpan ntọt emi. Nnyịn imọfiọk se Jehovah ọkọdọhọde prọfet Ezekiel ete: “Eyen owo, mmenịm fi ke owo-ukpeme nnọ ufọk Israel: kop ndien ikọ emi otode mi ke inua, nyụn̄ da uyo mi teme mmọ. Ke adan̄aemi ndọhọde idiọk owo, nte, Afo udutreke ndikpa: ndien afo mûtemeke enye, mûnyụn̄ udọhọke, man ọnọ idiọk owo item, ete enye ọkpọn̄ idiọk usụn̄ esie, man enịm enye uwem: enye idiọk owo oro ayakpa ke mme idiọk ido esie; ndien nyakpak iyịp esie ke ubọk fo.”—Ezek. 3:16b-18.
N̄kpọ ọsọn̄ eti eti ke mme akpatre usen emi. Ọsọsọn̄ ndinam mbubehe ubon, utom idịbi udia, mme edinam esop, ye utom ukwọrọikọ, ẹda ukem ukem. Ke adianade do, ediwak owo ke otu mbufo ke ẹdọn̄ọ, ẹkop mfụhọ, ẹsọn̄, ẹnyụn̄ ẹsobo ubiọn̄ọ. Ata ediwak mbufo ‘ẹmebiom ndodobi mbiomo.’ Nnyịn imekere iban̄a mbufo, inyụn̄ iyom mbufo ẹnam se Jesus eketịn̄de ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu.” (Matt. 11:28) Nnyịn imenen̄ede itoro kpukpru mbufo oro ẹsịnde ukeme ke ndika iso nnam n̄kpọ Jehovah kpa ye oro ẹsobode ikpọ ye n̄kpri mfịna.
Ke ntak ifịk oro mbufo ẹsịnde ke edikwọrọ ikọ ye edikpep mme owo n̄kpọ ye ke ntak edidiọn̄ Jehovah, owo 4,762 ẹna baptism kpukpru urua ke ẹbaharede ukem ukem. Ke isua utom oro ekebede, ẹma ẹsiak mbufa esop 1,375. Nnyịn imọbọn̄ akam inyụn̄ idori enyịn ke obufa n̄wed oro, Nso ke Bible Enen̄ede Ekpep?, emi ama okododu ke se iwakde ibe usem 120 ayan̄wam ediwak miliọn owo ndibọ ufọn nto mfọnido oro owo mîdotke ye emem oro otode Jehovah ke “usen edinyan̄a” emi.
Ẹtịm ẹfiọk ẹte ke Otu Ukara ama mbufo, imesinyụn̄ isịn mbufo ke akam nnyịn. Ẹsọsọn̄ọ nde nte mbufo ẹsinyụn̄ ẹsịnde nnyịn ke akam mbufo.
Nditọete mbufo,
Otu Ukara eke Mme Ntiense Jehovah