Nte Ẹkpekade Iso Ẹnyene Ifịk
1 Ifịk oro Apollos akadade anam utom ukwọrọikọ esie ekeme nditi nnyịn mban̄a ekemmọ mme Christian mfịn, emi ẹnen̄erede ẹsịn ifịk ke utom ukwọrọikọ. (Utom 18:24-28) Nte ededi, ẹteme kpukpru nnyịn ẹte: “Ẹkûsịn ifu ke mbubehe mbufo. Ẹnyene ifiopesịt ke spirit.” (Rome 12:11) Nso ikeme ndin̄wam nnyịn ika iso inyene ifịk ke utom ukwọrọikọ Christian?
2 Ifiọk Anam Inen̄ede Inyene Ifịk: Ke Jesus ama okowụt iba ke otu mbet esie idem onyụn̄ “asiak mme n̄kpọ emi ẹketịn̄de ẹban̄a enye ke ofụri N̄wed Abasi ọnọ mmọ,” mmọ ẹkedọhọ ẹte: “Nte esịt ikofiopke nnyịn ke ini enye ekenemede nneme ye nnyịn ke usụn̄?” (Luke 24:27, 32) Kpasụk ntre, nte isiduaike nnyịn idem ke ini nnyịn inen̄erede inyene ifiọk iban̄a Ikọ Abasi? Ih, ifiọk esinam nnyịn inen̄ede inyene mbuọtidem. N̄wed Rome 10:17 anam an̄wan̄a ete: “Mbuọtidem oto ke n̄kpọ oro ẹkopde.” Ke ini nnyịn inen̄erede ibuọt idem ke mme un̄wọn̄ọ Jehovah, nnyịn idikam ikemeke nditre nditịn̄ mban̄a mme n̄kpọ oro nnyịn ikpepde!—Ps. 145:7; Utom 4:20.
3 Nnyịn ikemeke ndiberi edem ofụri ofụri ke ifiọk oro ikenyenede ito mme n̄kpọ oro ikekpepde ke edem man ika iso inen̄ede ima Abasi, inyụn̄ inyene ifịk ke utom esie. Ana nnyịn ika iso itat ifiọk oro inyenede iban̄a akpanikọ inyụn̄ inam ima oro imade Jehovah otụn̄ọ. Mîdịg̣he ntre, nnyịn idinamke utom esie ke ofụri esịt. (Edi. 2:4) Ikọ Abasi esịn udọn̄ ọnọ nnyịn ‘ndika iso n̄kọri ke nnennen ifiọk Abasi.’—Col. 1:9, 10.
4 Nte Nnyịn Isikpepde N̄kpọ: Ọkpọfọn idụn̄ọde nte nnyịn isikpepde n̄kpọ. Ke uwụtn̄kpọ, nnyịn imekeme ndidụri udịm ke mme ibọrọ ukpepn̄kpọ Enyọn̄-Ukpeme inyụn̄ inọ nti ibọrọ. Edi nte nnyịn imesikot mme itie N̄wed Abasi oro ẹsiakde-siak ẹsịn inyụn̄ ikere iban̄a nte ikpadade mme n̄kpọ emi isịn ke edinam? Kaban̄a edikot Bible eke urua ke urua, ndi nnyịn imesisịn ukeme ndinam mme ndụn̄ọde efen efen edieke mme idaha nnyịn ẹyakde inyụn̄ ikere iban̄a mme ukpepn̄kpọ oro ẹdọn̄ọde ke edikot Bible oro? (Ps. 77:11, 12; N̄ke 2:1-5) Ọfọn didie ntem nditie n̄kere nnyụn̄ nsịn idem ofụri ofụri ke Ikọ Abasi! (1 Tim. 4:15, 16) Utọ ntotụn̄ọ ukpepn̄kpọ oro ọyọsọn̄ọ nnyịn idem onyụn̄ ọnọ nnyịn odudu ‘ndisịn ifịk nnam nti utom.’—Titus 2:14.