Nte Ẹkpetọn̄ọde Ukpepn̄kpọ ke N̄wed Bible Ekpep
Ediwak nnyịn ikpama ndinịm ukpepn̄kpọ Bible edieke nnyịn ikpekemede nditọn̄ọ ukpepn̄kpọ oro. Obufa n̄wed emi Nso ke Bible Enen̄ede Ekpep? ekeme ndin̄wam nnyịn. Ẹtịm ebemiso ikọ oro odude ke page 3-7 man ẹda n̄wed oro ẹnam enyeneufọk enyene udọn̄ ndikop nneme Bible. Idikam isọn̄ke mbon oro mîtịmke inyene mbufiọk ke an̄wautom ndida enye ntọn̄ọ ukpepn̄kpọ.
◼ Afo emekeme ndida page 3 ndomo usụn̄ emi nse:
Ke ama eketịn̄ se idude ke mbụk m̀mê mfịna oro mme owo ẹnyenede ke efakutom mbufo, wụt enyeneufọk mme mbụme oro ẹdude ke ndodobi ubọkn̄wed ke page 3, nyụn̄ dọhọ enye ọbọrọ mme mbụme oro. Ekem kûbọde ka page 4-5.
◼ Mîdịghe afo emekeme nditọn̄ọ ke ndisio mme akpan n̄kpọ oro ẹdude ke page 4-5 n̄wụt:
Afo emekeme ndidọhọ, “Nte ikpọfọnke edieke mme ukpụhọde oro ẹwụtde mi enen̄erede etịbe?” Mîdịghe afo emekeme ndibụp ete, “Ewe ke otu mme un̄wọn̄ọ emi ke afo akpama ndikụt osude?” Nen̄ede kpan̄ utọn̄ ke ibọrọ oro ẹdinọde.
Edieke enyeneufọk enen̄ede enyene udọn̄ ke kiet ke otu mme itie N̄wed Abasi oro, wụt enye se Bible ekpepde ke ibuot nneme oro ebe ke ndineme mme ikpehe ekikere oro ẹnemede n̄kpọ ẹban̄a itie N̄wed Abasi emi ke n̄wed oro. (Se ekebe oro odude ke esịne-esịt page emi.) Neme mme n̄kpọ emi nte ekpenemede ke ini enịmde ukpepn̄kpọ Bible. Ẹkeme ndida ke enyịnusụn̄ nnam emi ke minit ition esịm duop ke akpa ediwaha.
◼ Usụn̄ efen edi ndibụp mme mbụme oro ẹdude ke page 6 man ọfiọk se idude owo ke ekikere:
Nam enyeneufọk okụt mme mbụme oro ẹdude ke isọn̄ isọn̄ page oro, nyụn̄ bụp enye ete, “Ndi afo emesikere aban̄a ekededi ke otu mme mbụme emi?” Edieke enye enyenede udọn̄ ke kiet ke otu mme mbụme emi, kûbọde ka ikpehe ekikere oro ọbọrọde mbụme emi ke n̄wed oro. (Se ekebe oro odude ke esịne-esịt page emi.) Nte mbufo ẹnemede mme n̄kpọ emi ọtọkiet, afo ke enịm ukpepn̄kpọ Bible.
◼ Ẹkeme ndida Page 7 n̄wụt nte ẹsinịmde ukpepn̄kpọ Bible:
Kot akpa udịmikọ ita oro odude ke page oro, ndien ekem kûbọde ka ibuot 3, nyụn̄ da ikpehe ekikere 1-3 nam wụt nte ẹsikpepde n̄kpọ. Nam ndutịm ndifiak n̄kọbọrọ mme mbụme oro ẹbụpde ke ikpehe ekikere 3.
◼ Nte ẹkpenamde ndutịm ndifiak n̄ka:
Ke ini okụrede ukpepn̄kpọ ke akpa usen ukpepn̄kpọ, nam ndutịm ndika iso ke nneme oro. Afo emekeme ndidọhọ: “Ke n̄kpasịp minit ifan̄ nnyịn imọfiọk se Bible ekpepde ke akpan ibuot nneme kiet. Isan̄ efen, nnyịn imekeme ndineme [bụp mbụme kiet oro edibọrọde ini efen]. Ndi mmekeme ndidi urua efen ke ukem ini emi?”
Jehovah ke aka iso nditịm nnyịn idem nnọ utom oro nnyịn inyenede ndinam nte nnyịn isan̄ade ikpere edimek ini esie. (Matt. 28:19, 20; 2 Tim. 3:17) Ẹyak nnyịn ida obufa n̄kpọutom emi inam n̄kpọ nte ọfọnde ke ndida enye ntọn̄ọ ukpepn̄kpọ Bible.
[Ekebe ke page 3]
Nneme Itie N̄wed Abasi Oro Ẹdude ke Page 4-5
◻ Ediyarade 21:4 (p. 27-28, ikp. eki. 1-3)
◻ Isaiah 33:24; 35:5, 6 (p. 36, ikp. eki. 22)
◻ John 5:28, 29 (p. 72-73, ikp. eki. 17-19)
◻ Psalm 72:16 (p. 34, ikp. eki. 19)
Mme Ibọrọ Mbụme Oro Ẹdude ke Page 6
◻ Ntak emi nnyịn ibọde ufen-e? (p. 108-109, ikp. eki. 6-8)
◻ Ikeme didie ndiyọ mme editịmede esịt ke uwem? (p. 184-185, ikp. eki. 1-3)
◻ Ikeme didie ndinam uwem ubon nnyịn etetịm enem? (p. 143, ikp. eki. 20)
◻ Nso isitịbe inọ nnyịn ke ini nnyịn ikpade? (p. 58-59, ikp. eki. 5-6)
◻ Ndi nnyịn iyafiak ikụt mbon ima nnyịn oro ẹkekpade tutu amama? (p. 72-73, ikp. eki. 17-19)
◻ Didie ke nnyịn ikeme nditịm mfiọk nte ke Abasi oyosu mme un̄wọn̄ọ esie kaban̄a ini iso? (p. 25, ikp. eki. 17)