Nen̄ede Kere Ban̄a Mbon Efen—Ebe ke Ndifọn Ido
1 Ke n̄wan kiet oro ekesisuade Mme Ntiense Jehovah etide akpa ini oro enye okosobode ye kiet ke otu Mme Ntiense, enye ọkọdọhọ ete: “Nnen̄ekede nti se nnyịn ikenemede iban̄a, edi se ntide edi nte n̄wan emi ọkọfọnde ido ye ami, ye nte enye akatatde ubọk onyụn̄ osụhọrede idem. Ami mma nnen̄ede nsịk n̄kpere enye.” Mme ikọ emi ẹwụt ke edi akpan n̄kpọ ndinen̄ede n̄kere mban̄a mbon oro nnyịn ikwọrọde ikọ inọ.—Phil. 2:4.
2 Ima Ọfọn Ido: Usụn̄ kiet emi nnyịn ikemede ndiwụt ke imama mbon efen edi ndifọn ido. (1 Cor. 13:4) Owo emi ọfọnde ido esinen̄ede enyene udọn̄ ke mfọnọn̄kpọ mbon en̄wen, oyomde ndinam n̄kpọ man an̄wam mmọ. Edi akpanikọ nte ke utom ukwọrọikọ edi edinam mfọnido. Edi nnyịn ndinen̄ede n̄kere mban̄a mbon en̄wen abuana se ikande sụk edikwọrọ ikọ nnọ mmọ. Nte nnyịn inamde n̄kpọ ye mme owo—nnyịn nditie ufan ufan, nnyịn ndiwụt eti ido, nte nnyịn ikpan̄de utọn̄, se nnyịn itịn̄de ye nte itịn̄de, idem nte inịmde iso ke ini itịn̄de ikọ ye mmọ—ẹyewụt ke imenen̄ede ikere iban̄a mmọ.—Matt. 8:2, 3.
3 Ndikere mban̄a mbon en̄wen ke ima ima usụn̄ oyonụk nnyịn ndinọ mmọ ata un̄wam. Ke ini asiakusụn̄ kiet ọkọkwọrọde ikọ ke ufọk ke ufọk, akanian̄wan ebeakpa kiet ama ọsọsọp osio enye unyọn̄ ke ọfiọkde owo oro enye edide. N̄wan emi ọkọdọhọ ke imọ ikodoro ke ekpri eberi ke ufọk utemudia, ke in̄wana ndikpụhọ bulb ikan̄ ke ini eyenete emi ọkọkọn̄de usụn̄. Eyenete oro ama ọdọhọ ete: “Ifọnke afo ndinam oro ke idemfo.” N̄wan emi ama ọdọhọ enye odụk ufọk. Eyenete oro ama okpụhọ bulb oro, ekem ebe aka ebiet efen. Ke ini eyen mma emi ekedide edise enye ke mîbịghike, mma emi ama etịn̄ se iketịbede ọnọ enye. N̄kpọ emi ama enen̄ede otụk eyen oro tutu enye oyom eyenete oro man ọkọm enye. Emi ama eberede ifet ndinyene inem inem nneme onyụn̄ ada okosụn̄ọ ke eyen oro ndinyịme ukpepn̄kpọ Bible.
4 Ke ini ifọnde ido, nnyịn iwụt mbiet ima emi Jehovah enyenede ọnọ mme owo inyụn̄ inam etop Obio Ubọn̄ enyene uku. Mmọdo, ẹyak nnyịn kpukpru ini ‘ida mfọnido itoro idem nnyịn nte mme asan̄autom Abasi.’—2 Cor. 6:4, 6.