Ikpehe 11: Ndinịm Ukpepn̄kpọ Bible Oro Enyenede Uforo
Ndin̄wam Nditọ Ukpepn̄kpọ Ẹnam Mme Mfiakn̄ka
1 Ke ini eyen ukpepn̄kpọ Bible ọtọn̄ọde ndiwọrọ an̄wautom, enye oyokụt mme owo oro ẹwụtde udọn̄ ke eti mbụk. Didie ke nnyịn ikeme ndin̄wam obufa asuanetop anam mme mfiakn̄ka oro ẹnyenede uforo nnyụn̄ nnam udọn̄ oro enye okụtde ọkọri?
2 Ẹsitọn̄ọ nditịm idem nnọ mfiakn̄ka ke akpa ini oro ẹwahade. Sịn udọn̄ nọ eyen ukpepn̄kpọ oro ndinyene ata udọn̄ ke idem mbon oro enye etịn̄de ikọ ọnọ. (Phil. 2:4) Kpep enye nsịtnsịt ndinam mme enyeneufọk ẹtịn̄ ekikere mmọ, ndikpan̄ utọn̄ nnọ se mmọ ẹtịn̄de, nnyụn̄ ntịm mfiọk mme n̄kpọ oro ẹbehede mmọ. Ke ini owo owụtde udọn̄, dọhọ obufa asuanetop oro ewet mme akpan ntọt ẹban̄ade nneme oro ẹkenyenede. Da mme ntọt oro n̄wam enye ndidiomi mme nneme efen efen.
3 Nditịm Idem Ndifiak N̄ka: Neme nte akpa ediwaha eketiede, nyụn̄ wụt eyen ukpepn̄kpọ oro nte ekemede ndimek ikpehe etop Obio Ubọn̄ oro edidemerede enyeneufọk udọn̄. (1 Cor. 9:19-23) Tie ye enye tịm ibio ibio nneme oro esịnede itie Bible kiet ọkọrọ ye ikpehe ekikere kiet ke n̄wed ukpepn̄kpọ. Ke adianade do, kere ban̄a mbụme oro ẹkemede ndibụp ke utịt nneme oro man esịn itiat idakisọn̄ ọnọ mfiakn̄ka efen. Wụt obufa asuanetop nte ekemede ndinam owo ọkọri ifiọk oro enye enyenede aban̄a Ikọ Abasi ini kiet kiet oro enye akade.
4 Ọfọn n̄ko ndikpep eyen ukpepn̄kpọ ndida ibio ibio ikọ ntọn̄ọ nneme. Ke ama ọkọkọm enyeneufọk, enye ekeme ndidọhọ: “Mma mma akpatre nneme oro ikenyenede, ndien mmafiak ndi man ndibuana ntọt Bible efen efen ke [siak ibuotikọ].” Ekeme ndiyom afo n̄ko owụt obufa asuanetop oro nte ekemede ndinam n̄kpọ edieke owo efen ọwọrọde edi.
5 Sịn Ifịk Nam Mfiakn̄ka: Sịn udọn̄ nọ eyen ukpepn̄kpọ ndinịm eti uwụtn̄kpọ ke ndisọsọp mfiak mbịne kpukpru mbon oro ẹkewụtde udọn̄. Ekeme ndiyom ime man ikụt mme owo ke ufọk ke ini ifiakde ika. Kpep eyen ukpepn̄kpọ oro nte ekemede ndinam ndutịm ndifiak n̄ka, nyụn̄ n̄wam enye ọfiọk nte oyomde enye afiak aka nte ọkọn̄wọn̄ọde. (Matt. 5:37) Kpep obufa asuanetop ndifọn ido, ndiwụt edikere mban̄a, ndinyụn̄ n̄wụt ukpono nte enye oyomde mbon mbieterọn̄ onyụn̄ anamde udọn̄ mmọ ọkọri.—Titus 3:2.