Ikpehe 7: Ndinịm Ukpepn̄kpọ Bible Oro Enyenede Uforo
Ndibọn̄ Akam Mbemiso Ẹtọn̄ọde Ẹnyụn̄ Ẹtrede Ukpepn̄kpọ
1. (a) Ntak odotde nditọn̄ọ nnyụn̄ ntre ukpepn̄kpọ Bible ye akam? (b) Didie ke nnyịn ikeme nditọn̄ọ mbọn̄ akam ke ukpepn̄kpọ Bible?
1 Man nditọ ukpepn̄kpọ Bible ẹnam n̄kọri ke n̄kan̄ eke spirit, oyom edidiọn̄ Jehovah. (1 Cor. 3:6) Ke ntre, odot ẹtọn̄ọ ẹnyụn̄ ẹtre ukpepn̄kpọ ye akam. Ediwak ini, nnyịn imekeme ndinam emi toto ke akpa ini oro itọn̄ọde ndinịm ukpepn̄kpọ ye mme owo oro ẹnyenede udọn̄ ke ido ukpono. Ye mbon efen, ekeme ndiyom nnyịn itịm ifiọk ini oro odotde nditọn̄ọ mbọn̄ akam. Afo emekeme ndikot Psalm 25:4, 5 ye 1 John 5:14 man an̄wam eyen ukpepn̄kpọ okụt ntak ẹkpebọn̄de akam onyụn̄ okot John 15:16 man anam an̄wan̄a ntak edide akpan n̄kpọ ndibọn̄ akam nnọ Jehovah ebe ke Jesus Christ.
2. Anie ọkpọbọn̄ akam ke ini eyenete eren oro ama akana baptism etienede eyenete an̄wan aka ukpepn̄kpọ Bible, ndien anie ọkpọbọn̄ ke asuanetop emi edide erenowo oro mînaha baptism asan̄ade ye eyenete an̄wan?
2 Anie ọkpọbọn̄ akam ke ukpepn̄kpọ Bible? Edieke eyenete eren emi ama akana baptism etienede eyenete an̄wan aka ukpepn̄kpọ Bible, eyenete eren edibọn̄ akam, ndien eyenete an̄wan oro ekeme ndinịm ukpepn̄kpọ esie, edi ana enye ọbọbọ ọfọn̄ibuot. (1 Cor. 11:5, 10) Ke n̄kan̄ eken, edieke asuanetop Obio Ubọn̄ emi edide erenowo oro mînaha baptism asan̄ade ye eyenete an̄wan aka ukpepn̄kpọ Bible, eyenete an̄wan oro edibọn̄ akam. Ke utọ idaha oro, eyenete an̄wan oro ekpenyene ndibọbọ ọfọn̄ibuot ke ini ọbọn̄de akam ye ke ini enịmde ukpepn̄kpọ esie.
3. Mme n̄kpọ ewe oro ẹdotde ke ẹkpesịn ke akam oro ẹbọn̄de ke ukpepn̄kpọ Bible?
3 Se Ẹkemede Ndisịn ke Akam Oro: Iyomke akam oro ẹbọn̄de ke ukpepn̄kpọ Bible ọnọniọn̄, edi ẹkpenyene ndisiak mme akpan n̄kpọ ke mme akam oro. Ke ẹsiode owo ndiben̄e Abasi ọdiọn̄ ukpepn̄kpọ oro ye owo ndikọm Abasi mban̄a akpanikọ oro ẹkpepde, odot ẹtoro Jehovah nte Andinọ item oro. (Isa. 54:13) Nnyịn imekeme ndisịn mme ikọ emi ẹwụtde udọn̄ oro inyenede ke idem eyen ukpepn̄kpọ oro ye esịtekọm oro inyenede inọ esop oro Jehovah adade anam n̄kpọ. (1 Thess. 1:2, 3; 2:7, 8) Nnyịn ndibọn̄ akam mben̄e Jehovah nte yak enye ọdiọn̄ ukeme emi eyen ukpepn̄kpọ esịnde ekeme ndin̄wam enye ndikụt ufọn ndidi “anam ikọ.”—Jas. 1:22.
4. Nso idi mme ufọn oro ẹbọde ẹto edibọn̄ akam mbemiso ẹtọn̄ọde ẹnyụn̄ ẹtrede ukpepn̄kpọ Bible?
4 Mme ufọn akam ẹwawak. Enye ada edidiọn̄ Abasi edi. (Luke 11:13) Enye owụt nte edikpep Ikọ Abasi edide akpan n̄kpọ. Nte eyen ukpepn̄kpọ akpan̄de utọn̄ okop akam nnyịn, enye ke ekpep nte ọkpọbọn̄de akam. (Luke 6:40) Akan oro, mme akam oro ẹtode esịt emi ọyọhọde ye ima oro ẹnyenede ẹnọ Abasi ye ekọm kaban̄a mme anana-mbiet edu esie ẹkeme ndin̄wam eyen ukpepn̄kpọ ndinyene ọkpọkpọ itie ebuana ye Jehovah.