Ndi Emekeme Ndin̄wam?
1 Kpukpru ini, Jehovah esiyom mme usụn̄ ndin̄wam mme anam-akpanikọ asan̄autom esie. (2 Chron. 16:9; Isa. 41:10, 13) Ke emende enye odomo ye eti ekpemerọn̄, Isaiah ekewet ete: “Enye . . . ayatan̄ nditọ erọn̄ ke ubọk esie, akama ke ikpanesịt esie, onyụn̄ ada mme ọnọ-mmọn̄eba usụn̄.” (Isa. 40:11) Kere ban̄a ndusụk usụn̄ oro nnyịn ikemede ndikpebe ima ima usụn̄ oro Jehovah owụtde edikere mban̄a.
2 Ẹn̄wam Mbufa Owo: Nnyịn imekeme ndin̄wam mbufa owo ebe ke ndikot mmọ ẹdinyene inem inem itie ebuana ye nnyịn. (N̄ke 13:20) Ke etide nte mbon en̄wen ẹken̄wamde imọ ke ini ọkọtọn̄ọde ndibuana ye esop, eyenete kiet ọkọdọhọ ete: “Ke ediwak idaha, ubon kiet ama esikot mi ndibuana ye mmimọ ke ukpepn̄kpọ ubon. Nte n̄kanamde n̄kọri, ebe ye n̄wan ẹdide n̄kparawa, ẹkenyụn̄ ẹsiakde usụn̄, ẹma ẹsikot mi ndisan̄a ye mmimọ ke an̄wautom ọtọn̄ọde ke usenubọk esịm mbubịteyo. Nnyịn ima isinyene inem inem nneme eke spirit.” Enye adian do ete: “Mbemiso n̄kakabarede ndi Christian, mma nsika udia uwem ke mbubịteyo Friday ye Saturday. Edi mmokop uyụhọ ke ini oro nsibiatde ye nditọete.” Ima ima udọn̄ oro esop ẹkewụtde ama an̄wam eyenete emi ndidọn̄ n̄kam nnyụn̄ nsọn̄ọ nda ke mbuọtidem, ndien enye idahaemi anam utom ke Bethel.—Col. 2:6, 7.
3 Ẹn̄wam Kiet Eken Ọkọri: Nnyịn imekeme ndinyene ifet ndin̄wam nditọete nnyịn ke ini mmọ ẹsobode n̄kpọsọn̄ idaha. Ndi emekeme ndinam asuanetop oro mîkopke nsọn̄idem etiene fi abuana ke ndinọ ikọ ntiense ke urụk ukopikọ m̀mê ndikot enye edisan̄a ye afo ekenịm ukpepn̄kpọ Bible, m̀mê idem ndida eyen ukpepn̄kpọ oro n̄ka ufọk esie? Ndi ete m̀mê eka oro asan̄ade ye n̄kpri nditọ ekeme ndiyom un̄wam ke ini abuanade ke utom ukwọrọikọ? Ndi odu mbon oro ẹsikopde bụt, oro ẹkpemade ẹn̄wam mmimọ ke ini ẹnamde mfiakn̄ka m̀mê ẹbuanade ke mme ikpehe utom ukwọrọikọ eken? Ima ima udọn̄ oro inyenede ke idem nditọete nnyịn oyonụk nnyịn ndiyom mme usụn̄ oro idin̄wamde mmọ ẹkọri.—Rome 14:19.
4 Nte nnyịn ikpebede eti usụn̄ oro Jehovah ekerede aban̄a mme asan̄autom esie, nnyịn iyọsọn̄ọ kiet eken idem, in̄wam ndinam esop adiana ọtọkiet, inyụn̄ inọ Ete nnyịn eke heaven ubọn̄.—Eph. 4:16.