Ana Nnyịn Ikpono Odudu Ukara Jehovah

Nso edu ke afo esiti ke ini okopde mme enyịn̄ eset nte Korah, Dathan, ye Abiram? Nsọn̄ibuot! Ẹsọn̄ ye nso? Ẹsọn̄ ye odudu ukara Abasi. Ẹwet ọyọhọ ntọt aban̄ade akama-mfụhọ usụn̄ uwem mmọ ke Numbers ibuot 16, ẹnyụn̄ ẹtịn̄ ibio ibio ẹban̄a n̄kpọ emi ke ibuotikọ oro “Sụk Ibuot Nọ Odudu Ukara Abasi Ke Edinam Akpanikọ,” ke Enyọn̄-Ukpeme August 1, 2002. Ọyọfọn okot ibuotikọ emi onyụn̄ ese enyene-ndịk n̄kpọ oro eketịbede ke vidio oro Respect Jehovah’s Authority. Afo oyokụt utọk oro ekedemerede ke ufọt mme anam-akpanikọ nditọ Korah ye ọsọn̄ibuot ete mmọ oro ọkọtọhọde ye Andikara ekondo. (Num. 26:9-11) Drama emi owụtde se ikenen̄erede itịbe mi ekpenyene ndidemede udọn̄ nnyịn ndinen̄ede nnam akpanikọ nnọ Jehovah ọyọhọ ọyọhọ.

Nte afo esede vidio emi, yom mme uyarade oro ẹwụtde ke Korah ye mme anditiene enye ẹma ẹkpu ndibe udomo edinam akpanikọ ke akpan ikpehe itiokiet: (1) Didie ke mmọ ẹkesọn̄ ibuot ye odudu ukara Abasi? (2) Didie ke mmọ ẹkeyak idem ẹnọ ntan̄idem, idiọk udọn̄, ye ufụp? (3) Didie ke mmọ ẹkewụk ntịn̄enyịn ke unana mfọnmma mbon oro Jehovah emekde? (4) Nso edu n̄kụni ekedemede ke esịt mmọ? (5) Ntak emi mmọ mîkoyụhọke ye mme ifetutom mmọ? (6) Didie ke mmọ ẹkeyak mme ufan ye ubon ẹdi ebeiso n̄kpọ ẹnọ edinam akpanikọ nnọ Abasi?

Kere nte mme n̄kpọ oro ikpepde ito drama Bible emi ẹwụtde nte nnyịn ikpesede odudu ukara Abasi mfịn: (1) Didie ke nnyịn ikpanam n̄kpọ iban̄a mme ubiere mbiowo ke esop, ndien ntak-a? (2) Didie ke nnyịn ikpọbiọn̄ọ ndiọi uduakesịt ekededi? (3) Didie ke nnyịn ikpanam n̄kpọ iban̄a unana mfọnmma mbon oro ẹmekde ndida usụn̄? (4) Nso ke nnyịn ikpanam edieke edu n̄kụni ọtọn̄ọde ndidemede ke esịt nnyịn? (5) Didie ke nnyịn ikpese ifetutom ekededi oro ẹnọde nnyịn? (6) Mmanie ke nnyịn mîkpayakke ẹbiọn̄ọ nnyịn ke edinam akpanikọ nnyịn nnọ Abasi, ndien ini ewe ke emi ekeme ndidi ọkpọsọn̄ n̄kpọ?

Ke ẹma ẹkeneme ntọt emi ke esop, ntak mûfiakke use vidio emi? Yak enye enen̄ede ọnọ fi ntak oro anade nnyịn ikpono odudu ukara Jehovah kpukpru ini!—Ps. 18:25; 37:28.