Obufa Usụn̄ Ndidụn̄ọde Mme Ndutịm Mbono
Nte ererimbot Satan ọdiọn̄de-diọn̄ ọdiọk, Jehovah ọsọn̄ọ nnyịn idem man “idianade ikpọn̄ idiọk ido ye idiọk udọn̄ ererimbot, idu uwem ke eti ibuot ye edinen ido ye ido Abasi ke eyo emi.” (Titus 2:12) Ndutịm mbono circuit ye usen akpan mbono eke isua ke isua edi kiet ke otu ndutịm oro enye adade “asan̄autom emi anamde akpanikọ, onyụn̄ enyenede ọniọn̄” anam. (Matt. 24:45) Mme mboho emi ẹsisọn̄ọ nnyịn idem didie ntem!
Man ẹn̄wam nnyịn nditi nnyụn̄ nda mme item oro ẹnọde nnam n̄kpọ, ẹyeda obufa usụn̄ ẹdụn̄ọde mme ndutịm mbono ke 2005. Page 5-6 ke esịne-esịt emi ẹsịne mme ibuotikọ emi ẹwụtde se ẹdinemede ye mme mbụme ndụn̄ọde ke ndutịm mbono kiet kiet. Mme esop ẹyeneme ntọt emi ke Esoputom esisịt ini mbemiso ẹkade ye ke ẹma ẹkenyọn̄ọ mbono mmọ. Didie ke ẹdinam emi?
Urua kiet m̀mê iba mbemiso esop ẹkade mbono circuit, ẹyenọ utịn̄ikọ ke minit duop ọkọn̄ọde ke ibuotikọ oro “Obufa Ndutịm Mbono Circuit” ke Esoputom man ẹnam kpukpru owo ẹdu ke mben̄eidem ẹnọ ndutịm mbono. Etịn̄ikọ oyodụri ntịn̄enyịn n̄ko owụt mme mbụme ndụn̄ọde onyụn̄ esịn udọn̄ ọnọ kpukpru owo ndiwet mme n̄kpọ man ẹben̄e idem ẹnọ ndụn̄ọde oro editienede urua ifan̄ ke ẹma ẹkenyọn̄ọ mbono.
Urua ifan̄ ke ẹma ẹkenyọn̄ọ mbono, ẹyeda minit 15 ẹdụn̄ọde ndutịm akpa usen mbono ke Esoputom. Ke urua oro etienede, ẹyeda minit 15 ẹdụn̄ọde ndutịm oro ẹkenemede ke ọyọhọ usen iba. Ndụn̄ọde oro edikọn̄ọ ke mme mbụme oro ẹmịn̄de ke esịne-esịt emi. Ndụn̄ọde oro ekpenyene ndiwụk ntịn̄enyịn ke ata ufọn oro ẹkebọde ẹto ndutịm mbono oro. Mbiowo ẹkeme ndinam ndutịm ndibiat, ndikpụhọde ndusụk n̄kpọ, m̀mê ndinam ndutịm en̄wen nnọ mme ikpehe eken ke Esoputom man ufan̄ ẹdu ẹnọ nneme ndụn̄ọde emi.
Ẹditiene ukem ndutịm emi ke usen akpan mbono, edi ẹdida minit 15 ke urua kiet kpọt idụn̄ọde ofụri ndutịm mbono oro. Kpukpru nnyịn iyama nditịm esịne-esịt emi nnịm inyụn̄ ida enye inam n̄kpọ man ibọ ufọn ọyọhọ ọyọhọ ito nti item oro Jehovah ọnọde.—Isa. 48:17, 18.