Nte Ẹkpekwọrọde Ikọ ke Efakutom Mbubehe
1. Mme ufọn ewe ke ẹsinyene ẹto edikwọrọ ikọ ke efakutom mbubehe?
1 Ndi akpama ndikwọrọ ikọ ke efakutom oro mme owo ke ofụri ofụri ẹdarade isenowo ye ebiet oro okụtde mme owo ke ufọk? Afo emekeme ndinam emi idem ke efakutom oro ẹbaharede ẹnọ esop mbufo. Didie? Ebe ke ndika mme itie mbubehe oro ẹdude do. Mme asuanetop oro ẹsikwọrọde ikọ to ke ufọkurua sịm ufọkurua ẹsinyene nti utịp.
2. Didie ke ẹkpediomi ukwọrọikọ ke efakutom mbubehe?
2 Ndusụk esop ẹnyene mme ikpehe mbubehe (esịnede urua) nte ubak efakutom oro ẹnọde mmọ. Eyenete oro esede aban̄a efakutom ekeme nditịm san̄asan̄a kad ndise efakutom nnọ mme ikpehe mbubehe emi mme owo ẹwakde etieti. Ẹkpenyene ndiwụt in̄wan̄-in̄wan̄ ke mme kad ndise efakutom ufọkidụn̄ ekededi emi ẹbede ẹdụk mmọ nte ke owo inyeneke ndinam utom ke mme ikpehe mbubehe nte ubak efakutom oro. Ke mme efakutom eken, ẹkeme ndinam utom ke mme itie mbubehe ke adianade ye mme ufọkidụn̄. Edieke akanam afo mûnamke utom ke efakutom mbubehe, tọn̄ọ ke ndikwọrọ ikọ ke n̄kpri ufọkurua ifan̄.
3. Nso idin̄wam nnyịn ndikụt unen ke ini ikwọrọde ikọ to ke ufọkurua sịm ufọkurua?
3 Da Mmemmem Usụn̄ Utọn̄ọ Nneme: Ke ini ọkwọrọde ikọ to ke ufọkurua sịm ufọkurua, ọfọn ndisịne n̄kpọ nte ekpesịnede ke ini odụkde mbono esop ke Ufọkmbono Obio Ubọn̄. Odot n̄ko ndimek ini oro mbonurua mîwakke ke ufọkurua. Edieke ekemede, dụk ke ini mbonurua ndomokiet mîdụhe. Dọhọ ke iyom ndinyene nneme ye owo emi esede enyịn. Nam ibio ibio. Nso ke ekpetịn̄?
4-6. Nso ke nnyịn ikeme nditịn̄ ke ini ikwọrọde ikọ inọ andinyam ufọkurua m̀mê esenyịn ufọkurua?
4 Ke ini enemede nneme ye andinyam m̀mê esenyịn ufọkurua, afo emekeme ndidọhọ: “Nnyịn isisọpke ikụt mme anam mbubehe ke ufọk ke ntak mbubehe mmọ, oro anam nnyịn idi mi ke itie mbubehe fo. Mme magazine nnyịn ẹsineme mme n̄kpọntịbe ererimbot eke ndondo emi.” Ekem sio n̄kpọ kiet oro ẹnemede ke magazine kiet wụt.
5 Mîdịghe, afo emekeme ndidomo ibio ibio usụn̄ utọn̄ọ nneme emi: “Ediwak owo ẹkpema ndifiọk n̄kpọ efen efen mban̄a Bible, edi mmọ isinyeneke ini. Tract emi etịn̄ aban̄a ukpepn̄kpọ Bible mfọn oro ekemede ndibọrọ mme mbụme Bible fo.” Ekem, wụt page 4-5 ke tract oro Nte Afo Akpama Ndifiọk N̄kpọ Efen Efen Mban̄a Bible?
6 Edieke etiede nte ke owo oro esede aban̄a itie oro inyeneke ini, afo emekeme ndinọ tract kpọt onyụn̄ ọdọhọ ete: “Nyafiak n̄waha ini efen, ke ini ifet odude. Nyama ndifiọk se afo ekerede aban̄a tract emi.”
7. Didie ke nnyịn ikeme ndikọri udọn̄ oro ikụtde ke efakutom mbubehe?
7 Ndikọri Udọn̄ Oro Ẹkewụtde: Afo emekeme ndinịm ukpepn̄kpọ Bible ke efakutom mbubehe. Akpan asiakusụn̄ kiet ama esimen mme magazine ọsọk anam mbubehe kiet. Ke ini eren oro okowụtde esịtekọm aban̄a se enye okokotde, asiakusụn̄ oro ama anam ndutịm ukpepn̄kpọ Bible owụt enye, adade ediye uduot ekpri n̄wed Oyom. Ẹma ẹnịm ukpepn̄kpọ do ye enye ke itie mbubehe esie. Ke ekerede aban̄a idaha oro okodude, asiakusụn̄ emi ama esida minit 10 esịm minit 15 ini kiet ekededi oro enịmde ukpepn̄kpọ emi. Ukem ntre, nnyịn ikpakam ika iso ndidụn̄ọde nyom mbon oro ẹdotde ebe ke ndikwọrọ ikọ ke efakutom mbubehe.