Ndinọ Jehovah Se Ifọnde Ikan
1 Ibet emi Jehovah ọkọnọde nditọ Israel ọkọdọhọ ete ke mme unam emi ẹdiwade ẹnọ imọ ẹnyene ‘ndifọn mma.’ Owo ikenyịmeke ẹwa unam emi obiomode ndo. (Lev. 22:18-20; Mal. 1:6-9) Ke adianade do, ke ini ẹkewade uwa, ofụri ikpọn̄—mfọnn̄kan ikpehe—ekenyene Jehovah. (Lev. 3:14-16) Nte Ete ye Andinyene nditọ Israel, Jehovah ama odot ndibọ se ifọnde ikan.
2 Nte ekedide ke eset, Abasi enen̄ede enyene udọn̄ ke orụk uwa oro nnyịn iwade mfịn. Utom nnyịn ekpenyene ndiwụt ata ukpono oro inyenede inọ Jehovah. Edi akpanikọ nte ke idaha owo ye owo idịghe ukem. Kpa ye oro, oyom nnyịn idụn̄ọde idem nnyịn ise man ikụt ite ke nnyịn ke inọ enye se ifọnde ikan.—Eph. 5:10.
3 Utom Ofụri Esịt: Man utom ukwọrọikọ nnyịn ada ukpono ọsọk Jehovah onyụn̄ otụk esịt mbon oro ẹkpan̄de utọn̄ ẹnọ nnyịn, inaha enye etie enyọn̄ enyọn̄. Se itịn̄de iban̄a Abasi nnyịn ye mme utịbe uduak esie ẹkpenyene ndito esịt emi ọyọhọde ye ekọm. (Ps. 145:7) Emi owụt nte edide akpan n̄kpọ ndika iso nnyene eti ndutịm edikot Bible ye edikpep n̄kpọ.—N̄ke 15:28.
4 Ndinọ Jehovah se ifọnde ikan abuana n̄ko ndikpebe ima emi enye amade mme owo. (Eph. 5:1, 2) Ima oro imade mme owo ayanam nnyịn idomo ndida etop akpanikọ emi ọnọde uwem nsọk adan̄a ediwak owo nte ikekeme. (Mark 6:34) Enye anam nnyịn iwụt ọkpọkpọ udọn̄ ke idem mbon oro nnyịn itịn̄de ikọ inọ. Enye anam nnyịn ika iso ikere iban̄a mmọ tọn̄ọ ke akpa ini oro isobode ye mmọ onyụn̄ anam isọsọp ifiak ika ibịne mmọ. Enye onụk nnyịn ndinam kpukpru se ikemede ndin̄wam mmọ ẹkọri ke n̄kan̄ eke spirit.—Utom 20:24; 26:28, 29.
5 “Uwa Ekọm”: Usụn̄ efen emi inọde Jehovah se ifọnde ikan edi ndisịn ifịk ke utom ukwọrọikọ nnyịn. Ke ini itịmde idem ọfọn inyụn̄ inọde ntịn̄enyịn ke ukwọrọikọ nnyịn, nnyịn imekeme ndinam ekese ufọn ke ekpri ini oro inyenede. (1 Tim. 4:10) Nditịm idem anam nnyịn itịn̄ ikọ nte an̄wan̄ade ye nsọn̄uyo, ke ntre inamde edi mmemmem n̄kpọ ọnọ mme owo ndinam n̄kpọ mban̄a emi. (N̄ke 16:21) Nte nnyịn ibuanade eti mbụk ye mbon efen, ẹkeme ndidọhọ nte enende ẹte ke ikọ ofụri esịt oro itịn̄de edi “uwa ekọm.”—Heb. 13:15.