“Ẹben̄e Idem”
1 Ke akwa ntịn̄nnịm ikọ esie aban̄ade utịt editịm n̄kpọ emi, Jesus ama odụri nnyịn utọn̄ ẹte ikûyak mme ekikere uwem ererimbot emi ẹdia nnyịn idem. (Matt. 24:36-39; Luke 21:34, 35) Sia akwa ukụt ekemede nditọn̄ọ ini ekededi, edi akpan n̄kpọ ete nnyịn inam item Jesus emi: “Ẹben̄e idem; koro ke ini eke mbufo mîdorike enyịn, Eyen Owo eyedi.” (Matt. 24:44) Nso ikeme ndin̄wam nnyịn ke afan̄ emi?
2 Ndin̄wana N̄kan Mme Editịmede Esịt ye Mme N̄kpọ Oro Ẹwọn̄ọrede Owo Ntịn̄enyịn: “Ekikere uwem” edi kiet ke otu mme n̄kpọ iduọ eke spirit oro anade nnyịn ikpeme ibiọn̄ọ. (Luke 21:34) Ke ndusụk idụt, ubuene, unana utom, ye ekọmurua n̄kpọ udu uwem ndidọk ẹsinam ọsọn̄ ndinyene mme n̄kpọ oro ẹyomde ke uwem. Ke mme idụt en̄wen, ndikọ inyene obụkidem edi ọsọ n̄kpọ. Edieke editịmede esịt mban̄a mme n̄kpọ obụkidem ọtọn̄ọde ndikara ekikere nnyịn, nnyịn imekeme nditre ndiwụk ntịn̄enyịn ke mme ata idem n̄kpọ Obio Ubọn̄. (Matt. 6:19-24, 31-33) Mme mbono esop Christian ẹsin̄wam nnyịn ndinam emi. Nte afo emesinam edi utịtmbuba fo ndidụk kpukpru mbono esop?—Heb. 10:24, 25.
3 Ererimbot mfịn ọyọhọ ye mme n̄kpọ oro ẹwọn̄ọrede owo ntịn̄enyịn emi ẹkemede ndidia ọsọn̄urua ini nnyịn mmemmem mmemmem. Edida kọmputa nnam n̄kpọ ekeme ndikabade ndi afia edieke owo abiatde ini oro awakde akaha ke ndidụn̄ọde Intanet, ndikot nnyụn̄ nda kọmputa nnọ etop, m̀mê ndibre mme mbre kọmputa m̀mê mme mbre en̄wen. Edika esen, edise TV, edise senima, edinam mme edinam ini nduọkodudu, edikot mme n̄wed ererimbot, ye edibre mbre mbuba ẹkeme ndida ata akamba ubak ini nnyịn tutu nnyịn inyeneke ini m̀mê odudu ndida nnam mme n̄kpọ eke spirit. Ke adan̄aemi unọ idem nduọkodudu ekemede ndinam owo okop idem inem ke ibio ini, ukpepn̄kpọ Bible idemowo ye eke ubon ẹsinyene mme nsinsi ufọn. (1 Tim. 4:7, 8) Nte afo emesidep ifet nditie n̄kere Ikọ Abasi kpukpru usen?—Eph. 5:15-17.
4 Nnyịn iwụt esịtekọm didie ntem nte ke esop Jehovah amanam ndutịm unọ ukpep eke spirit man an̄wam nnyịn “ndibọhọ kpukpru n̄kpọ oro ẹdiwọrọde, nnyụn̄ nda ke iso Eyen Owo”! (Luke 21:36) Nnyịn ikpakam ibọ ufọn ọyọhọ ọyọhọ ito mme ndutịm emi inyụn̄ ‘iben̄e idem’ man mbuọtidem nnyịn ekeme ndidi “n̄kpọ itoro ye ubọn̄ ye ukpono ọnọ mbufo ke adan̄aemi Jesus Christ ediyararede idem.”—1 Pet. 1:7.