Usụn̄ Oro Adade Esịm Nsinsi Uwem—Nte Afo Omokụt Enye?
1 Emi edi ibuotikọ obufa ediye uduot ekpri n̄wed oro ẹkesiode ke Mbono District “Ifịk Ifịk Mme Anditan̄a Obio Ubọn̄” nnyịn eke ndondo emi. Ẹyak nnyịn imehe ye ediye obufa n̄kpọutom emi enyenede uforo mi, oro ẹtịmde akpan akpan ẹnọ an̄wautom Africa. Emekeme ndida enye n̄kpep n̄kpọ ye ubon fo nnyụn̄ nda nnịm mme ukpepn̄kpọ Bible ye mbon en̄wen. Nte eyịghe mîdụhe enye edidi kiet ke otu akpan n̄kpọutom nnyịn ndida ntọn̄ọ mme ukpepn̄kpọ Bible! Nte afo emetịn̄ enyịn okot enye? Mbọk kot.
2 Kam se akpa udịmikọ iba oro ẹdude ke Ukpepn̄kpọ 1: “Ekpere ndidi kpukpru owo ke Africa ẹnyịme ẹte ke edi akpan n̄kpọ ndituak ibuot nnọ Abasi. Edi, owo idụhe ke n̄kemuyo iban̄a nte ẹkpetuakde ibuot ẹnọ enye.” Enye enen̄ede anam ido ukpono obio ke Africa ye ọsọ ndịk oro mme owo ẹkopde ẹban̄a ifọt, an̄wan̄a. Enye ayan̄wam mme owo ndikụt nte ẹkpemekde ido ukpono akpanikọ ke adan̄aemi mmọ ẹsobode nsio nsio ido ukpono oro ẹtịmerede owo, akpan akpan koro ẹsiakde ediwak mbufa ido ukpono kpukpru usen. Enye enyene ediwak ndiye ndise ye mme uwụtn̄kpọ oro ẹsọpde ẹn̄wan̄a owo. Enye akama ata okopodudu etop ọnọ mbon Africa! Kam kere ban̄a ndusụk ibuot nneme oro ẹsịnede ke obufa ediye uduot ekpri n̄wed emi:
● Ukpepn̄kpọ 3 enen̄ede owụt owo emi Jehovah, Jesus, ye mme angel ẹdide ndien ekem owụt ebiet emi Satan ye mme demon esie ẹtode ye nte mmọ ‘ẹbian̄ade ofụri ererimbot.’—Edi. 12:9.
● Ukpepn̄kpọ 4 etịn̄ aban̄a edituak ibuot nnọ mme ete ete ye mme ido edinam, ntak emi mbon Africa ẹnịmde emi ke akpanikọ, ye ntak emi enye mînyeneke ufọn edi enen̄erede ọnọ unan. Enye anam an̄wan̄a ke mmemmem usụn̄, ntak emi ukpọn̄ m̀mê spirit mîsikaha iso idu uwem ke owo ama akakpa.
● Ukpepn̄kpọ 5, emi ẹkotde “Akpanikọ Aban̄ade Mfọni, Ubre-Idiọn̄, ye Ifọt” owụt nte mme utọ edinịm ke akpanikọ oro ẹnen̄erede ẹdọn̄ n̄kam ke ido mbon Africa. Ikpehe ekikere 4 ọdọhọ ete: “Ẹdọhọ ke mme ifọt ẹsiwọrọ ẹkpọn̄ idem mmọ ke okoneyo ẹnyụn̄ ẹfe, edide man ẹkesobo ye mme ifọt eken m̀mê man ẹkewot mbon oro mmọ ẹnọmọde.” Didie ke nnyịn ikeme ndiwụt ke emi edi nsu? Ikpehe ekikere 10-12 ẹnọ ibọrọ. Ikpehe ekikere 7 owụt nte Satan abian̄ade mme owo man ẹkere ke imọ imenyene odudu ikan nte imọ inen̄erede inyene. Ikpehe ekikere 15-17 ẹwụt ke Jehovah enen̄ede enyene odudu akan mme demon, koro enye edide ata ọkpọsọn̄. Ikpehe ekikere 7 ye 8 ẹwụt ke mme edinịm ke akpanikọ oro nte ke n̄kpọ ndomokiet isitịbeke m̀mê nte ke owo ndomokiet isikpaha ke mîbọhọke oto ndedịbe odudu, edi nsu.
● Ukpepn̄kpọ 6-9 ẹn̄wam mme owo ndikụt in̄wan̄-in̄wan̄ nte ẹkpediọn̄ọde ido ukpono akpanikọ ke otu kpukpru nsunsu ido ukpono. Ikpehe ekikere 9-11 ke Ukpepn̄kpọ 7 ẹwụt nte ke mme utịbe utom oro mme ufọkabasi mbon Africa ẹdọhọde nte inamde ẹdi n̄kaiso utịbe utom emi otode odudu ifọt oro mme owo ẹsimade ndinịm ke akpanikọ. Ẹsịn udọn̄ ẹnọ mme owo ke Ukpepn̄kpọ 8 ẹte ẹbuana ye ido ukpono akpanikọ.
3 Nte afo unyịmeke ute ke obufa ediye uduot ekpri n̄wed emi edidi okopodudu n̄kpọutom ndida nnam n̄kpọ ke utom eke enyịnusụn̄-ke-enyịnusụn̄, mfiakn̄ka, ye ukpepn̄kpọ Bible? Ekeme ndiyom afo ekpep enye ye owo oro oyomde ndina baptism. Emi eyenyene ufọn edi idịghe nte ke owo mîkpepke enye inaha baptism. Enye eyenyene ufọn ke ediwak usụn̄ efen. Ke ntak oro mme ndedịbe n̄ka ẹtarade ẹyọhọ ufọkn̄wed ke idụt emi, ọkpọfọn mme ete ye eka nditịn̄ enyịn n̄kpep ediye uduot ekpri n̄wed emi ye nditọ mmọ. Emi eyekpeme mmọ ọbiọn̄ọ mbon oro ẹdomode ndibuan mmọ ke ubụpekpo ebe ke nditoro enye nte n̄kpọ ndida n̄kpeme idem nnyụn̄ n̄n̄wam mmọ ndibe udomo ọfọn. Ẹkeme ndida enye n̄kpep n̄kpọ ye mbon oro ẹsụk ẹkopde ndịk ẹban̄a ifọt, m̀mê mbon oro ẹkopde ndịk nte ke owo “edi ntak” udọn̄ọ mmimọ. Enye edi kiet ke otu n̄wed oro ẹnọde ke June. Ka iso da enye nam n̄kpọ ọyọhọ ọyọhọ!