Ikọ Abasi Edi Akpanikọ
1. Nso akpan ntọt isịne ke Bible?
1 Andiwet psalm ekewet ete: “Ofụri ikọ fo edi akpanikọ.” (Ps. 119:160) Ebede ke Ikọ esie eke odudu spirit, Jehovah ọnọ mme ibọrọ oro ẹnọde uyụhọ ke mme akpan mbụme oro ẹban̄ade uwem. Enye ọnọ mbon oro ẹnyenede mfịna, ndọn̄esịt ye idotenyịn. Enye onyụn̄ owụt nnyịn nte ikpasan̄ade ikpere enye. N̄wan kiet oro owụtde esịtekọm ọkọdọhọ ete: “Ndikpep akpanikọ otode Bible etie nte ediwọrọ ke ata n̄kịmn̄kịm ebiet nnyụn̄ ndụk [n̄n̄wan̄a n̄n̄wan̄a], nyayama, ye inem inem ubet.” Nte afo emesidomo ndibuana akpanikọ Ikọ Abasi ye mme owo ke kpukpru ifet?
2. Didie ke Bible ofori uwem mme owo?
2 Odudu Ndikpụhọde Nnyụn̄ Ndemede Udọn̄ Mme Owo ke Ofụri Ererimbot: Akpanikọ Bible enyene odudu nditụk esịt nnyụn̄ n̄kpụhọde uwem mme owo. (Heb. 4:12) N̄kaiferi kiet emi ekerede Rosa ama esịn idem ke usan̄a akpara, ọkọrọ ye uda n̄kpọsọn̄ mmịn ye n̄kpọsọn̄ ibọk ke idiọk usụn̄. Enye ọdọhọ ete: “Usen kiet, ke ini n̄kodude ke ata itie unana idotenyịn, ebe ye n̄wan ẹdide Mme Ntiense ẹma ẹtịn̄ ẹnọ mi ẹban̄a nte Bible ekemede ndin̄wam nnyịn ikọk mme mfịna nnyịn. Mma ntọn̄ọ ndikpep Ikọ Abasi, emi n̄kokụtde nte edemerede udọn̄. Ke ufan̄ ọfiọn̄ kiet mma n̄keme nditọn̄ọ edisana, obufa uwem. Kemi mma n̄kenyene uduak ke uwem, n̄koyomke aba un̄wam otode n̄kpọsọn̄ mmịn m̀mê n̄kpọsọn̄ ibọk. Ndien sia n̄kenen̄erede nyom ndidi ufan Jehovah, mma mbiere ndida mme edumbet esie ndu uwem. Ke mîkpedịghe ata ọniọn̄ Ikọ Abasi, mmenịm ke akpanikọ nte ke etisịm idahaemi n̄kpokowot idem.”—Ps. 119:92.
3. Ntak emi nnyịn mîkpetreke ndibuana etop Bible ye mbon en̄wen?
3 Ke mîbietke ekese n̄wed mfịn, Bible edemede udọn̄ mme owo ke ‘kpukpru obio, esien, idụt ye usem.’ (Edi. 7:9) Uduak Abasi edi nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Tim. 2:4) Ke ntre, nnyịn ikpedehede ikere nte ke owo idikpan̄ke utọn̄ inọ eti mbụk ke ntak idaha esie ke uwem. Utu ke oro, buana etop Obio Ubọn̄ ye kpukpru owo, okotde nnennen nnennen oto Bible ini ekededi oro ekemede.
4. Didie ke nnyịn ikeme ndida Bible nnam n̄kpọ ke ini inọde ikọ ntiense?
4 Da N̄wed Abasi Nam N̄kpọ: Ediwak ifet ẹdu ndida Bible nnam n̄kpọ ke utom ukwọrọikọ. Ke ini ọnọde mme magazine, domo ndikot itie N̄wed Abasi oro odude ke mme ekikere oro ẹnọde ẹban̄a nte ẹkpenọde mme magazine. Ke ini ẹnọde n̄wed oro ẹnọde ke ọfiọn̄, ndusụk owo ẹkụt nte enyenede uforo ndikot itie N̄wed Abasi kiet oro ẹkemekde ye ntịn̄enyịn, ke ntọn̄ọikọ mmọ. Ke ini anamde mfiakn̄ka, kot itie Bible kiet m̀mê iba ke kpukpru ini oro akade man an̄wam enyeneufọk aka iso enyene nnennen ifiọk. Ke ini enịmde ukpepn̄kpọ Bible, yak nneme oro owụhọ ke mme akpan itie N̄wed Abasi. Ke ini mûbuanake ke utom ukwọrọikọ, yak Bible odu ekpere man ada anam n̄kpọ ke ini emi mme ifet ẹberede ndinọ ikọ ntiense ido nneme.—2 Tim. 2:15.
5. Ntak emi nnyịn ikpesịnde ukeme ndida Bible nnam n̄kpọ ke utom ukwọrọikọ nnyịn?
5 Nnyịn ikpakam in̄wam mbon efen ẹbọ ufọn ẹto odudu emi Ikọ akpanikọ Abasi enyenede ndidemede udọn̄ ebe ke ndida Bible nnam n̄kpọ ke kpukpru ifet oro odotde ke utom ukwọrọikọ nnyịn.—1 Thess. 2:13.