Ẹyak Gospel Ẹsịn Nnyịn ke Ubọk
1 Nso akwa ifet ke nnyịn inyene ntem ndidi se ẹyakde gospel Abasi ẹsịn ke ubọk! (1 Thess. 2:4) Ke adan̄aemi ndusụk owo mînyịmeke okopodudu etop emi, etop emi esidụri mbon esịt akpanikọ ada nte edinem ufịk esidụride owo ada. (2 Cor. 2:14-16) Emi ọwọrọ edinyan̄a ọnọ mbon oro ẹnyịmede ẹnyụn̄ ẹsụkde ibuot ẹnọ gospel emi. (Rome 1:16) Didie ke ikpanam n̄kpọ iban̄a gospel oro ẹyakde ẹsịn nnyịn ke ubọk mi?
2 Jesus ye Mme Apostle: Jesus akada editan̄a eti mbụk nte ebeiso n̄kpọ. (Luke 4:18, 43) Idem ke ini enye okokopde mba ye biọn̄, ima oro enye akamade mme owo ye esịtekọm oro enye ekenyenede aban̄a etop emi ẹma ẹnụk enye ndibuana eti mbụk emi ye mbon en̄wen. (Mark 6:30-34) Ebede ke ikọ ye ke uwụtn̄kpọ, enye ama anam mme mbet esie ẹkụt nte utom edikwọrọ Obio Ubọn̄ edide akpan n̄kpọ.—Matt. 28:18-20; Mark 13:10.
3 Ke ndikpebe Jesus, mme apostle ẹma ẹtan̄a etop Obio Ubọn̄ emi ifịk ifịk. Idem ke ini ẹkemiade ẹnyụn̄ ẹwụkde mmọ ẹte ẹtre ndikwọrọ ikọ, ‘mmọ ikodopke uyo ndikpep nnyụn̄ n̄kwọrọ eti mbụk.’ (Utom 5:40-42) Apostle Paul ama anam utom emi ikpaha mba. (1 Cor. 15:9, 10; Col. 1:29) Enye ekemen ifet edibuana eti mbụk odomo ye isọn oro enye akakamade ekemmọ mme owo, enye ama onyụn̄ enyịme ndiyak ọkpọkpọ ifụre esie atak man ekeme ndinam utom oro ẹkedọn̄de enye.—Utom 20:24; Rome 1:14-16.
4 Utom Nnyịn Mfịn: Esịtekọm oro inyenede iban̄a edisana utom oro ẹkeyakde ẹsịn nnyịn ke ubọk oyonụk nnyịn ndiyom mme usụn̄ nditat ebuana oro inyenede ke utom ukwọrọikọ. (Rome 15:16) Edward, oro ekesitiede ke n̄kpọitie mbon n̄kpọnnam ama esinyene nneme ye isenowo ke inuaotop ufọkisen aban̄a ido ukpono esie. Nte ededi, ke ọdọn̄de enye ndinam ekese, enye ama ọdọhọ ẹbọp san̄asan̄a ufọk ẹdori ẹnọ imọ ke enyọn̄ pickup, ndien enye ama ada moto emi anam utom usiakusụn̄ ke ediwak isua, awatde ediwak tọsịn kilomita. Ukem nte Edward, ediwak owo mfịn ẹnam ukpụhọde ke mme idaha mmọ man ẹnen̄ede ẹsịn idem ke ndisuan eti mbụk emi.
5 Ke ndikpebe Jesus ye mme apostle, nnyịn ikpakam ida utom edikwọrọ ikọ mfịn nte ebeiso n̄kpọ ke uwem nnyịn. Ke ndinam ntre, nnyịn iwụt ima oro imade mme owo ọkọrọ ye esịtekọm oro inyenede iban̄a gospel oro ẹkeyakde ẹsịn nnyịn ke ubọk.