Usịnen̄kpọ Eke Owụtde Bụt Owụt Uten̄e Abasi
1. Didie ke nnyịn ikeme ndiwụt esịtekọm mban̄a mbono district nnyịn oro edide?
1 Ke mîbịghike nnyịn iyenyene ifet ndidi isen nnọ Jehovah ke Mbono District “Ẹnọ Abasi Ubọn̄” eke 2003. Nnyịn iwụt esịtekọm didie ntem inọ Jehovah ke enye ndikot nnyịn utọ akwa udia eke spirit oro! Nnyịn imekeme ndiwụt uten̄e oro iten̄ede enye ye esịtekọm oro iwụtde iban̄a mme ndutịm eke spirit esie ke usụn̄ oro isịnede n̄kpọ inyụn̄ ikamade idem nnyịn.—Ps. 116:12, 17.
2. Ntak edide akpan n̄kpọ nnyịn ndisana nnyụn̄ n̄kama idem ediye ediye?
2 Asana Onyụn̄ Eye: Ukamaidem nnyịn ekpenyene ndiwụt mme idaha Abasi nnyịn, emi asanade onyụn̄ anamde n̄kpọ ke ndutịm. (1 Cor. 14:33; 2 Cor. 7:1) Idem, idet, ye mbara nnyịn ẹkpenyene ndisana, ndien nnyịn ikpenyene ndikama idem ediye ediye. Ndikama idem mbumịn mbumịn edi ọsọ n̄kpọ mfịn. Nte ededi, iwọrọke ite sia ata ndise senima m̀mê ata mbre mbuba akamade idem nsuahade nsuahade, ke ana Christian akama idem ntre. Edieke nnyịn itienede n̄kon̄ine usịnen̄kpọ, ekeme ndisọn̄ mme owo ndikụt ukpụhọde oro odude ke ufọt mbon oro ẹnamde n̄kpọ ata Abasi ye mbon oro mînamke.—Mal. 3:18.
3. Nso ke nnyịn ikeme ndinam man ukamaidem nnyịn odu ke n̄kemuyo ye item oro ẹkụtde ke 1 Timothy 2:9, 10?
3 Usịnen̄kpọ Oro Odotde ye Mme Asan̄autom Christian: Ke ini apostle Paul ekewetde n̄wed ọnọ ẹsọk Timothy, esenyịn Christian, enye ama esịn udọn̄ ọnọ “iban ẹsan̄a ke sụn̄-sụn̄ ido, ẹsịne n̄kpọ eke owụtde bụt ye eti ibuot: . . . ẹda nti ubọk-utom ẹbana idem; koro oro odot ye iban emi ẹdọhọde ẹte imenyene uten̄e Abasi.” (1 Tim. 2:9, 10) Oyom ntịn̄enyịn man usịnen̄kpọ nnyịn owụt iso o-bụt. Edisịnen̄kpọ nnyịn ekpenyene ndisana, ndiye, ndinyụn̄ n̄wụt iso o-bụt—idịghe eke n̄wụtidem m̀mê enye oro edemerede udọn̄ idan̄.—1 Pet. 3:3.
4, 5. Mme item ewe ke Christian iren ye iban ẹkpenam?
4 Paul ama ọnọ item n̄ko aban̄a ebeubọk “edidọk idet, ye gold ye pearl ye ọsọn̄-urua edisịne-n̄kpọ.” (1 Tim. 2:9) Ndida ukem ukem ke edida mme n̄kpọmbana ye n̄kpọ mmaidem eken edi usụn̄ edinam oro owụtde eti ibuot ọnọ Christian iban nditiene.—N̄ke 11:2.
5 Ibet oro Paul ọkọnọde Christian iban abuana Christian iren n̄ko. Nditọete iren ẹkpenyene ndifep mme n̄kon̄ine oro ẹwụtde edu ererimbot. (1 John 2:16) Ke uwụtn̄kpọ, ke ndusụk idụt ẹma ndisịne ekpat ekpat ọfọn̄ oro okponde akan owo, edi n̄kon̄ine emi idịghe ukamaidem emi odotde ye asan̄autom Abasi.
6. (a) Ntak emi nnyịn ikpenyenede n̄kokon̄ idaha ke usịnen̄kpọ ye ukamaidem ke ini isan̄ade ke usụn̄ uka ye unyọn̄ mbono, ke ini idụkde mbono, ye ke ini ikpehe edinam asuanade kpukpru usen? (b) Ewe kad mbenọfọn̄ ke ẹkpenyene ndidian?
6 Ke Mme Ini Nduọkodudu: Ke ini edinam, ata ediwak nditọete iren ye iban ẹsinịm ata eti uwụtn̄kpọ ke usịnen̄kpọ ye ukamaidem. Nte ededi, mme ntọt ẹwụt ke ndusụk owo isidọn̄ke enyịn ke usịnen̄kpọ mmọ ke ini ẹsan̄ade ke usụn̄ uka m̀mê unyọn̄ mbono m̀mê ke ini ẹbuanade ke mme edinam ini nduọkodudu ke mme ikpehe edinam ẹma ẹkesuana. Ke akpanikọ, ukamaidem nnyịn—edide ke ini edinam m̀mê ke mme ini efen—otụk nte mbon en̄wen ẹsede ikọt Abasi. Sia nnyịn isidiande kad mbono district ke ọfọn̄ nnyịn, kpukpru ini nnyịn ikpenyene ndisịne n̄kpọ ke usụn̄ oro odotde mme asan̄autom Christian. (Sụk mme kad mbenọfọn̄ oro esop Abasi emịn̄de ke ẹkpenyene ndidian ke ọfọn̄. Ke ini edem, ndusụk owo ẹma ẹsidian kad mbenọfọn̄ oro ẹmịn̄de ke n̄kann̄kụk, emi enyenede nsio udomo, ndudiọn̄ ye uduot. Owo ikpenyeneke ndidian utọ kad oro. Edieke esop oyomde mme kad mbenọfọn̄ ye efọk kad efen efen, ẹkpenyene ndisịn eben̄e nnọ ẹsọk ọfis n̄kọk itieutom, ẹdade babru Literature Request S-14.) Emi esiwak ndinam mbon en̄wen ẹtoro nnyịn esinyụn̄ eberede usụn̄ edinọ ikọ ntiense.—1 Cor. 10:31-33.
7. Nso utịp ke usịnen̄kpọ ye ukamaidem nnyịn oro ẹwụtde iso-bụt ẹkeme ndinyene ke idem mbon en̄wen?
7 Kpa nte ufan ufan imam ekemede ndidian uyai ke iso nnyịn, kpasụk ntre ke usịnen̄kpọ ye ukamaidem oro ẹwụtde iso bụt ẹnọ etop oro nnyịn itan̄ade ye esop oro nnyịn idade ke ibuot esie, uku. Ekeme ndinụk ndusụk owo oro ẹkụtde nnyịn ke Mbono District “Ẹnọ Abasi Ubọn̄” isua emi ndibụp ntak emi nnyịn idide isio ndien ke akpatre mmọ ẹkeme ndidọhọ: “Ẹyak nnyịn ika ye mbufo: koro nnyịn imokop [inyụn̄ ikụt] ite ke Abasi odu ye mbufo.” (Zech. 8:23) Kpukpru nnyịn ikpakam iwụt uten̄e oro nnyịn iten̄ede Jehovah ebe ke usịnen̄kpọ ye ukamaidem nnyịn.
[Ekebe ke page 5]
Kama Idem Uku Uku
▪ Ke ini asan̄ade ke usụn̄
▪ Ke ini odụkde mbono
▪ Ke mme edinam ini nduọkodudu