‘Ndiyama nte Mme N̄kpọ Oro Ẹnọde Un̄wana’
1 Ke n̄kịmn̄kịm idaha eke spirit ye eke ido uwem editịm n̄kpọ emi, n̄kpọ nte miliọn owo itiokiet emi ẹtuakde ibuot ẹnọ ata Abasi, Jehovah, ke ‘ẹyama nte mme n̄kpọ oro ẹnọde un̄wana’ ke idụt 234 ke ofụri ererimbot. (Phil. 2:15, NW) Emi anam nnyịn iwọrọ ida san̄asan̄a. Didie ke nnyịn iwụt ọsọn̄urua un̄wana akpanikọ emi otode Jehovah?—2 Cor. 3:18.
2 Mme Edinam Nnyịn: Mme owo ẹsisọp ẹkụt edu uwem nnyịn. (1 Pet. 2:12) N̄wan kiet ama okụt ke Ntiense kiet emi edide nsan̄autom esie esifọn ido esinyụn̄ an̄wam mme owo inyụn̄ inyeneke idiọk ikọinua m̀mê nditiene nsak ke ini ẹnamde ndek ndek mbubru. Ke ini mbon en̄wen ẹkedomode ndiyat Ntiense oro esịt ebe ke nditịn̄ etịme etịme ikọ ke iso esie, enye ama esimụm idem akama onyụn̄ ọsọn̄ọ ada ọnọ se inende. Nso utịp ke emi ekenyene ke idem n̄wan emi? Enye ọdọhọ ete: “Mma mma edu esie tutu ntọn̄ọ ndibụp mme mbụme mban̄a Bible. Mma ntọn̄ọ ndikpep Ikọ Abasi ndien ekem nna baptism.” Enye adian do ete: “Edu uwem esie akanam mi ndụn̄ọde mme edinịm ke akpanikọ Mme Ntiense Jehovah.”
3 Edu oro inyenede iban̄a ukara, nte nnyịn isede mme edinam ererimbot, ye eti ikọinua nnyịn ẹnam nnyịn Mme Ntiense Jehovah iwọrọ ida san̄asan̄a nte mme owo oro ẹdade mme n̄kokon̄ edumbet Bible ẹdu uwem. Utọ nti edu oro ẹkeme ndida ubọn̄ nsọk Jehovah ẹnyụn̄ ẹnam mbon en̄wen ẹdituak ibuot ẹnọ enye.
4 Mme Ikọ Nnyịn: Nte ededi, ekeme ndidi mbon oro ẹkụtde eti edu uwem nnyịn idifiọkke ntak emi nnyịn idide isio ibọhọke nnyịn ineme mme edinịm ke akpanikọ nnyịn ye mmọ. Nte mme nsan̄autom fo m̀mê mme nsan̄a ufọkn̄wed fo ẹdiọn̄ọ ke afo edi kiet ke otu Mme Ntiense Jehovah? Nte afo emesiyom mme ifet ndiwọn̄ọde mme ikpîkpu nneme nsịn ke unọ ikọ ntiense? Nte edi ubiere fo ‘ndiyak un̄wana fo ayama ke iso owo’ ke kpukpru idaha oro ẹdotde?—Matt. 5:14-16.
5 Ndinam utom nnyịn nte mme ọnọ un̄wana oyom edu n̄waidem. Edu unam n̄kpọ ke ofụri esịt oyonụk nnyịn ndikpọn̄ mme n̄kpọ oro mîdịghe akpan n̄kpọ man ikpanam utom unyan̄a uwem eke edikwọrọ ikọ ye edinam mbet adan̄a nte ikekeme.—2 Cor. 12:15.
6 Nnyịn ikpakam ika iso ndiyama nte mme n̄kpọ oro ẹnọde un̄wana ebe ke mme edinam ye ikọ nnyịn. Edieke inamde, emi ekeme ndisịn udọn̄ nnọ mbon en̄wen nditiene nnyịn nnọ Jehovah ubọn̄.