Nyene Ọkpọsọn̄ Udọn̄ Ndinam Eti Ido!

¹ Nte nnyịn isan̄ade ikpere ini Editi eke 2003, nnyịn imenyene ekese ntak ‘ndinyene ọkpọsọn̄ udọn̄ ndinam eti ido.’ (1 Pet. 3:13) Akakan ke otu ntak emi edi uwa ufak Jesus Christ. (Matt. 20:28; John 3:16) Apostle Peter ekewet aban̄a emi ete: “Ikadaha mbiara n̄kpọ, kpa silver ye gold, ifak mbufo isio ke ndisịme edu uwem. . . . Edi ẹkeda iyịp eke ọsọn̄de urua ẹfak mbufo, nte iyịp eyen-erọn̄ eke ananade ndo onyụn̄ ananade ntọi, kpa eke Christ.” (1 Pet. 1:18, 19) Esịtekọm oro iwụtde iban̄a n̄wọrọnda edinam ima emi onụk nnyịn ndisịn idem nnam eti ido, ifiọkde ite ke Jesus ama ‘ayak Idem Esie ọnọ kaban̄a nnyịn, man Enye afak nnyịn osio ke kpukpru mme idiọk-n̄kpọ, onyụn̄ anam nnyịn asak-ubọk ikọt Esie, emi isịnde esịt inam nti utom.’—Titus 2:14; 2 Cor. 5:14, 15.

² Ke ini inamde se inemde Abasi esịt, nnyịn imesinyene eti itie ebuana ye enye inyụn̄ idu ke idak ima ima ukpeme esie. Peter ama aka iso ọdọhọ ete: “Owo emi edimade uwem, edinyụn̄ oyomde ndikụt edifọn ini, . . . yak enye ọwọn̄ọde ọkpọn̄ idiọk, onyụn̄ anam eti; yak enye oyom emem, onyụn̄ ebịne enye. Koro enyịn Jehovah ke esese ndinen owo, utọn̄ Esie onyụn̄ ọbiọn̄ọ eseme mmọ.” (1 Pet. 3:10-12). Ke enyene-ndịk eyo emi, nso edidiọn̄ ke edi ntem ndifiọk nte ke Jehovah ke ekpeme nnyịn onyụn̄ eben̄e idem ndinam n̄kpọ ke ibuot nnyịn, ‘ekpemede nnyịn nte eyen enyịn’ esie.—Deut. 32:10; 2 Chron. 16:9.

³ Kpa ye oro ẹkesobode mme idomo, akpa mme Christian emi Peter ekewetde n̄wed ọnọ ẹma ẹnen̄ede ẹnyene ifịk, ndien mmọ ẹma ẹtan̄a eti mbụk ntatara ntatara nte mmọ ẹkekeme. (1 Pet. 1:6; 4:12) Ntre ke edi ye ikọt Abasi mfịn. Okposụkedi nnyịn idude ke “ndiọk eyo,” ndiwụt esịtekọm mban̄a mfọn Jehovah onụk nnyịn ndinam uduak Abasi ifịk ifịk. (2 Tim. 3:1; Ps. 145:7) Ẹyak nnyịn ikere iban̄a ndusụk nti utom oro idisịnde esịt inam ke ini Editi emi.

⁴ Kot Mbon En̄wen Ẹdi Editi: Usụn̄ kiet oro nnyịn ikemede ndiwụt esịtekọm mban̄a n̄wọrọnda enọ ufak edi ndidụk Editi n̄kpa Jesus eke isua ke isua, emi ẹdinịmde isua emi ke Wednesday, April 16, ke utịn ama okosụhọde. (Luke 22:19, 20) Isua oko, esop 94,600 ke ofụri ererimbot ẹma ẹtọt ofụri ibat mme andidụk 15,597,746! Oro ama ada se ibede owo 220,000 awak akan isua oro ekebemde iso.

⁵ Owo ifan̄ ẹdidụk isua emi? Ekese edikọn̄ọ ke ifịk ifịk ukeme oro nnyịn isịnde ke ndisịn udọn̄ nnọ mbon en̄wen ndisop idem ye nnyịn. Tọn̄ọ ndiwet enyịn̄ mbon oro afo edimade ndikot. Mbonubon fo ke ekpebem iso ewet. Edieke enyenede nsan̄a ndọ oro mînịmke ke akpanikọ, tịn̄ nọ enye nte ke ọdọn̄ fi ke ofụri esịt enye nditiene fi ndụk. Ebe kiet oro mînịmke ke akpanikọ ọkọdọhọ ete ke imọ ikodụk Editi isua oko koro ikokụtde ke imọ ndidụk ekedi akpan n̄kpọ ọnọ n̄wan imọ. Mbon en̄wen oro ediwetde ẹkeme ndidi mme iman, mbọhọidụn̄, mme nsan̄autom, m̀mê mme nsan̄a ufọkn̄wed. Kûdede utre ndikot nditọ ukpepn̄kpọ Bible fo.

⁶ Ke ama ekewet enyịn̄ emi, nam ndutịm ndika n̄kokot mmọ ke idemfo. Nọ mmọ n̄wedikot Editi. Man an̄wam mme owo ẹti ini ye ebiet oro ẹdinịmde, taip mîdịghe wet ini ye ebiet Editi ediye ediye ke isọn̄ isọn̄ n̄wedikot oro. Nte April 16 asan̄ade ekpere, fiak ka keti mbon oro ekewetde mmọ enyịn̄ mîdịghe kot mmọ ke urụk ukopikọ. Ẹyak nnyịn in̄wam ediwak owo nte ikekeme ndidụk ata edisana edinam emi.

⁷ N̄wam Mbon Oro Ẹdụkde Editi: Usen Editi esiwak ndidi ini nduaidem. Nnyịn imesinyene ifet ndikọm mme owo oro mîsidụkke mme mbono esop nnyịn. Nte idaha n̄kann̄kụk ayakde, nam ndutịm ndibabak nsịm do nyụn̄ du bịghi ke ẹma ẹkesuana. Tịm mehe ye mbufa owo oro ẹdụkde. Tie ufan ufan nyụn̄ fọn ido.—Rome 12:13.

⁸ Nte ẹkeme ndin̄wam mbon oro ẹdụkde Editi ndinam n̄kọri ke n̄kan̄ eke spirit ebe ke ukpepn̄kpọ Bible? Domo ndibọ enyịn̄ ye adres isenowo ekededi oro owo mîsikaha ibịne man aka ebịne mmọ. Ye ima ima un̄wam, ndusụk mmọ emi ẹkeme ndikọri nsịm idaha ndidot nte mme asuanetop oro mînaha baptism mbemiso Editi isua efen. Ke ini afiakde aka ebịne mbon oro ẹkedụkde Editi, kot mmọ ẹdi akpan utịn̄ikọ oro ẹdinọde ke April 27.

⁹ Nte Afo Emekeme Ndinam Usiakusụn̄ Unọ Un̄wam ke Ini Editi Emi? Ọkpọsọn̄ udọn̄ oro inyenede ndinam n̄kpọ Jehovah esinụk nnyịn kpukpru isua ndisịn̄ede idem ọyọhọ ọyọhọ ke mme ọfiọn̄ akpan edinam ukara Abasi. Isua oko ke Nigeria, mme asiakusụn̄ unọ un̄wam ẹkedi 16,101 ke March ye 13,487 ke April. Ukeme oro ofụri esop ẹdianade kiet ẹsịn ke ndikwọrọ eti mbụk ifịk ifịk ke ini Editi ẹkeme ndinyene nti utịp.

¹⁰ Esop kiet oro ekenyenede mme asuanetop 107 ye mme asiakusụn̄ ofụri ini 9 ama ọtọt nte ikenyenede “n̄wọrọnda ọfiọn̄” ke April isua oko, emi owo 53 ẹkenamde utom nte mme asiakusụn̄ unọ un̄wam, esịnede kpukpru mbiowo ye mme asan̄autom unamutom. Mbiowo ẹkesan̄a didie ẹsịn udọn̄ ẹnọ mme asiakusụn̄ unọ un̄wam ndinyene ifịk ke ọfiọn̄ oro? Mmọ ẹkebabak ẹtọn̄ọ, ẹsịnde udọn̄ ẹnọ ediwak owo nte ẹkekeme ndisịn enyịn̄. Ẹma ẹnịm mme mbono an̄wautom ke nsio nsio ini kpukpru usen man kpukpru owo ke esop ẹkeme ndibuana.

¹¹ Eyenete an̄wan kiet emi edide isua 86, oro mîkemeke ndisan̄a ke ntak unana nsọn̄idem, ama anam usiakusụn̄ unọ un̄wam. Enye ama esitie ke okpokoro itie utem udia ọtọn̄ọde ke usenubọk ọnọ ikọ ntiense ke urụk ukopikọ ke n̄kpọ nte hour iba, ada hour ifan̄ ọduọk odudu, ndien ekem afiak edinọ ikọ ntiense efen efen. Enye ama enyene nneme ye n̄wan kiet oro akatabade ebe ye nditọiren esie iba oro ẹkedide uyen ke isua iba emi ekebede mîkonyụn̄ ifiọkke ntak emi Abasi akayakde utọ idiọkn̄kpọ oro etịbe. Ẹma ẹnọ n̄wan emi ọyọhọ ikọ ntiense, ẹnyụn̄ ẹtọn̄ọ ukpepn̄kpọ Bible. Emi owụt nte ke ọkpọsọn̄ udọn̄ oro inyenede ndinam n̄kpọ Jehovah ekeme ndinam idem mbon unana nsọn̄idem ẹsịn̄ede idemmọ ọyọhọ ọyọhọ ke utom ukwọrọikọ ke mme ọfiọn̄ akpan edinam emi. Mbon oro mînyeneke urụk ukopikọ ẹkeme n̄ko ndisịn̄ede idemmọ. Mbon oro mîkemeke ndisan̄a ẹkeme nditie ke ebiet oro mmọ ẹdikemede ndinọ mbon oro ẹsan̄ade ẹbe ikọ ntiense.

¹² Mbiowo oro ẹkeberi ntọt emi ke ndidọhọ: “Nnyịn ima inen̄ede ikop inem inyụn̄ iwụt esịtekọm iban̄a mme ifet ye edidiọn̄ oro Jehovah akanamde nnyịn owo kiet kiet inyene.” Ye eti ndutịm, esop mbufo n̄ko ekeme ndinyene utọ mme edidiọn̄ emi.

¹³ Domo Ndibuana Ọyọhọ Ọyọhọ ke Utom Ukwọrọikọ: Ima oro inyenede inọ Abasi ye mbọhọidụn̄ onụk nnyịn ndidep ifet kpukpru ọfiọn̄ ndibuana eti mbụk ye mbon efen. (Matt. 22:37-39) Mme esenyịn Ukpepn̄kpọ N̄wed Esop ye mme udiana mmọ ẹkpenyene ndidomo ndin̄wam mbon oro ẹdude ke otu mmọ ndibuana ke utom ukwọrọikọ kpukpru ọfiọn̄. Eti usụn̄ ndinam emi edi ndibem iso nnam ndutịm kaban̄a mme akpan owo oro mmọ ẹdidade ẹsan̄a ke an̄wautom ke otu oro. Utu ke ndibet tutu utịtọfiọn̄, babak tọn̄ọ ndinam emi man mmọ ẹkeme ndinọ ibatutom ke ufọt ọfiọn̄. Emi ọyọnọ fi mme ifet efen efen ndinọ ima ima un̄wam.

¹⁴ Nte mme asuanetop oro ẹdide mbon n̄kpọnnam ẹdu ke otu ukpepn̄kpọ n̄wed fo emi enen̄erede ọsọn̄ mmọ ndibuana ke utom ukwọrọikọ? Edieke ndusụk mmọ ẹdude ke ufọkibọk m̀mê mîkemeke ndikpọn̄ ufọk mmọ, an̄wan̄a nte ke mmọ ẹdinyene esisịt ifet ndinọ ikọ ntiense. Edi edieke ẹdade esisịt ifet mmọ ẹnam un̄wana mmọ ayama, emi ekeme ndinụk mbon oro ẹkụtde nti utom mmọ ndinen̄ede nnyene udọn̄ ke akpanikọ. (Matt. 5:16) Mme esenyịn ukpepn̄kpọ n̄wed ẹkpenyene ndikụt nte ke imanam utọ mbon oro ẹfiọk nte ke mmimọ imekeme nditọt ibatutom oro awakde esịm minit 15, 30, m̀mê 45. Ndikeme nditọt ini oro mmọ ẹkesịnde ke ndinọ ikọ ntiense esịn udọn̄ ọnọ mme anam-akpanikọ asuanetop emi, ndien emi anam mmọ ẹkop uyụhọ ye idatesịt. Enye n̄ko anam ẹkụt nte ke ibatutom ofụri ererimbot oro esịnyenede ẹto mme edinam ikọt Abasi enen.

¹⁵ Mme Uyen Oro Ẹsịnde Idem Ẹnam Eti Ido! Enem nnyịn ke idem didie ntem ndikụt mme uyen Christian ẹsịnde odudu ye ukeme ke utom Jehovah! (N̄ke 20:29) Edieke afo edide uyen, didie ke afo ekeme ndiwụt ọkpọsọn̄ udọn̄ oro enyenede ke utom Jehovah ke mme akpan ọfiọn̄ emi?

¹⁶ Edieke afo mûdịghe asuanetop kan̄a, nte afo emekeme ndinam n̄kpọ mbịne ifetutom oro? Bụp idemfo mme mbụme oro ẹtienede mi: ‘Ndi ami mmenyene akpan ifiọk akpanikọ Bible? Ndi ami mmoyom ndibuana ke utom ukwọrọikọ Obio Ubọn̄? Ndi mmenịm eti uwụtn̄kpọ ke edu uwem mi? Ndi ami mmekeme ndiwụt mbuọtidem oro nnyenede ebe ke nditịn̄ nnọ mbon ẹfen mban̄a eti mbụk? Ndi esịt onụk mi ndinam ntre?’ Edieke mme ibọrọ mbụme oro ẹdide ih, do tịn̄ nọ ete ye eka fo ban̄a udọn̄ oro enyenede ndikabade ndi asuanetop. Ete ye eka fo ẹkeme nditịn̄ nnọ kiet ke otu mbiowo oro ẹdude ke kọmiti utom.

¹⁷ Edieke afo edide asuanetop eti mbụk, nte afo emekeme ndida ini nduọkodudu ufọkn̄wed ntat ebuana fo ke utom ukwọrọikọ? Ye eti ndutịm ye un̄wam otode ete ye eka ye mbon efen, mme uyen oro ẹma ẹkena baptism ẹma ẹkeme ndinam usiakusụn̄ unọ un̄wam. Edieke mûkemeke ndinam emi, do biere ndisịn ini oro okponde akan ke an̄wautom. Nịm utịtmbuba nọ idemfo. Ke adianade ye ibat hour oro oyomde ndinọ, nịm utịtmbuba efen oro aban̄ade uduot utom ukwọrọikọ fo. Afo emekeme ndidomo ndikot itie N̄wed Abasi kiet ke enyịnusụn̄, ndifori uduot mfiakn̄ka fo, nditọn̄ọ ukpepn̄kpọ Bible, m̀mê nditat utom an̄wautom fo man esịne unọ ikọ ntiense urụk ukopikọ, m̀mê ndusụk ikpehe utom ukwọrọikọ eken. Nso kaban̄a utịtmbuba edikot mbọhọidụn̄, nsan̄a ufọkn̄wed, m̀mê iman etiene fi odụk Editi isua emi? Ndinyene ọyọhọ ebuana ke mme edinam emi eyenyene nti utịp onyụn̄ enen̄ede esịn udọn̄ ọnọ mbon efen ke esop.—1 Thess. 5:11.

¹⁸ N̄wam Mbufa Owo Ẹnam N̄kọri: Ke isua utom oro ekebede, ẹma ẹnịm ukpepn̄kpọ Bible 407,243 ke ẹbaharede ukem ukem kpukpru ọfiọn̄ ke Nigeria. Nte ini akade, ediwak nditọ ukpepn̄kpọ emi ẹyenam n̄kọri ẹsịm uyakidem nnọ ye baptism. Nte ededi, mbemiso mmọ ẹsịmde utịtmbuba oro, nnyịn inyene ndin̄wam mmọ ẹdot nte mme asuanetop eti mbụk. Emi edi akpan ntọn̄ọ ke ndikpep mbufa owo ndidi mme anditiene Jesus Christ. (Matt. 9:9; Luke 6:40) Ndi afo emenyene eyen ukpepn̄kpọ Bible oro oyomde ndinam emi?

¹⁹ Edieke afo mûtịmke ufiọk m̀mê eyen ukpepn̄kpọ fo ke anam n̄kọri, dọhọ esenyịn ukpepn̄kpọ n̄wed m̀mê esenyịn utom an̄wam fi. Afo emekeme ndidọhọ enye etiene abuana ke ukpepn̄kpọ oro. Nditọete emi ẹnen̄ede ẹnyene ifiọk ndidụn̄ọde mfiọk n̄kọri eke spirit oro eyen ukpepn̄kpọ anamde. Mmọ ẹkeme ndinọ mme ekikere oro ẹdin̄wamde eyen ukpepn̄kpọ aka iso anam n̄kọri ke n̄kan̄ eke spirit.

²⁰ Ke ini eyen ukpepn̄kpọ fo ọdọhọde ke iyom ndikabade ndi asuanetop oro mînaha kan̄a baptism ndien afo okụt ete ke enye odot, ka kanam esenyịn oro etiede ibuot ọfiọk aban̄a. Enye ayanam ndutịm man mbiowo iba ẹsobo ye afo ọkọrọ ye eyen ukpepn̄kpọ oro man ẹse mme enye odot, ẹdade ntọt oro odude ke n̄wed Utom Nnyịn page 98-99. (Se Enyọn̄-Ukpeme eke November 15, 1988, page 17.) Edieke ẹtorode eyen ukpepn̄kpọ ndidi asuanetop, afo ekpenyene ndinọ enye ukpep iwiwa. Ndondo oro enye ọnọde ibatutom an̄wautom esie, ẹyetọt esop nte ke eyen ukpepn̄kpọ emi edi asuanetop oro mînaha kan̄a baptism. Nnyịn imodori enyịn nte ke ediwak tọsịn mbufa asuanetop, n̄kpri ye ikpọ, ẹkeme ndinam akpan n̄kọri emi ke mme akpan ọfiọn̄ emi.

²¹ Ndutịm An̄wam ke Ndinam Ekese: Ndibem iso nnam ndutịm ayanam ẹkụt unen ke mme edinam ukara Abasi ke ini Editi emi. (N̄ke 21:5, NW) Mbiowo ẹnyene ediwak n̄kpọ ndikere mban̄a.

²² Man an̄wam esop ẹnam ekese ke an̄wautom, mbiowo ẹkpenyene ndinam eti ndutịm ndinịm mme mbono an̄wautom kpukpru usen ke urua ye ke utịturua. Esenyịn utom ekpenyene ndida usụn̄ ke ndinam mme ndutịm emi. Ndi ẹkeme ndidiomi mme mbono an̄wautom efen efen ke tụhi-tụhi usenubọk, ke utịt utịt uwemeyo, m̀mê ke ntọn̄ọ ntọn̄ọ mbubịteyo? Ẹkpenyene nditọt esop mban̄a ndutịm emi. Ndidian ndutịm emi ke obukpọk ntọt ekeme ndin̄wam.

²³ Mbiowo ẹkpenyene ndikụt nte ke ẹnam ndutịm ẹban̄a Editi anyan ini mbemiso April 16. Emi abuana ndidiana kiet nnam ndutịm ye mme esop eken oro ẹdisopde idem ke Ufọkmbono Obio Ubọn̄ oro, edinam Ufọkmbono Obio Ubọn̄ asana, edimek mme adaidaha ye mme andimen n̄kpọ idiọn̄ọ nsan̄a, ye nte ẹdinyenede mme n̄kpọ idiọn̄ọ. Ẹkpenyene nditọt esop mban̄a ini ye itie ẹdinịmde Editi ye ukpụhọde ekededi oro ẹnamde ẹban̄a ndutịm mbono esop eke urua oro. Nditịn̄ enyịn nse mban̄a mme n̄kpọ emi ayan̄wam “ẹnam kpukpru n̄kpọ ke nde ye ke ido nte eyede” ke usọrọ emi.—1 Cor. 14:40.

²⁴ Mme ibuot ufọk ẹkpenyene ndida ubak ini ukpepn̄kpọ ubon mmọ nneme nte ubon mmọ edikemede ndibuana ke ndinam n̄kọri ke ini Editi emi. Nte kpukpru owo ke ubon fo ẹkeme ndinam usiakusụn̄ unọ un̄wam? Mîdịghe nte ubon ekeme ndisịn udọn̄ nnọ owo kiet m̀mê awakde akan oro ndinam ntre? Edieke mbufo mîkemeke ndinam oro, ẹnịm mme akpan utịtmbuba nte ubon man ẹsịn ediwak ini ke utom ukwọrọikọ. Nte odu ekpri owo ke ubon, oro ekemede ndidot ndidi asuanetop oro mînaha kan̄a baptism, edieke ẹnọde esisịt nsịnudọn̄ ye un̄wam? Owo ifan̄ ke ubon mbufo ẹkeme ndikot ẹdi Editi isua emi? Eti ndutịm ekeme ndida uwak edidiọn̄ ye idatesịt nsọk ubon.

²⁵ Da Ini Oro Osụhọde Nam N̄kpọ Ọyọhọ Ọyọhọ: Ke ewetde n̄wed ọnọ ẹsọk mme Christian akpa isua ikie, apostle Peter ama eti mmọ aban̄a nte ini ekperede koro utịt editịm n̄kpọ mme Jew ama asan̄a ekpere. (1 Pet. 4:7) Mfịn kpukpru uyarade ẹwụt nte ke utịt ofụri editịm n̄kpọ emi ekpere. Kpukpru usen usụn̄ uwem nnyịn ekpenyene ndiwụt ke imọfiọk emi. Nte mme asan̄autom Jehovah oro ẹnyenede ifịk, nnyịn ikpenyene ndisịn esịt nnam usọp usọp utom eke editan̄a eti mbụk.—Titus 2:13, 14.

²⁶ Ini edi emi ndinyene ifịk nnyụn̄ nnam n̄kpọ! Tie kere se Jehovah anamde ọnọ fi, ubon fo, ye esop mbufo. Okposụkedi nnyịn mîkemeke ndisio usiene ediwak mfọnido oro enye ọfọnde ye nnyịn, nnyịn imekeme ndinọ Jehovah utuakibuot ofụri ukpọn̄. (Ps. 116:12-14) Jehovah ọyọdiọn̄ ifịk ifịk ukeme nnyịn. (N̄ke 10:22) Kpukpru nnyịn ikpakam inyene “ọkpọsọn̄ udọn̄ ndinam eti ido” ke akpan ini n̄kọri emi, “man ke kpukpru n̄kpọ Abasi edinyene ubọn̄ oto ke Jesus Christ.”—1 Pet. 3:13; 4:11.

[Ekebe ke page 3]

Ibat Mme Andikodụk Editi ke Ofụri Ererimbot

199914,088,751

200014,872,086

200115,374,986

200215,597,746

[Ekebe ke page 4]

Mmanie ke Afo Edikot Ẹdi Editi?

□ Mbonubon ye mme iman

□ Mbọhọidụn̄ ye mme ọdiọn̄ọ

□ Mme nsan̄autom ye mme nsan̄a ufọkn̄wed

□ Mbon oro inyenede ke mme mfiakn̄ka ye nditọ ukpepn̄kpọ Bible

[Ekebe ke page 5]

N̄wam Mme Andidụk Editi

□ Kọm mmọ ufiop ufiop

□ Fiak ka bịne mmọ

□ Tọn̄ọ ukpepn̄kpọ Bible ye mmọ

□ Kot mmọ ẹdi akpan utịn̄ikọ

[Ekebe ke page 6]

Mme Utịtmbuba Ewe ke Afo Enịm ke Ini Editi?

□ Ndin̄wam owo oro afo okokotde ndidụk Editi

□ Ndidot ndidi asuanetop eti mbụk

□ Ndisịn ediwak ini ke an̄wautom

□ Ndinam n̄kọri ke akpan ikpehe utom ukwọrọikọ

□ Ndinam utom nte asiakusụn̄ unọ un̄wam