Leta Otode Otu Ukara
Ndima Nditọete:
Edi n̄kpọ idatesịt didie ntem ndiwet mbufo! Nnyịn imotoro mbufo ke ima ye n̄waidem oro mbufo ẹkade iso ndiwụt. Mbufo ẹyekụt ke Yearbook isua emi nte ke ẹnam ekese ke isua utom oro ebede. Ini kiet efen, nnyịn ima ibiat se iwakde ibe biliọn hour kiet ke utom ukwọrọikọ ye unọ ukpep, isịnde udọn̄ inọ mme owo nnennen nnennen ndisan̄a n̄kpere Jehovah. Nte idịghe n̄kpọ ukpono ndidi ekemmọ mbonutom ubọn̄ ubọn̄ Abasi ye Ete nnyịn eke heaven?—1 Cor. 3:9.
Nte nnyịn isakde iso ise utom oro anade ke iso, nnyịn imenyene mbuọtidem nte ke mbufo ẹyeka iso ndikpebe ifịk ye mbuọtidem mme asan̄autom Abasi, oro ẹtịn̄de ẹban̄a ke Bible. Ke uwụtn̄kpọ, apostle Paul ama enyene ọkpọsọn̄ udọn̄ ndisịn ifịk nte enye ekekeme man anam mme ufọn n̄kpọ Obio Ubọn̄ ẹka iso. Nte an̄wan̄ade, ekedi ke akpatre isua oro enye okodude ke Ephesus ke enye ekewet akpa leta esie ọnọ ẹsọk esop Christian ke Corinth. Enye ama ewet aban̄a se enye akaduakde ndinam ke ndondo oro ete: “Ndien nyodu ke Ephesus tutu esịm Pentecost; koro ẹma ẹberede usụn̄ akamba ẹnọ mi ndinam akwa utom do, mmọ eke ẹn̄wanade ye ami ẹnyụn̄ ẹwak.”—1 Cor. 16:8, 9.
Paul ama aduak ndika Macedonia ye Corinth. Nte ededi, enye ama ọfiọk ete ke imọ iyenyene ifet ndinam utom oro enyenede ufọn edieke ibetde esisịt ini ke Ephesus. Paul ama okpụhọde ada ekekem ye idaha; enye ama okụt eti idaha emi enye ekekemede ndinam mme ufọn n̄kpọ Obio Ubọn̄ ẹka iso ke ebiet oro enye okodude, ntre enye ama okpụhọde ndutịm esie nte ekemde. Akamba usụn̄ ama eberede ọnọ enye ndinam utom, ndien ama ọdọn̄ Paul ndida ifet oro nnam n̄kpọ ke eti usụn̄.
Ndinam ntre ama oyom ekese utom—edikwọrọ eti mbụk ye edisọn̄ọ esop idem ke Ephesus. Paul ama etịn̄ ke ukperedem ọnọ nyobiowo esop obio oro ete: “Mbufo ẹmefiọk ẹte n̄kefeheke ndisian mbufo se ededi eke odorode mbufo n̄kpọ, mma nnyụn̄ n̄kpep mbufo n̄kpọ an̄wa-an̄wa, nnyụn̄ n̄kpep mbufo ke ufọk ke ufọk, n̄kwọrọ nnọ mme Jew ye mme Greek, nte mmọ ẹkabade esịt ẹtiene Abasi, ẹnyụn̄ ẹbuọt idem ye Ọbọn̄ nnyịn Jesus Christ.”—Utom 20:20, 21.
Ukem ntre, ediwak mbufo ndima nditọete ẹmeda mme ifet oro ẹbererede ẹnọ mbufo ẹnam n̄kpọ ke eti usụn̄. Ke isua utom oro ebede, ke ẹbaharede ukem ukem, owo 798,938 ẹma ẹkeme ndidiomi mme mbubehe mmọ man ẹbuana ke ndusụk orụk utom usiakusụn̄. Ndusụk mbufo ẹma ẹnam isan̄ ẹka anyan ebiet man ẹkenam utom nte mme isụn̄utom. Mbufo ẹmesuan eti mbụk ifịk ifịk ẹnyụn̄ ẹnam mme esop ẹkọri. Ndusụk mbufo ẹmekpep usem efen man ẹkeme ndin̄wam mbon oro ẹsemde usem esenidụt emi ẹdụn̄de ẹkpere. Edi mbon en̄wen ẹdiomi mme mbubehe mmọ man ẹnam utom ke efakutom oro owo mîbahakede inọ owo m̀mê ndinam utom ke ebiet oro udọn̄ okponde akan. Ndusụk owo ẹkam ẹkụt nte ke akamba usụn̄ emeberede ndinam akwa utom ke ufọkn̄wed, ke itieutom, m̀mê ke mme idaha efen emi ẹkemede ndinọ ikọ ntiense oro enyenede uforo, utọ nte ke urụk ukopikọ. Mme ifiọkutom ẹtode ofụri ererimbot ẹsọn̄ọ nte ke ikọt Abasi, n̄kpri ye ikpọ, ke ẹsịn ifịk ẹyom mme ifet ndinọ mme owo ifiọk akpanikọ ke kpukpru ebiet.
Ẹtịm ẹfiọk ẹte ke Jehovah okụt onyụn̄ enen̄ede owụt esịtekọm aban̄a mme ukeme mbufo. Bible ọdọhọ ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde.” (Heb. 6:10) Ẹka iso ẹdu ke edidemede ẹban̄a mme ifet oro ẹyakde mbufo ẹmenede edisana utuakibuot ke enyọn̄. Ndusụk mbufo ẹmekeme nditat utom ukwọrọikọ mbufo. Kpukpru nnyịn imekeme ndidomo ndinam utom ukwọrọikọ nnyịn etetịm enyene uforo.
Nnyịn inamke utom ukwọrọikọ nnyịn ye unana ubiọn̄ọ. Ti ete ke Paul ama eketịn̄ aban̄a akamba usụn̄ oro ekeberede ọnọ enye ndinam utom, enye ama ewet ete: “Mmọ eke ẹn̄wanade ye ami ẹnyụn̄ ẹwak.” Ye Paul, mme andibiọn̄ọ oro ẹma ẹsịne mme Jew ye mme Gentile, ndusụk mmọ ẹma ẹda ata ata en̄wan ẹtiene enye ndien mbon eken ke n̄kari ẹma ẹdụk odu ẹban̄a enye.—Utom 19:24-28; 20:18, 19.
Nnyịn imesisobo ukem idaha oro mfịn. Nte nnyịn isan̄ade ikpere nsobo idiọk editịm n̄kpọ emi, nnyịn imodori enyịn ke ubiọn̄ọ ọyọkọri. Satan ọyọhọ ye “akwa ifụtesịt,” ndien enye enen̄ede ada ifụtesịt esie etiene mbon oro ẹnamde n̄kpọ Abasi. (Edi. 12:12) Ẹkûdede ẹfre ẹte ke Satan edi “ọbọn̄ ererimbot emi.” Jesus ọkọdọhọ mme mbet esie ete: “Edieke mbufo ẹkpedide mbon ererimbot, ererimbot akpama ikọt esie: edi sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo.”—John 14:30; 15:19.
Nnyịn imebiere nditre ndiyak owo ekededi anam mbuọtidem nnyịn ke Abasi emem m̀mê ndinam nnyịn itek ke ifịk ke utom ukwọrọikọ nnyịn. Nnyịn imọfiọk ite ke mme owo ẹyeka iso ẹn̄wana ye nnyịn ẹnyụn̄ ẹdụk odu ẹban̄a nnyịn. Kpa ye oro, nnyịn iyaka iso ndikwọrọ eti mbụk Obio Ubọn̄, inyenede mbuọtidem nte ke Jesus ayanuak Satan ye udịmekọn̄ esie ke edikem ini Jehovah. Mme andibiọn̄ọ ikekịbike apostle Paul inua; m̀mê mmọ ndikịbi mme asan̄autom Jehovah inua mfịn. Kpa ye ifụtesịt Satan ye usua ererimbot, spirit Jehovah ke anam utom ọkpọsọn̄ ọkpọsọn̄ ke otu ikọt Esie. Edi n̄kpọ idatesịt didie ntem ndifiọk nte ke mbon oro ẹtan̄ade eti mbụk ẹmesịm obufa n̄wakn̄kan ibat edide 6,304,645!
Akam nnyịn edi nte mbufo ẹkpekam ẹka iso ndida mme ifet oro ẹbererede nnam mme ufọn n̄kpọ Obio Ubọn̄ Jehovah ẹka iso. Ẹtịm ẹfiọk ẹte ke nnyịn imenen̄ede ikere iban̄a mbufo owo kiet kiet nte nnyịn inamde utom Abasi Andikon̄ N̄kan, kpa Jehovah, ke “esịt kiet.”—Zeph. 3:9.
Nditọete mbufo,
Otu Ukara eke Mme Ntiense Jehovah