Mbono District “Ẹnọ Abasi Ubọn̄” eke Mme Ntiense Jehovah eke 2003

¹ Ebede ke anam-akpanikọ prọfet esie Isaiah, Jehovah ama owụk ete: “Ikọt mi, mbufo ẹkpan̄ utọn̄ ẹnọ mi; mbio-obio mi, mbufo ẹnyụn̄ ẹkop uyo mi.” (Isa. 51:4) Ke utịt ini emi etịmde-tịm ọdiọk mi, ndi nnyịn inyịmeke nte ke enen̄ede edi akpan n̄kpọ ndikpan̄ utọn̄ nnọ ewụhọ Jehovah? Kiet ke otu usụn̄ oro nnyịn ‘ikopde uyo’ Jehovah edi ndinịm ewụhọ esie ndisop idem ọtọkiet kaban̄a utuakibuot. Nnyịn isitie ye ọkpọsọn̄ udọn̄ didie ntem ibet san̄asan̄a ifet oro mme mbono district nnyịn eke isua ke isua ẹsinọde! Otu Ukara eke Mme Ntiense Jehovah amafiak odiomi ete ẹnịm ediwak mbono district ke Nigeria ke 2003.

² Nte ẹkewụtde ke nsiondi Enyọn̄-Ukpeme eke July 1, 2002, ẹyenịm mme mbono ofụri ererimbot n̄ko ke ndusụk idụt, emi mme owo ẹditode kpukpru itie ke ererimbot ẹkedụk. Nigeria edika ke Ghana. Sia mme idụt oro ẹdinịmde mme mbono ofụri ererimbot mîwakke, mbon oro ẹdemede ẹdọn̄ ke mbono oro kpọt ẹdikeme ndidụk. Edi kpukpru mbono district ẹyenem nte mbono ofụri ererimbot. Mme isụn̄utom ẹyedụk mbono ke ndusụk itie, ndien ifet oyodu ndikop ndusụk ifiọkutom mmọ. Nso ke nnyịn ikeme ndinam man ibọ ọyọhọ ufọn ito mme ndutịm oro ẹnamde idahaemi kaban̄a mme mbono nnyịn?

³ Dụk Kpukpru Usen: Man ibọ ọyọhọ ufọn ito ukpep oro ẹnọde ẹbe ke asan̄autom emi anamde akpanikọ, onyụn̄ enyenede ọniọn̄, oyom nnyịn ikụt ite ke imodụk ofụri ndutịm oro. (Matt. 24:45) Ndi oyom afo eben̄e eteutom fo ọnọ fi ini ndidụk mbono oro kpukpru usen ita oro? Mbemiso Nehemiah ekeben̄ede Edidem Artaxerxes ete ayak imọ ika Jerusalem man ikafiak ibọp ibibene Jerusalem, enye ama ‘ekpe Abasi enyọn̄ ubọk.’ (Neh. 2:4) Afo ekpenyene ndibọn̄ akam ntre nnọ Jehovah man enyene uko ndiben̄e eteutom fo ini ndidụk kpukpru usen ita mbono oro. Nso edieke eteutom fo emen̄ede ndinọ fi ini? Eyedi ndinam an̄wan̄a nte ke ukpep oro nnyịn isibọde ke mme mbono nnyịn ẹn̄wam nnyịn ndidi mme anamutom oro ẹnamde akpanikọ, ẹsịnde ifịk, ẹnyụn̄ ẹdide se ẹkemede ndiberi edem ekeme ndin̄wam enye ndinyịme. Adianade do, edieke nnyịn inyenede mbonubon oro mînịmke ke akpanikọ, owụt ima nditọt mmọ mban̄a mme ndutịm mbono nnyịn usọp usọp nte ikekeme.

⁴ Fam Okụk Nịm Nọ Mbono: Ke adianade ye mme ndutịm eken, INI EDI EMI nditọn̄ọ mfam okụk nnịm nnọ mbono district emi. Ndusụk owo ẹdu oyom usụn̄ ọkpọn̄ itie mbono. N̄ko, ndusụk owo ẹnyene ikpọ ubon. Mme owo emi ye kpukpru nnyịn imoyom okụk ndida ntịp etịbe, okụk ukpeusụn̄, okụk udia, ye okụk ndida nse mban̄a mme mbabuat idaha eken ke ini mbono oro. Oyom ata ediwak mbon oro ẹnyenede ikpọ ubon ẹbabak ẹnam ndutịm ẹnyụn̄ ẹfam okụk oro ekemde ẹnịm man ofụri ubon ekeme ndidụk mbono. Usụn̄ kiet oro enyenede ufọn ekeme ndidi ndibiere ofụri okụk emi ẹyomde. Owụt ifiọk ndinịm ufan̄ nnọ ekọmurua n̄kpọ ndidọk ke adan̄aemi ebierede okụk oro edibiatde. Ekem bahade okụk oro ebierede ndibiat dọn̄ ke ofụri ibat ọfiọn̄ oro ẹdude ọtọn̄ọde idahaemi esịm usenọfiọn̄ mbono district mbufo. Emi edi ibatokụk oro oyomde afo enịm ke ọfiọn̄ kiet kiet. Ke ọfiọn̄ kiet kiet, sịn ofụri ukeme ndibem iso nsio okụk emi nnịm nte okụk mbono. Ẹkeme ndisịn emi ke ekpri ekebe m̀mê ke efọkn̄wed. Nte ededi, ẹkeme ndibahade okụk emi ẹfamde ẹnịm ke ọfiọn̄ ke ọfiọn̄ mi ke itie inan̄ nnyụn̄ nsio nnịm ke urua ke urua. Akpan n̄kpọ edi nte ke ukpenyeneke ndibet tutu osụhọ ọfiọn̄ kiet m̀mê iba ndisịm ini mbono mbemiso afo ọtọn̄ọ ndifam okụk uka isan̄ ofụri ini eke isua ke isua emi nnịm.—N̄ke 21:5.

⁵ Item ke Ndibọ Itieidụn̄: Nnyịn iyodomo ndinọ esop kiet kiet ibat babru Room Request oro ekemde. Kpukpru mbon oro ẹyomde ndibọ ufọkidụn̄ nto Itieutom Unọ Ufọkidụn̄ mbono ẹkpenyene ndiwet kpukpru ntọt oro ẹyomde in̄wan̄-in̄wan̄ ke babru oro ẹnyụn̄ ẹyak enye ẹnọ ewetn̄wed esop. Ewetn̄wed esop ekpenyene ndikụt nte ke ẹwet n̄kpọ nte enende ẹyọhọ babru Room Request kiet kiet oro ẹyakde ẹnọ. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke mme ufan̄ oro ẹkpewetde enyịn̄ mbon emi. Ẹnyene ndiwet kpukpru ntọt nte eyede ye nte ẹkemede ndikot. Mbọk kụt ete ke ọmọnọ ọyọhọ ntọt aban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Sịn nditọwọn̄ ke udịm enyịn̄ emi. Ke ini edem ndusụk esop ẹkesiwet enyịn̄ ikpọ owo kpọt. Emi esinam ọsọn̄ utom ndinam ndutịm nnọ itieidụn̄ oro ekemde. Edieke oyomde ufan̄ oro okponde akan se idude ke babru oro, da babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ mbono. Ẹkpenyene ndibabak nnọ babru emi mbemiso mbono. MBỌK ẸKÛNỌ babru Room Request ẹsọk N̄ka. Ẹkpenyene ndinọ enye aka nnennen adres mbono oro ẹwụtde ke edem babru oro.

⁶ Isua kiet kiet, nnyịn imesiben̄e nditọete ndidiana kiet ye Itieutom Unọ Ufọkidụn̄ mbono. Ke nsụhọde n̄kaha nditiene ndausụn̄ emi anam ufọn iba:

⁷ Afam okụk ọnọ nditọete nnyịn: Ke ini nnyịn idianade kiet ye ndutịm N̄ka, okụk ufọk esisụhọde ọnọ nditọete nnyịn. Utu ke okụk nnyịn ndika mbịne mme enyene ebiet, ẹkeme ndida mmọ nnam n̄kpọ nte ọfọnde ndida n̄n̄wam mme ubon nditọete nnyịn ye utom ofụri ererimbot. Idem ọkpọkọm nnyịn ke idem nnyịn imekeme ndibọ itieidụn̄ oro ọsọn̄de urua, nnyịn ikpenyene ndinọ ukeme oro Itieutom Unọ Ufọkidụn̄ esịnde, ibetedem. Ẹtịn̄ ẹban̄a edu edikere mban̄a mbon efen emi ke 1 John 3:17, enye onyụn̄ edi edumbet emi odude ke 1 Corinth 10:24.

⁸ Owụt nsụkibuot ọnọ ndausụn̄ N̄ka: Emi ekpenyene ndidi kiet ke otu n̄kpọ emi ẹtịmde ẹbehe nnyịn. Mme Hebrew 13:17 ọdọhọ ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọ emi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.” Nte nditọete nnyịn ẹnamde ekese ndutịm ẹnọ mbono district nnyịn, nnyịn iyom ndinam mmọ ẹfiọk nte ke nnyịn imọnọ mmọ ọyọhọ ibetedem. Sia ẹyomde edidianakiet nnyịn ke n̄kpọ emi ke usen iba m̀mê ita kpọt kpukpru isua, emi edi eti usụn̄ ndinọ mme ukeme mmọ ibetedem. Idem edieke se nnyịn imekde ọkpọkpọ edide isio, eti uwụtn̄kpọ nnyịn, nte nditọete nnyịn ye ererimbot ẹkụtde, eyedemede edu ima, edidianakiet, ye ibetedem.—Phil. 2:1-4.

⁹ San̄asan̄a Un̄wam: Ẹnam ndutịm emi ẹnọ sụk mbon oro ẹyomde san̄asan̄a un̄wam ẹto mbon en̄wen ke ndinam ndutịm mbono mmọ, akpan akpan ndutịm itieidụn̄. Mmọ ẹkeme n̄ko ndiyom un̄wam ke mme usụn̄ efen, etienede san̄asan̄a idaha mmọ. Edi mme asuanetop ye mme asiakusụn̄ emi ẹnịmde eti uwụtn̄kpọ kpọt, esịnede nditọ mmọ oro ẹdude eti uwem, emi ẹyomde san̄asan̄a un̄wam, emi Kọmiti Utom Esop onyụn̄ ọnọde unyịme, ẹdot ndibọ ufọn nto ndutịm San̄asan̄a Un̄wam emi. Ẹkpenyene ndinam mme ndutịm eken ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbono esop, utu ke ndiyak mbiomo emi nnọ ndutịm mbono. Mbiowo ye mbon en̄wen emi ẹdiọn̄ọde ẹban̄a idaha owo oro ẹkeme ndinọ ima ima un̄wam. Emi esiwak ndiyom mme asuanetop ẹkere ẹban̄a udọn̄ mbon oro ẹdude ke utom uyọhọ ini, mbonusọn̄, mbon n̄kpọnnam, eyedi ye mbon eken. Mme asuanetop ẹkeme ndinọ un̄wam ebe ke ndisan̄a ye mme utọ owo oro m̀mê ndise mban̄a se mmọ ẹyomde ke mme usụn̄ efen.—Jas. 2:15-17; 1 John 3:17, 18.

¹⁰ Nte ededi, Itieutom Unọ Ufọkidụn̄ oyodomo ndinọ mme asuanetop oro ẹyomde san̄asan̄a un̄wam ufọkidụn̄ oro ẹdotde edieke mbon oro ẹdude ke esop mîkemeke ndin̄wam mmọ. Mme asuanetop emi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ẹse m̀mê esop eyekeme ndin̄wam mme owo emi ke ndise mban̄a edinọ mmọ itieidụn̄. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Room Request kiet emi enye ewetde mme ikọ emi “SAN̄ASAN̄A UN̄WAM,” in̄wan̄-in̄wan̄ ke enyọn̄ akpa page oro. Mbon oro ẹyomde san̄asan̄a un̄wam kpọt ẹkpenyene ndiwet n̄kpọ nyọhọ san̄asan̄a babru emi. Owo oro esịnde eben̄e emi enyene ndiwet n̄kpọ nyọhọ enye. Ẹkpenyene ndifiak nyak babru emi nnọ ewetn̄wed, emi edisede m̀mê ẹwet n̄kpọ ẹyọhọ, m̀mê ẹwet n̄kpọ nte enende, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Ewetn̄wed ekpenyene ndinam mme idaha oro ẸN̄WAN̄A KE NDE KE NDE ke ufan̄ oro ẹnịmde ke edem babru emi. Ẹkpenyene ndibabak nnam kpukpru emi mbemiso mbono. Ewetn̄wed ndien ọyọnọ babru emi ẹsọk Itieutom Unọ Ufọkidụn̄. Ẹyesian owo oro esịnde eben̄e emi nnennen ẹban̄a itieidụn̄.

¹¹ Mbon oro ẹyomde san̄asan̄a un̄wam IKPENYENEKE ndika itie mbono n̄koyom ufọkidụn̄ ke ini mmọ ẹsịmde, koro ana Itieutom Unọ Ufọkidụn̄ enyene unyịme otode Kọmiti Utom Esop.

¹² Ediwak owo ẹmewụt esịtekọm ẹban̄a mme ndutịm oro ẹnamde ẹban̄a itieidụn̄ ke mme mbono. Ndi afo n̄ko omowụt esịtekọm aban̄a ediwak ndutịm oro ẹnamde ke ufọn fo? N̄ka enem esịt ndinọ mme itieidụn̄ oro ẹnemde owo ke idem ẹnyụn̄ ẹmemde urua ke mme ini mbono, ẹyakde kpukpru nnyịn iwụk ntịn̄enyịn ke mme ufọn eke spirit ke mbono ye ndutịm.

¹³ Ndidụk Mbono Efen: Ẹdeme esop kiet kiet ẹsịn ke mbono oro ekperede akan. N̄ka esida ibat asuanetop oro ẹdemede ẹdọn̄ ke mbono kiet kiet ebiere ibat mme andidụk man ẹnam ndutịm ẹban̄a n̄kpọitie, ufọkidụn̄, mme n̄wed oro ẹkemde, ye ntre ntre eken. Nte ededi, edieke enyenede eti ntak ndidụk mbono efen ke ọwọrọde ọkpọn̄ enye oro ẹdemede fi ẹsịn onyụn̄ oyomde itieidụn̄, ewetn̄wed esop ekeme ndinọ fi idem babru Room Request kiet. Afo emekeme ndiwet n̄kpọ nyọhọ nnyụn̄ nnọ ewetn̄wed esịn ubọk mbemiso ọnọde enye ẹka itie mbono oro aduakde ndidụk.

¹⁴ Nọ Idem Unyịme Unyịme nte Anamutom Unyịmesịt: Ke ini mbono, mme anamutom unyịmesịt ke mme itie ikie ẹsin̄wam ke ndinam utom nte ọfọnde ke mme itieutom. Mme adaidaha ke efe mbono ye ke mme itie ubon ubomisọn̄ ẹsinọ ndausụn̄ ke itie oro ẹditiede ẹnyụn̄ ẹkpeme mme n̄kpọisan̄ nnyịn. Itieutom Unịm N̄kann̄kụk Asana enyene mbiomo ndimụm eti enyịn̄ nnyịn n̄kama kaban̄a usanaidem, anamde itie utuakibuot nnyịn asana akan nte ekedide. Nte nnyịn imekeme ndin̄wam mmọ emi m̀mê mme itieutom efen oro ẹyomde un̄wam nnyịn? Nte ọyọnọ idemfo unyịme unyịme ndinam n̄kpọ “ke esịt kiet” ye nditọete fo?—Zeph. 3:9.

¹⁵ Nnyịn Idi N̄kpọ Ndise: Ndi mme owo ẹsikụt ukpụhọde ke ufọt Mme Ntiense Jehovah ye mbon ererimbot emi? Etieti! Kop ikọ emi etubom utom ufọkisen ke obio kiet eketịn̄de: “Nnyịn imesinyene n̄kpọ ndinam ye ikpọ mbono kpukpru ini, edi mbufo ẹwụt edidianakiet ẹnyụn̄ ẹfọn ido ẹkan.” “Urua oko otu ido ukpono efen ẹma ẹdụn̄ mi. Ukpụhọde ke ufọt mbufo ye mmọ ana in̄wan̄-in̄wan̄.” “Nnyịn imọfiọk ke nnyịn imekeme ndidori enyịn kpukpru ini mban̄a un̄wam ye edidianakiet mbufo.” Ndi mme utọ ikọ oro inamke nnyịn ifiọk nte “eti ibuot emi otode ke enyọn̄” enyenede eti utịp ke edu uwem nnyịn? (Jas. 3:17) Sia nnyịn idide “n̄kpọ ndise inọ ererimbot,” kpukpru ini edu uwem nnyịn akpakam owụt uku ye ubọn̄ Abasi nnyịn, Jehovah.—1 Cor. 4:9.

¹⁶ Sia edide “idaha ererimbot emi ke okpụhọde,” nnyịn imoyom mme mbono district nnyịn man an̄wam nnyịn iwụk ntịn̄enyịn ke n̄kpọ eke spirit. (1 Cor. 7:31, NW) Ndinam ndutịm man ẹdụk kpukpru usen oyoyom ukeme, edi oro enen̄ede odot. Ẹtịm Mbono District “Ẹnọ Abasi Ubọn̄” eke isua emi man an̄wam nnyịn isọn̄ọ ida nte nnyịn ibetde Jehovah ndibiere ikpe nnọ ererimbot Satan. Nnyịn ikpakam itre ndiyak n̄kpọ ekededi ọbiọn̄ọ nnyịn ndibọ ukpep oro Jehovah etịmde ọnọ nnyịn.—Isa. 51:4, 5.

[Ekebe ke page 3]

Mme Ini Edinam

Friday

9:20 a.m. - 4:40 p.m.

Saturday

9:00 a.m. - 4:20 p.m.

Sunday

9:00 a.m. - 3:20 p.m.