Leta Otode Otu Ukara
Nte nnyịn idụkde ntọn̄ọ ntọn̄ọ ọyọhọ isua ikie 21 emi, edi n̄kpọ inemesịt ndiwet nnọ mbufo, “ofụri otu nditọete” ke ofụri ererimbot, nnyụn̄ ntoro mbufo ke ọkpọsọn̄ utom mbufo. (1 Pet. 2:17, NW) Ke se ikperede isua 2,000 emi ẹkebede, Jesus okobụp ete: “Ke adan̄aemi Eyen Owo edidide, nte Enye oyokụt mbuọtidem ke isọn̄?” (Luke 18:8) Ifịk ifịk utom mbufo ke isua utom emi ebede ọbọrọ mbụme Jesus emi ke ọkpọsọn̄ uyo ete ih! Ẹsịn ndusụk mbufo ke ndek ẹnyụn̄ ẹsak mbufo ke ntak mbuọtidem mbufo. Ke ediwak itie, mbufo ẹmeyọ ekọn̄, afanikọn̄, udọn̄ọ, m̀mê biọn̄. (Luke 21:10, 11) Ke ntak ifịk oro mbufo ẹnyenede ẹnọ nti utom, Jesus ekeme ndisụk ‘n̄kụt mbuọtidem ke isọn̄.’ Ke akpanikọ idatesịt odu ke heaven ke ntak oro!
Nnyịn imọfiọk ite ke idịghe mmemmem n̄kpọ ndinyene ime. Kere se nditọete nnyịn ẹyọde ke idụt kiet ke n̄kan̄ edem usoputịn Asia. Edida afai mbiọn̄ọ Mme Ntiense Jehovah edi ọsọ ke idụt oro. Ke ndondo emi, mme bodisi ẹma ẹbiat emem emem itie mbono oro odụkde n̄kpọ nte owo 700. Edisịri mme usụn̄ ama akpan owo 1,300 efen ndidụk. Otu mbon ntịme oro ẹkefụhọde n̄kpọ ke iso, emi ndusụk ẹkedide mme bodisi, ẹma ẹda en̄wan ẹka itie mbono oro, ẹtịm ediwak mme andidụk, ẹnyụn̄ ẹsịn ikan̄ ke ebiet oro ẹkebọpde ndida nnịm mbono. Ke mme idaha efen, mbon ukwan̄ ifiopesịt ido ukpono ẹma ẹkama mme eto oro ẹwụkde okpukwak ẹmia nditọete nnyịn ibak ibak.
Mme utọ ibụmede en̄wan emi ẹdi enyene-ndịk n̄kpọ edi idịghe n̄kpọ n̄kpaidem. Ẹma ẹnọ apostle Paul odudu spirit ndiwet ete: “Kpukpru owo eke ẹyomde ndidu eti uwem ke Christ Jesus ẹnyene ndibiom isịn-enyịn.” (2 Tim. 3:12) Ke akpa isua ikie, mme Christian ẹma ẹyọ ukọbọ ke ikọ inua ye ke umia, ndien ẹma ẹkam ẹwot ndusụk mmọ. (Utom 5:40; 12:2; 16:22-24; 19:9) Kpasụk ntre ke ekedi ke ọyọhọ isua ikie 20, ndien nte eyịghe mîdụhe ayaka iso ndidi ntre ke ọyọhọ isua ikie 21 emi. Kpa ye oro, Jehovah ọdọhọ nnyịn ete: “Baba n̄kpọ ekọn̄ kiet eke ẹbotde ẹban̄a fi idikwe unen.” (Isa. 54:17) Nso utịbe utịbe nsọn̄ọ ke oro edi ntem! Ke akpanikọ, nnyịn imenen̄ede isọn̄ urua ke enyịn Jehovah tutu enye ada prọfet Zechariah etịn̄ ete: “Enye emi otụkde mbufo otụk eyen enyịn mi.” (Zech. 2:8, NW) Mbon oro ẹsuade mme andituak ibuot nnọ Jehovah ikemeke ndikan ke akpatre. Edisana utuakibuot edikan!
Ke uwụtn̄kpọ, ke idụt oro ikebemde iso isiak, Mme Ntiense Jehovah ẹnyene obufa n̄wakn̄kan ibat mme asuanetop utịm ikaba ke isua utom 2001. Ih nditọete nnyịn ẹyọ ke idụt oro kpa ye nsọn̄ọn̄kpọ, nte mmọ ẹyọde ke kpukpru ebiet. Ke isua utom emi osụk ebede ke ofụri ererimbot, owo 5,066 ẹkena baptism ke urua kiet kiet nte idiọn̄ọ uyakidem mmọ nnọ Jehovah. Idahaemi mbufa owo emi, ọkọrọ ye nnyịn eken, imebiere ‘ndifọn mma, nnyụn̄ ntịm mfiọk ofụri uduak Abasi.’—Col. 4:12.
Kere n̄ko ban̄a mme n̄kpọntịbe eke ndondo emi ke Greece. Kpa ye ọkpọsọn̄ ukọbọ otode Ufọkabasi Greek Orthodox, idahaemi ukara enyịme Mme Ntiense Jehovah nte “ido ukpono oro ẹdiọn̄ọde.” N̄wed oro ọnọde unyịme emi aka iso ọdọhọ ete ke ufọkutom Bethel ke Greece edi “edisana itie oro ẹnamde asana, emi ẹyakde ẹnọ utuakibuot Abasi.” Nnyịn n̄ko imokop inemesịt ndisian mbufo nte ke isua utom emi ekebede, mme esopikpe ẹma ẹnọ ubiereikpe oro ẹfọnde ẹban̄a utuakibuot nnyịn ke Bulgaria, Canada, Germany, Japan, Romania, Russia, ye United States. Nnyịn imọkọm Jehovah etieti ke ndika iso mberede usụn̄ nnọ akwa utom ke mme idụt oro!
Nte nnyịn ikerede iban̄a mme usụn̄ oro Jehovah ọnọde ikọt esie ibetedem ke ukperedem ini emi, nnyịn imokụt ke enye edi mfọnn̄kan Ufan oro nnyịn ikemede ndinyene. Nnyịn imokop inemesịt ke itie ebuana oro nnyịn inyenede ye enye, ifiọkde ite ke enye ama nnyịn, eteme nnyịn, onyụn̄ enen̄ede nnyịn. Ih, nnyịn iyaka iso isobo mme idomo mbuọtidem. Edi mbuọtidem oro n̄kpọ mîkemeke ndisehede ke Jehovah ọyọsọn̄ọ nnyịn idem. James ekewet ete: “Ẹnịm ẹte edi n̄kpọ ọyọhọ idatesịt, nditọ-ete mi, ke ini nsio-nsio idomo ẹsịmde mbufo; ke ẹfiọkde ẹte mbuọtidem mbufo emi ẹma ẹdomo ẹwụt anam ime ọwọrọ.” (Jas. 1:2, 3) Akan oro, ime nnyịn owụt ima oro nnyịn inyenede inọ Jehovah, ndien emi ada ekese idatesịt ọsọk nnyịn! Ẹnịm ke akpanikọ, ndima nditọete, ẹte ke Jehovah ayan̄wam nnyịn owo kiet kiet. Edieke isọn̄ọde ida inam akpanikọ, enye iditreke ndin̄wam nnyịn ndibe ndụk obufa ererimbot. Enye oyom nnyịn ikụt unen.
Ntem, nnyịn imesịn udọn̄ inọ mbufo nditọete, n̄kpri ye ikpọ, ndika iso nti utịbe utịbe edidiọn̄ oro anade ke iso. Akpakam edu nnyịn ebiet eke apostle Paul, emi ekewetde ete: “Mbat nte ndutụhọ eke ikụtde idahaemi idịghe se idotde ndida ndomo ye ubọn̄ eke ẹdiyararede ke idem nnyịn.” (Rome 8:18) Ẹbuọt idem ye Jehovah ke ini ẹsobode idiọk idaha ekededi. Ẹnyene ime, ẹkûnyụn̄ ẹduọk mbuọtidem. Mbufo idituaha n̄kpọfiọk tutu amama. Ikọ Abasi ọnọ nnyịn nsọn̄ọ ete: “Edinen owo oyodu uwem ke mbuọtidem esie.”—Hab. 2:4.
Nditọete mbufo,
Otu Ukara eke Mme Ntiense Jehovah