“Ẹnam Nti Utom Uwak Uwak”

¹ Ke mme akpatre isua ifịk ifịk utom ukwọrọikọ esie, apostle Paul ama anam utom ọtọkiet ye Timothy ye Titus. Enye ama ewet ukem ikọ nsịnudọn̄ oro ọnọ mmọ kiet kiet. Enye ọkọdọhọ Titus ete ke “mmọ emi ẹbuọtde idem ye Abasi” ẹkpenyene ‘ndisịn ifịk nnyene eti ubọkutom eke mmọ ẹnamde.’ (Titus 3:8) Enye ama ọdọhọ Timothy ete ke mbon oro ẹdoride enyịn ke Abasi ẹkpenyene ‘ndinam nti utom uwak uwak.’ (1 Tim. 6:17, 18) Emi edi ata eti item ọnọ kpukpru nnyịn! Edi nso idinụk nnyịn ndinam nti utom ke uwem nnyịn? Ndien mme akpan utom ewe ke nnyịn ikeme ndinam ke mme usen emi ẹdide ke iso?

² N̄kpọ oro onụkde owo ndinam nti utom uwak uwak oto edinịm ke akpanikọ nnyịn, ima oro inyenede inọ Jehovah ye utịbe utịbe idotenyịn oro enye ọnọde nnyịn. (1 Tim. 6:19; Titus 2:11) Akpan akpan ini emi ke isua, ẹti nnyịn ẹte ke Jehovah ọkọnọ Eyen esie edi isọn̄ man Jesus okpowụt unen Ete esie onyụn̄ eberede usụn̄ oro adade esịm uwem ọnọ kpukpru owo oro ẹdotde. (Matt. 20:28; John 3:16) Ẹyenam emi enen̄ede an̄wan̄a ke usọrọ Editi n̄kpa Christ ke March 28. Ke ndinam n̄kpọ mban̄a idotenyịn nnyịn eke uwem nsinsi, nte inụkke nnyịn ndinam ofụri se ikemede ‘ndinam nti utom uwak uwak’? Ke akpanikọ onụk nnyịn! Nso utom ke nnyịn ikpanam idahaemi?

³ Nti Utom Ndinam ke March ye ke Oro Ebede: Ke akpanikọ, nnyịn iyodụk Editi—ata akpan edinam ke isua, oro Mme Ntiense Jehovah ke ofụri ererimbot ẹnyenede. (Luke 22:19) Edi nnyịn iyom ndibuana idara edinam oro ye adan̄a ediwak owo nte ikekeme. Ẹse ibatutom ke Enyọn̄-Ukpeme eke January 1, 2002, ndien mbufo ẹyekụt ke isua oko ke ediwak idụt ke ofụri ererimbot, mbon oro ẹkedụkde Editi ẹma ẹwak utịm ikata, ikanan̄, ikotion m̀mê akande oro ẹkan ibat mme asuanetop. Ke akpanikọ emi akada ifịk ifịk ukeme kpukpru owo ke mme esop ndisuan n̄wedikot Editi ntatara ntatara ke ofụri efakutom. Ke ntre, nnyịn iyom ndibiat ekese ini nte ikekeme ọtọn̄ọde idahaemi tutu esịm March 28 ndikot mme owo ẹdi Editi, in̄wamde mmọ ẹkpep ẹban̄a idotenyịn edinyan̄a.

⁴ Ke ọfiọn̄ April, didie ke nnyịn ikeme ndika iso nnam nti utom oro ikọtọn̄ọde ke ọfiọn̄ oro ekebemde iso, ke ntem ‘inamde nti utom uwak uwak’? Edi ke ndika iso mbuana ye nduaidem ke utom edikwọrọ eti mbụk, “isịnde esịt inam nti utom.” (Titus 2:14; Matt. 24:14) Edieke afo mûkekemeke ndinam utom usiakusụn̄ unọ un̄wam ke March, nte afo emekeme ndinam ntre ke April ye/m̀mê May? Edieke afo anamde utom usiakusụn̄ unọ un̄wam ke March, nte afo emekeme ndika iso?

⁵ Ndusụk owo oro ẹnamde utom idịbi udia ẹkụt ke mmimọ imekeme ndibiat hour kiet m̀mê akande oro ke an̄wautom ke usụn̄ uka utom, ndinọ ikọ ntiense efak, m̀mê ndinyene nneme ye mme owo oro ẹnamde utom ke itie mbubehe oro ẹbakde ẹberede ke usenubọk. Mbon en̄wen ẹnam ndutịm ndida ubak ini udia mmọ nnọ ikọ ntiense. Ndusụk owo ẹsikam ẹnịm ukpepn̄kpọ Bible ke ini oro ye ekemmọ owo utom. Ediwak nditọete oro ẹdide iban ufọkndọ ẹma ẹsio ini ẹnịm ẹnọ an̄wautom ke adan̄aemi nditọ mmọ ẹdude ke ufọkn̄wed. Ke ndibabak ndemede esisịt ke ndusụk usen nse mban̄a mme utom esịtufọk, mmọ ẹsinyene ekese ini ke uwemeyo ẹnọ utom ukwọrọikọ ye edikpep n̄kpọ.—Eph. 5:15, 16.

⁶ Idem ọkpọkọm afo ukemeke ndinam utom usiakusụn̄ unọ un̄wam, ekeme ndidi afo ayanam ọkpọkpọ ndutịm ndinyene akamba udeme ke an̄wautom, anamde ofụri se ekemede ‘ndifọn ido, nnyụn̄ nnam nti utom uwak-uwak, nnyụn̄ ntat ubọk, nnyịme ndibuana’ akpanikọ ye mmọ efen.—1 Tim. 6:18.

⁷ Ti Eti Utom eke Edinam Mbet: Ke isua kiet kiet mbon oro ẹnyenede udọn̄ ẹdu emi ẹsidụkde Editi. Nte ndusụk owo ke esop ẹkeme ndinọ ntịn̄enyịn ke mbon oro ẹdụkde, edi mîkpepke n̄kpọ kan̄a? Nte ẹkeme ndifiak n̄ka n̄kese mmọ ye idotenyịn edin̄wam mmọ ẹnam n̄kọri eke spirit? Ekeme ndidi ndusụk mbon oro ẹdụkde Editi ẹdi iman Mme Ntiense. Mbon eken ẹkeme ndidi mme owo oro ẹkekpepde n̄kpọ ke ini edem emi n̄kukụre ẹyomde nsịnudọn̄ man ẹfiak ẹtọn̄ọ ukpepn̄kpọ ẹnyụn̄ ẹdụk mme mbono esop kpukpru ini. Nso idatesịt ke nnyịn idinyene ntem ndikụt mmọ ẹtienede nnyịn ẹkabade ẹdi ifịk ifịk mme asan̄autom Jehovah!

⁸ Ye n̄kọri oro idisịnde ke ndibuana ke an̄wautom ke March ye ke oro ebede, eyedi nnyịn iyenen̄ede ikụt mme owo efen efen emi ẹnyenede udọn̄ oro idifiakde ika ibịne. Domo ndibụp mmọ mbụme mbemiso ọkpọn̄de. Ndien dọhọ ke iyafiak idi idibọrọ mbụme oro ke ini efen. Ke ini nnyịn inamde emi, ẹyeberede usụn̄ ẹnọ mfiakn̄ka. Nte nnyịn ikemede ndisọp nnam mfiakn̄ka, ntre ke etịm ọfọn. Edieke nnyịn mîkekemeke nditọn̄ọ ukpepn̄kpọ ke akpa ediwaha, nnyịn iyoyom ndidomo nditọn̄ọ ke ediwaha efen edieke ikemede.

⁹ Ke ini nnyịn ibuanade ke unọ ikọ ntiense efak, udọn̄ nnyịn ekpedi ndidomo nditọn̄ọ nneme ye mme owo. Mbon oro ẹnyenede udọn̄ ẹsinọ ediwak mme asuanetop enyịn̄, adres, ye nọmba urụk ukopikọ mmọ ke ini ẹsobode ye mmọ ke adan̄aemi ẹnọde ikọ ntiense ke efak. Edieke owo oro afo osobode mîdụn̄ke ke efakutom mbufo, bọ babru Please Follow Up (S-43) ke Ufọkmbono Obio Ubọn̄, wet n̄kpọ yọhọ, nyụn̄ yak nọ ewetn̄wed esop, emi edinọde enye ẹsọk esop emi odude ke efakutom oro owo emi odụn̄de. Edieke ewetn̄wed mîkemeke ndinam oro, enye ọyọnọ ẹsọk ọfis n̄kọk itieutom man ẹnam n̄kpọ ẹban̄a. Ke usụn̄ emi ẹkeme ndifori udọn̄ oro.

¹⁰ Edieke owo oro enyenede urụk ukopikọ ndien ọbọde nọmba urụk ukopikọ utu ke adres, do nam mfiakn̄ka ebe ke ndikot owo oro. Bem iso tịm idem ban̄a se edinemede. Kama n̄wed Reasoning man ọsọsọp ada anam ndụn̄ọde. Ndusụk owo ẹnyene nti utịp ke ndikpep n̄kpọ ye mme owo ke urụk ukopikọ, esịnede mme owo oro ẹsisọn̄de ndisobo ye mmọ ke ufọk. Eyenete an̄wan kiet ama ọtọn̄ọ ndibụp iban oro ẹnyenede udọn̄ oro enye okosobode ke utom ukwọrọikọ eke enyịnusụn̄ ke enyịnusụn̄ mban̄a nọmba urụk ukopikọ, ndien nte utịp enye ama ekeme nditọn̄ọ ukpepn̄kpọ Bible iba.

¹¹ Bere ye Mbiowo ke Ndin̄wam Mbon Oro Mînamke Utom Aba: Mbiowo ẹnen̄ede ẹnyene udọn̄ ke ndinọ mbon emi ima ima ntịn̄enyịn. Ata ediwak ke otu mmọ emi ẹma ẹfiak ẹtọn̄ọ ndidụk mme mbono esop ke idemmọ. Mmọ ẹma ẹkụt ke ọfọn ndiyom n̄kpet n̄kpet itie ebuana ye esop Jehovah man ẹnyene ukpeme eke spirit oro ẹtịn̄de ẹban̄a ke Psalm 91. Ndusụk ke otu mmọ emi ẹben̄e idem idahaemi ndifiak mbuana ke an̄wautom. Edieke mbon eken oro mînamke utom aba ẹdụkde Editi ke ọfiọn̄ emi, ekeme ndidi mmọ ẹyema ẹnịm ọkpọkpọ ukpepn̄kpọ Bible ye mmimọ. Edieke oro edide ntre, mbiowo ẹyenam ndutịm man owo ekpep n̄kpọ ye mbon oro ẹyomde un̄wam. Edieke ẹdọhọde fi an̄wam ke afan̄ emi, ẹyetịm ẹdara edidianakiet fo.—Rome 15:1, 2.

¹² Ka Iso “Nam Nti Utom”: Ediwak owo emi ẹkebuanade ke usiakusụn̄ unọ un̄wam ke ọfiọn̄ kiet m̀mê akande oro ẹkụt nte utom an̄wautom mmọ enyenede n̄kọri ke mme ọfiọn̄ oro ẹtienede. Mmọ ẹma ẹkụt mbon oro ẹnyenede udọn̄ oro mmọ ẹkekerede ke oyom ẹfiak ẹkese. Emi ama onụk mmọ ẹsịn ukeme efen efen ndiwọrọ an̄wautom ata ediwak ini man ẹfiak ẹkesobo ye mbon oro ẹkenyenede udọn̄. Ndusụk mmọ ẹma ẹtọn̄ọ ukpepn̄kpọ ndien oro ama an̄wam mmọ ndinyene ata akamba udeme ke an̄wautom.

¹³ Ndien mbon efen ẹnyene akamba idatesịt ke utom ukwọrọikọ ye utom edinam mbet tutu onụk mmọ ndinam ndụn̄ọde ke mme n̄kpọ oro mmọ ẹnịmde ke ebeiso n̄kpọ. Nte utịp, ediwak mmọ ẹma ẹkeme ndisịbe ini oro ẹsịnde ke utom idịbi udia, ẹnyụn̄ ẹka iso ke ndinam usiakusụn̄ unọ un̄wam. Mbon efen ẹma ẹkeme ndidụk utom usiakusụn̄ ofụri ini. Mmọ ẹma ẹkeme ndidori enyịn ọyọhọ ọyọhọ ke Abasi utu ke ndidori ke mme n̄kpọ oro ẹkemede ndinyene nto ererimbot. Mmọ ẹma ẹkụt nte ‘nditat ubọk, nnyịme ndinọ owo n̄kpọ’ adade akwa edidiọn̄ otode Jehovah edi onyụn̄ ọsọn̄ọde idotenyịn mmọ ke ndinyene “ata uwem.” (1 Tim. 6:18, 19) Edi akpanikọ, nte ediwak owo ẹdụkde utom usiakusụn̄, ntre ke ofụri esop ọbọ ufọn. Mme asiakusụn̄ ẹnyene edu editịn̄ mban̄a mme ifiọkutom mmọ ye edikot mmọ efen ẹbuana ye mmimọ ke an̄wautom, ndien emi anam n̄kọri eke spirit okpon ke esop.

¹⁴ Akpakam kpukpru nnyịn ‘inam nti utom uwak uwak’ ke ini Editi emi ye ke oro ebede, ebe ke ndibuana ediwak ini ke utom ukwọrọikọ Christian nnyịn. Ẹyak nnyịn iwụt esịtekọm iban̄a se Jehovah anamde ke ndinọ nnyịn idotenyịn edidu uwem ke edinen obufa isọn̄.—2 Pet. 3:13.