Ndidiana ye Jehovah ye Eyen Esie ke Idatesịt
Ẹdinịm Ata Akpan N̄kpọntịbe eke Isua Emi ke March 28
1 Ke ndinịm Udia Mbubịteyo Ọbọn̄ ke utịn ama okosụhọde ke March 28, 2002, nnyịn iwụt idara idara edidiana nnyịn ye Jehovah Abasi ye Jesus Christ. Ke akpan edinam oro, nsụhọ Christian oro ẹyetde aran ẹyenyene san̄asan̄a “ebuana” (NW) ye mme adiakpa Obio Ubọn̄ eken, ye Ete, ye Eyen esie. (1 John 1:3; Eph. 1:11, 12) Ediwak miliọn mme “erọn̄ en̄wen” ẹyetie ẹkere utịbe utịbe ifet oro mmọ ẹnyenede ndidiana ye Jehovah ye Eyen esie, ẹnamde utom Abasi ye mmọ ke esịt ye ekikere kiet!—John 10:16.
2 Ndinam Utom Ọtọkiet ke N̄kpet N̄kpet Itie Ebuana: Jehovah ye Jesus ẹdiana kiet ke idatesịt kpukpru ini. Mmọ ẹma ẹnyene n̄kpet n̄kpet itie ebuana ke anana-ibat isua mbemiso ẹbotde owo. (Mic. 5:2) Ntem ntotụn̄ọ mbọbọ ima ama ọkọri ke ufọt mmọ mbiba. Nte eti ibuot oro ẹwụtde nte owo, akpa edibon Eyen emi ke edidu esie mbemiso edide owo ama ekeme ndidọhọ: “N̄konyụn̄ ndi se idatde [Jehovah] esịt ofụri usen; ndara ke iso esie kpukpru ini.” (N̄ke 8:30) Ndibiat anana-ibat isua ke ntotụn̄ọ itie ebuana ye Enye emi ima otode ama otụk Eyen Abasi!—1 John 4:8.
3 Ke enyenede edinyan̄a oro ubonowo oyomde ke ekikere, Jehovah ama emek ikpọn̄-ikpọn̄ edibon Eyen esie, oro akadatde esịt aban̄a ubonowo akpan akpan, ndinọ uwa ufak oro ọnọde n̄kukụre idotenyịn oro inyenede. (N̄ke 8:31) Kpa nte Jehovah ye Eyen esie ẹdianade ẹnam uduak kiet, nnyịn idiana ye mmọ, ye kiet eken n̄ko ke ọkpọsọn̄ mbọbọ ima, inamde uduak Abasi ye idatesịt.
4 Ndiwụt Ntotụn̄ọ Esịtekọm Nnyịn: Ke ndidu ke Editi nnyụn̄ ntịn̄ enyịn nnọ n̄kpan̄utọn̄ ukpono ukpono, nnyịn imekeme ndiwụt ata esịtekọm nnyịn mban̄a ima Jehovah ye uwa emi Eyen esie akawade ọnọ nnyịn. Akpan n̄kpọ oro ẹdisiode ẹwụt edidi ima ima uwụtn̄kpọ Jesus, edinam akpanikọ esie tutu esịm n̄kpa ke ndinọ ufak, ye itie edikara esie nte Edidem Obio Ubọn̄ Abasi emi ẹwụkde, ọkọrọ ye mme edidiọn̄ oro Obio Ubọn̄ emi edidade ọsọk ubonowo. Ẹyeti nnyịn n̄ko ẹban̄a ufọn edika iso n̄wụt mbuọtidem nnyịn, inamde utom ifịk ifịk ke n̄kemuyo ye uduak Jehovah nte ‘mme anditiene akpanikọ nnam n̄kpọ nnọ Abasi.’—3 John 8; Jas. 2:17.
5 Ndin̄wam Mbon En̄wen Ẹbuana ye Nnyịn: Otu mbiowo ẹkpenyene ndisịn akpan ukeme ndisịn udọn̄ nnọ kpukpru Mme Ntiense oro mînamke utom aba ke efakutom ndidụk Editi n̄kpa Christ. (Matt. 18:12, 13) Ẹwet enyịn̄ mbon oro ẹdikotde mbak ẹdifre owo ndomokiet ẹnyụn̄ ẹnọ kpukpru mmọ ọkpọkpọ ikot.
6 Nte afo ọmọfiọk mbon efen oro ẹkemede ndidi Editi? Bem iso nam n̄kpọ ndikọri esịtekọm mmọ nnọ edinam emi. Nọ mmọ ufiop ufiop ikot, nyụn̄ nam mmọ ẹfiọk ke ẹdara mmimọ. Ẹyak nnyịn isịn ifịk ndinọ kpukpru nditọ ukpepn̄kpọ Bible nnyịn ye mbon efen emi ẹnyenede udọn̄, ọkọrọ ye mme andibuana ke ubon ye mme ọdiọn̄ọ ikot ẹdibuana ke ata akpan edinam emi ke isua. Mme ufọn ufak ẹdu ẹnọ kpukpru owo oro ‘ẹbọde akan ifiọk Christ Jesus.’ (Phil. 3:8) Mbon oro ẹbuọtde idem ke uwa Christ ẹkeme ndinyene ọkpọsọn̄ idotenyịn nsinsi uwem.—John 3:16.
7 Ẹkûda utịp oro Editi ekemede ndinyene ke idem mbon oro ẹnyenede esịt akpanikọ ke ekpri n̄kpọ. Isua iba emi ẹkebede ke isuo kiet ke Papua New Guinea, owo 11 oro ẹkenyenede udọn̄ ẹma ẹwat ke hour 17 ke ekpri ubom ẹbe akpa emi adahade man ẹkedụk. Ntak-a? Mmọ ẹkedọhọ ete: “Nnyịn ikoyom ndinịm usọrọ Editi Christ ye ekemmọ mme andituak ibuot nnọ Jehovah; ntre isan̄ oro ama etịm odot.” Kere ban̄a ifịk oro mbon emi ẹkenyenede udọn̄ do ẹkewụtde ye esịtekọm oro mmọ ẹkenyenede ke ndidiana ye Jehovah, Eyen esie, ye nditọete Christian ke idatesịt!
8 Dọhọ ke iyọtọn̄ọ ukpepn̄kpọ Bible ye kpukpru mbon oro ẹnyenede udọn̄. Sịn udọn̄ nọ mmọ ndidụk mme mbono esop kpukpru ini ndinyụn̄ mbuana akpanikọ oro mmọ ẹkpepde ye mbon efen. N̄wam mmọ ‘ẹsan̄a ke un̄wana’ ẹnyụn̄ ‘ẹnam se idide akpanikọ’ ebe ke ndida mme edumbet Bible nsịn ke edinam ke uwem mmọ. (1 John 1:6, 7) N̄wam mmọ ẹkọri n̄kpet n̄kpet itie ebuana ye Jehovah ẹnyụn̄ ẹka iso ndikọri esịtekọm oro mmọ ẹnyenede ẹnọ ifet edidianakiet nnam uduak esie.
9 Nso utịbe utịbe ifet ke edi ntem ndidiana idara idara ke ‘spirit kiet, nnyụn̄ nda esịt kiet n̄n̄wana en̄wan mban̄a mbuọtidem emi odude ke gospel’! (Phil. 1:27, 28) Ẹyak nnyịn isak iso ise inem inem itie ebuana ọtọkiet nnyịn ke Editi ke March 28, ikọmde Jehovah ye Eyen esie kpukpru ini!—Luke 22:19.