Ufọkn̄wed Utom Ukara Abasi eke 2002
1 Ata ediwak owo ẹda ukeme editịn̄ ikọ mfefere mfefere. Nte ededi, editịn̄ ikọ edi enọ oro otode Jehovah. Enye anam nnyịn inyene nneme ye mbon efen inyụn̄ itịn̄ mme ekikere ye mme ntụk nnyịn. Akpa kan̄a, nnyịn imekeme ndida enye ntoro Abasi nnyịn.—Ps. 22:22; 1 Cor. 1:4-7.
2 Ẹnọ iren, iban, ye nditọwọn̄ ukpep ke Ufọkn̄wed Utom Ukara Abasi man ẹtan̄a enyịn̄ Jehovah. (Ps. 148:12, 13) Ndutịm ufọkn̄wed eke 2002 ọyọhọ ye ntatara ibuot nneme Bible oro nnyịn ke idem nnyịn ikemede ndibọ ufọn nto nnyụn̄ nda nnam n̄kpọ ke an̄wautom. Ke nditịm idem nnọ ufọkn̄wed nnyụn̄ ntiene mbuana, nnyịn imekeme ndifori ifiọk ye usọ nnyịn nte mme ọnọ ukpep Ikọ Abasi.—Ps. 45:1.
3 Kot Bible ke Usen ke Usen: Edieke isiwakde ndikama Bible, nnyịn imekeme ndida ifet ekededi oro nnyịn inyenede ndikot enye. Ata ediwak nnyịn imesinyene nyọhọ-nsụhọ ini uwemeyo oro nnyịn ikemede ndida nnam emi. Ọfọn didie ntem ndikot ke nsụhọde n̄kaha page kiet ke usen, oro edide ofụri se ẹyomde ndika iso ke ndutịm edikot Bible oro ẹwụtde ke ndutịm ufọkn̄wed!—Ps. 1:1-3.
4 Edikeme ndikot Bible ọfọn ekeme ndin̄wam nnyịn isịm esịt mme andikpan̄ utọn̄ nnọ nnyịn onyụn̄ onụk mmọ nditoro Jehovah. Nditọete iren oro ẹnyenede Utịn̄ikọ Nọ. 2 ke ufọkn̄wed ẹkpenyene ndikot, mfiak n̄kot, se ẹnọde ẹkot uyo ọwọrọ. Esenyịn ufọkn̄wed oyotoro onyụn̄ ọnọ mme ekikere man ẹfori edikot n̄wed oro.
5 Da N̄wed Ifiọk ye N̄wed Inemesịt Ubon Nam N̄kpọ: Utịn̄ikọ Nọ. 3 ọkọn̄ọ ke n̄wed Ifiọk ndien Nọ. 4 ọkọn̄ọ ke n̄wed Inemesịt Ubon. Eyedi ekese nnyịn imenen̄ede inyene udọn̄ ke ndida nti n̄kpọ un̄wam emi nnam n̄kpọ ke an̄wautom. Nditọete iban ẹkpenyene ndimek mme usụn̄ oro ẹtịmde ẹdot ye efakutom. Esenyịn ufọkn̄wed ekpenyene ndinọ akpan ntịn̄enyịn ke nte mmọ ẹnọde ukpep ẹnyụn̄ ẹdade N̄wed Abasi ẹnam n̄kpọ.
6 Akpakam Ufọkn̄wed Utom Ukara Abasi an̄wam kpukpru nnyịn ndika iso nda enọ editịn̄ ikọ emi Jehovah ọnọde nnyịn ntan̄a eti mbụk nnyụn̄ ntoro akwa Abasi nnyịn, kpa Jehovah!—Ps. 34:1; Eph. 6:19.