Mme Edidiọn̄ Ẹtode Ediwụt Esịtekọm nnọ Ima Jehovah—Ikpehe 1
1 Apostle John ekewet ete: “Nnyịn ima ima, koro [Jehovah] ekebemde iso ama nnyịn.” (1 John 4:19) Ke ini nnyịn ikerede iban̄a kpukpru n̄kpọ oro Jehovah ọnọde nnyịn, esinụk nnyịn ndiwụt ntotụn̄ọ esịtekọm. Jesus enịm uwụtn̄kpọ ke ndinam emi ebe ke ndinọ ikọ ntiense ke n̄kopitem mban̄a enyịn̄ ye Obio Ubọn̄ Abasi. (John 14:31) Nnyịn iyanam ọfọn ndikere mban̄a ndusụk usụn̄ oro nnyịn ikemede ndiwụt esịtekọm nnọ ima Jehovah ye mme edidiọn̄ oro ẹditode do.
2 Ndika ke Ufọk ke Ufọk: Jesus ama ekpep mme mbet esie nte ẹnamde utom ukwọrọikọ Obio Ubọn̄. Mme ndausụn̄ esie ẹwụt in̄wan̄-in̄wan̄ nte ke mmọ ẹkesuan eti mbụk ke ufọk ke ufọk. (Luke 9:1-6; 10:1-7) Oyom ima Abasi ye mbọhọidụn̄ ndika iso nsan̄a to ke enyịnusụn̄ sịm enyịnusụn̄ ke ini nnyịn isobode unana udọn̄ ye ubiọn̄ọ. Nte ededi, ke ndinam ntre, nnyịn imọbọ ufọn ọkpọkpọ koro mbuọtidem nnyịn enen̄ede ọsọn̄, edinịm ke akpanikọ nnyịn enen̄ede ọsọn̄, idotenyịn nnyịn onyụn̄ enen̄ede ayama.
3 Nnyịn imokụt ediwak mbon oro ẹkopde biọn̄ ye nsatitọn̄ akpanikọ, nte inamde utom ke idak ndausụn̄ mme angel. (Edi. 14:6) Mme enyeneufọk ẹmedọhọ ẹte ke mmimọ ima ibọn̄ akam iben̄e un̄wam ke ini Ntiense ekedide enyịnusụn̄ mmimọ. Ntiense iba ye ekpri eyen kiet ẹkenam utom eke ufọk ke ufọk ke isuo Caribbean kiet. Ke ini ikpọ owo oro ẹkebierede nditre do usen oro, ekpri eyen emi ama ebe aka ke idemesie onyụn̄ ọkọkọn̄ enyịnusụn̄ efen. N̄kaiferi kiet ama eberede usụn̄. Ke ini ikpọ owo iba emi ẹkekụtde emi, mmọ ẹma ẹwọn̄ọde ẹka ẹkenyene nneme ye enye. Enye ama ọdọhọ mmọ ẹdụk ẹdi, anamde an̄wan̄a nte ke imọ ikosụk ibọn̄ akam ite Abasi ọnọ Mme Ntiense ẹbịne imọ man ẹdikpep imọ Bible!
4 Edinọ Ikọ Ntiense ke Mme Efak: Sia enen̄erede ọsọn̄ ke ndusụk ebiet ndikụt mme owo ke ufọk, edinọ ikọ ntiense efak edi usụn̄ emi enyenede uforo ndinọ mme owo ikọ ntiense. N̄ko-n̄ko, ediwak owo ẹdụn̄ ke mme ufọk oro ẹnọde ọkpọsọn̄ ukpeme emi nnyịn mîkemeke ndinam utom edito ke enyịnusụn̄ nsịm enyịnusụn̄. Nte ededi, esịtekọm oro inyenede inọ ima Jehovah onụk nnyịn ndida kpukpru usụn̄ oro ikemede, esịnede edinọ ikọ ntiense efak, nnam n̄kpọ nte ọfọnde, ndinyene nneme etop Obio Ubọn̄ ye mme owo.—N̄ke 1:20, 21.
5 Ndinam Mme Mfiakn̄ka: Sia nnyịn iyomde mbon emi “ẹdiọn̄ọde ẹban̄a udọn̄ n̄kpọ eke spirit mmọ,” nnyịn iyom ndinam se nnyịn ikemede ndiyụhọ udọn̄ oro. (Matt. 5:3, NW) Emi oyom ete nnyịn ifiak ika ikọduọk mmọn̄ ke n̄kpasịp akpanikọ oro nnyịn ikọtọde. (1 Cor. 3:6-8) Eyenete an̄wan kiet ke Australia ama ọnọ n̄wan emi eketiede nte ikenen̄ekede inyene udọn̄, tract. Kpa ye oro, eyenete oro ama esịn ifịk odomo ndifiak nyom ebietidụn̄ esie. Ke ama okokụt n̄wan emi ke akpatre, eyenete nnyịn ama okụt ete ke enye ama ọkọnyọn̄ ke akpa ediwaha oro, n̄wan oro ama edep ọsọn̄urua Bible kiet. Eyenete emi ama ọtọn̄ọ ukpepn̄kpọ ye enye!
6 Ndinịm Mme Ukpepn̄kpọ Bible: Emi ekeme ndidi ikpehe utom ukwọrọikọ nnyịn emi ọnọde inemesịt ye uyụhọ akan. Nso edidiọn̄ ke edi ntem ndin̄wam mme owo ẹkpep ẹban̄a Jehovah, ndikụt mmọ ẹnamde mme ukpụhọde ke uwem mmọ man ẹnem enye esịt, nnyụn̄ n̄kụt baptism Christian mmọ nte idiọn̄ọ ediyak idem mmọ nnọ Abasi!—1 Thess. 2:20; 3 John 4.
7 Ke nsiondi efen, nnyịn iyeneme iban̄a mme usụn̄ efen efen emi ẹdiọn̄de nnyịn ke ndiwụt esịtekọm nnọ ima Jehovah.