Nte Afo Amanam Utom fo Ama Ọyọhọ Ọyọhọ?
1 Ke n̄wed Utom, ẹma ẹnam nnyịn ifiọk ite ke mme mbet Jesus ẹma ẹnam utom ukwọrọikọ mmọ ẹma ebe ke ndinọ “ọyọhọ ọyọhọ ikọ ntiense.” (Utom 2:40; 8:25; 28:23, NW) Oro ekenen̄ede edi se Apostle Paul okoyomde ndinam. (Utom 20:24) Nte oro idịghe utịtmbuba fo nte asan̄autom eti mbụk? Didie ke afo ekeme ndinam emi?
2 Tịm Nneme Fo: Man okụt ete ke ọmọnọ eti ikọ ntiense ke utom ukwọrọikọ, ntịmidem edi akpan n̄kpọ. Emi enen̄ede edi ntre ke ini ẹnọde mme magazine, sia ibuotikọ ẹsikpụhọrede kpukpru ini. Man ẹtịm nnyịn idem nte ọfọnde, nsiondi Utom Obio Ubọn̄ Nnyịn emi osio obufa n̄kpọ edi—odude ke ikpehe ubọk ufien, emi ọnọde uwụtn̄kpọ mme nneme magazine Enyọn̄-Ukpeme ye Awake! eke ndondo emi. Ẹyesio akpan n̄kpọ oro edidemerede udọn̄ ediwak owo ẹwụt ke ekemini ibuotikọ ke nsiondi kiet kiet. Didie ke afo ekeme nditịm mbio mbio nneme emi?
3 Mek ekikere oro afo ekerede ke eyenen̄ede enyene uforo ke efakutom mbufo. Kot ibuotikọ emi ẹwụtde ye ntịn̄enyịn, nyụn̄ tịn̄ enyịn ke mme akpan n̄kpọ oro ẹkemede ndidemede udọn̄. Yom itien̄wed Abasi oro ẹsiakde ẹsịn ke magazine emi, oro enyenede ebuana ye nneme ye oro afo edikemede ndikot nnọ enyeneufọk. Dian ibio ibio utịtikọ man esịn udọn̄ ọnọ andikpan̄ utọn̄ ndikot magazine emi ndien edieke odotde dian ibio ibio ikọ nte ke enyeneufọk ekeme ndinọ etịbe ke utom ofụri ererimbot eke Mme Ntiense Jehovah. Idahaemi, nam ndomonse ke nneme fo.
4 Diomi Ndida Bible Nnam N̄kpọ: Ye eti ndutịm, emekeme ndisịn itien̄wed Abasi ke nneme fo ediwak ini. Ke uwụtn̄kpọ, mme asuanetop emi ẹnyenede mbufiọk ke ediwak itie ẹkụt unen ebe ke ndikama Bible n̄ka enyịnusụn̄, n̄kọm enyeneufọk, nnyụn̄ ndọhọ:
◼ “Nnyịn ibụp mme owo m̀mê mmọ ẹnịm emi ke akpanikọ . . . ” Kot Genesis 1:1, ndien ekem obụp ete: “Nte afo emenyịme ye ikọ oro?” Edieke owo oro enyịmede, ekem dọhọ: “Ami n̄ko mmenyịme. Nte ededi, nte afo ekere ete ke edieke edide Abasi okobot kpukpru n̄kpọ, ke enye n̄ko edi ntak idiọkido?” Ke ama ekenyịme ibọrọ owo oro, kot Ecclesiastes 7:29. Kụbọde n̄wed Ifiọk ka page 71, nyụn̄ kot ikpehe ekikere 2. Sịn udọn̄ nọ owo oro ndikot n̄wed emi.
5 Nam N̄kpọ Ban̄a Kpukpru Udọn̄: Afo ukemeke ndinam utom fo mma edieke afo mûnamke n̄kpọ uban̄a udọn̄ oro afo okokụtde. Ke ini afo enyenede eti nneme, inamke n̄kpọ m̀mê emenịm magazine m̀mê mme n̄wed eken, wet enyịn̄ ye adres owo oro. Domo ifịk ifịk ndikọri udọn̄ owo oro ebe ke ndifiak n̄ka usọp usọp. Ke usụn̄ ekededi, dọhọ ke iyom nditọn̄ọ ukpepn̄kpọ Bible.
6 Mme mbet akpa isua ikie ẹma ẹfiọk ẹte ke Jesus okowụk mmimọ ‘ndinọ ọyọhọ ọyọhọ ikọ ntiense.’ (Utom 10:42, NW) Ukem ewụhọ oro abuana nnyịn, koro enye edi n̄kukụre usụn̄ oro nnyịn idikemede ndinam mme mbet. (Matt. 28:19, 20) Yak nnyịn isịn ofụri ukeme nnyịn ndinam utom nnyịn mma.—2 Tim. 4:5.