Ukpepn̄kpọ Bible Ubon Ofụri Ini—Ntak Edide Akpan N̄kpọ Ntre?
1 “N̄kowụt esịtekọm didie ntem nnọ Jehovah kaban̄a ukpep oro n̄kọbọde nto ete ye eka mi! Mma mfiọk nte ke enye ama etịp esịn ke ami ndidiana kpukpru ini ye esop Jehovah.” Mme ikọ emi owo Otu Ukara eketịn̄de mi owụt akwa utịp emi ukpepn̄kpọ Bible ubon ofụri ini enyenede. Kpa ye en̄wan eke usen ke usen man ẹnyene se ẹdade ẹdu uwem, ntak emi ẹkpenịmde ukpepn̄kpọ Bible ubon ofụri ini?
2 Owụt Ima Inyenede inọ Abasi: Ọkpọsọn̄ ima oro inyenede inọ Abasi oyonụk nnyịn ndinịm kpukpru mbet esie. (1 John 5:3) Emi esịne ndikpep nditọ nnyịn n̄kpọ toto ke ata ntọn̄ọ ntọn̄ọ ini uyen. (Deut. 6:5-7) Nditọwọn̄ ke ndammana usụn̄ ẹsinyene udọn̄ ndibọ ukpep. Mmọ ẹsinen̄ede ẹse ẹnyụn̄ ẹkop kpukpru se nnyịn itịn̄de inyụn̄ inamde ẹsinyụn̄ ẹsọp ndikpebe uwụtn̄kpọ nnyịn. (N̄ke 20:7) Ntre mme edu Abasi ẹnyene ndibem iso ndu ke esịt mme ete ye eka. Ndiwụt mme utọ edu Abasi oro edi uyarade ima oro ẹnyenede ẹnọ Abasi.—N̄ke 27:11.
3 Anam N̄kpọ nte Ukpeme: Sia nditọ nnyịn mînyeneke mbufiọk ke uwem, Satan ye idiọk ererimbot esie ẹnam mmọ ẹdi iso en̄wan. Ẹnyịk mmọ ndibịne utịtmbuba uma inyene obụkidem ye eke ererimbot. Nditọwọn̄ ẹdide Christian ẹyom un̄wam man ẹwụk ntịn̄enyịn ke mme utịtmbuba eke spirit, mîdịghe ntre ẹyemụm mmọ mmemmem mmemmem.—Rome 12:2.
4 Enyene-iwụk ukpepn̄kpọ Bible ubon ofụri ini ekeme ndin̄wam nditọwọn̄ ndinịm eti utịtmbuba N̄wed Abasi. Mmọ emi ẹsịne ọkpọkpọ edikot Bible ofụri ini ke usen ke usen; edikabade ndi asuanetop oro mînaha baptism, nnyụn̄ n̄kọri nsịm uyakidem nnọ ye baptism. Mme utịtmbuba eken ẹkeme ndisịne edinam utom nte asiakusụn̄ unọ un̄wam, edinyanade mbịne utom uyọhọ ini nte asiakusụn̄, ke Bethel; m̀mê ndidụk Ufọkn̄wed Unọ Mme Asan̄autom Ukpep. (Ps. 110:3) Nte eyịghe mîdụhe, mme utọ utịtmbuba oro ẹkọn̄ọde ke N̄wed Abasi do ẹn̄wam nditọwọn̄ ndiyọ ke ererimbot mfịn emi mfịna ọyọhọde.—Ps. 119:93.
5 Kpep Usụn̄ Abasi ke Edinam Akpanikọ: Ndibọk ubon oro ọsọn̄de idem ke n̄kan̄ eke spirit oyom usọ ye ini. Kûyak n̄kpọ ekededi ọbiọn̄ọ fi ndida ini oro ẹyomde ndisọn̄ọ ubon fo idem ndinyụn̄ n̄kpep mmọ n̄kpọ. Kụt ete ke kpukpru owo ke ubon ẹfiọk ini ukpepn̄kpọ ubon ye n̄wed oro ẹdikpepde. N̄wam mmọ ẹnam usụn̄ Abasi edi eke mmọ. (Ps. 119:33, 34, 66) Sọn̄ọ yịre ke ukeme fo ndikpep Bible kpukpru ini ye ubon fo. Enye ọfọn akan “udori” n̄kpọ obụkidem ekededi.—Ps. 119:36.