“Abasi Emekeme Ndinam Kpukpru N̄kpọ”
1 Akpan utom esop Christian edi ndikwọrọ etop Obio Ubọn̄ ke ofụri ererimbot. (Matt. 24:14) Oro edi akwa utom. Ye ediwak mme andida nse, etie nte oyom ukeme oro etịmde okpon akan se nnyịn inyenede. Ye mbon efen, ndinam utom emi ekpere ndidi se owo mîkpekereke-kere sia nnyịn isisobode nsahi, ubiọn̄ọ, ye isịnenyịn. (Matt. 24:9; 2 Tim. 3:12) Mbon eyịghe ẹnịm ẹte ke utom emi edi n̄kpọ oro owo mîkemeke ndinam. Nte ededi, Jesus ọkọdọhọ ete: “Abasi emekeme ndinam kpukpru n̄kpọ.”—Matt. 19:26.
2 Nti Uwụtn̄kpọ Ndikpebe: Jesus ọkọtọn̄ọ utom ukwọrọikọ esie nte owo kiet ke ofụri ererimbot. Man ẹdomo ndibiọn̄ọ enye ndikụt unen, mme andibiọn̄ọ ẹma ẹsuene enye ke usụn̄ oro inua mîkemeke nditịn̄, ndien ke akpatre ẹwotde enye ubiak ubiak. Edi, ke akpatre, Jesus ọkọdọhọ ye mbuọtidem ete: “Ami n̄kakan ererimbot.” (John 16:33) Emi ekenen̄ede edi edinam oro owo mîkemeke ndinịm!
3 Mme mbet Jesus ẹma ẹwụt ukem uko ye ifịk emi ke utom ukwọrọikọ Christian. Ẹma ẹmia ediwak mmọ ke ikpa, ẹtịm, ẹtomo ẹdọn̄ ke ufọk-n̄kpọkọbi, idem ẹkam ẹwotde-wot. Kpa ye oro, mmọ ẹma “ẹdara koro ẹbatde ẹte ke mmọ ẹmedot ndibọ esuene kaban̄a enyịn̄ Jesus.” (Utom 5:41) Kpa ye ẹkedude ke itiendịk, mmọ ẹma ẹnam utom edikwọrọ eti mbụk “tutu esịm utịt ererimbot,” oro eketiede nte se owo mîkemeke ndinam.—Utom 1:8; Col. 1:23.
4 Nte Ẹkemede Ndikụt Unen ke Eyo Nnyịn: Nnyịn n̄ko imanam utom edikwọrọ Obio Ubọn̄ emi ifịk ifịk idem ke ini isobode mme mfịna oro ẹtiede nte owo ikemeke ndikan. Kpa ye mme ukpan, ukọbọ, n̄kpọkọbi, ye mme edinam afai eken ẹdomode nditre nnyịn, nnyịn ke ikokụt unen. Didie ke emi ekeme nditịbe? “Itoho ke odudu, inyụn̄ itoho ke nsọn̄idem, edi oto spirit mi, Jehovah mme udịm ọdọhọ.” (Zech. 4:6) Ye ibetedem Jehovah, idụhe n̄kpọ ndomokiet emi ekemede nditre utom nnyịn!—Rome 8:31.
5 Ke ini nnyịn ikwọrọde ikọ, nnyịn inyeneke ntak ndikop bụt m̀mê ndịk m̀mê ndikere ke nnyịn idotke. (2 Cor. 2:16, 17) Nnyịn imenyene mme okopodudu ntak ndika iso nsịn ifịk ke ndisuan eti mbụk Obio Ubọn̄. Ye un̄wam Jehovah, nnyịn iyanam se “isọn̄de”!—Luke 18:27.